سلوي عثمان ل"الفجر الفني": "العيلة دي" يمثل كل الأسر المصرية.. "رمضان كريم"حتة مني.. ولهذا السبب تخوفت في البداية من "الغرفة 207" (حوار)

سلوي عثمان، إحدى الممثلات المخضرمات فهي ابنة الفنان عثمان محمد علي، ودخلت في المجال الفني والسينمائي عام 1978، وعملت في الإذاعة والسينما والمسرح، والتلفزيون، اشتهرت بأدوار الأم، من أشهر أعمالها: بابلو، المعلمة سماح، رمضان كريم، سجن النسا، حاحا وتفاحة، وكان للفجر الفني معها هذا اللقاء للحديث عن أعمالها المعروضة الآن، كما كشفت أعمالهت المرتقبة.


وتحدثت سلوى عثمان، عن شخصيتها في مسلسل "العيلة دي" ورأيها في المواهب الشابة في المسلسل، كما عبرت عن مدي حبها لمسلسل "رمضان كريم" وجميع فريق عمله، وأوضحت أيضا كواليس مشاركتها في مسلسل "الغرفة 207".


وبسؤالها عما يدور حوله مسلسل "العيلة دي"؟ أجابت: " المسلسل بيتكلم عن عائلات مصرية، كل عيلة لها حكاياتها الخاصة، وأيضًا المسلسل بيوضح فكرة الراجل اللي بيسافر وبيسيب أهل بيته وبيتغرب عشان الفلوس، وأيضًا يوضح الشباب وطريقة تفكيرهم وبيتصرفوا ازاي".


وأضافت: "أما العيلة بتاعتي أنا وضياء الميرغني بتتكلم عن أنهم كانوا في مستوي مش عالي جدًا، بس ربنا كرمهم وبقوا في مستوي أعلي من أختها دلال، أما زوجي في المسلسل بيكون عايز تنويع وأن زوجته أنا تكون دائمًا معاه وبتعمل اللي عايزه وأنه بيطلب يلعب بالألعاب الصغيرة. وأيضًا هو بيطلب مثلًا أننا نمثل جزء من مشهد في فيلم، والشخصية بتعمل كل ده عشان خاطر زوجها ميضيعيش منها، بس في نفس الوقت في الآخر هيكون في مفاجأة كبيرة بالنسبالها".


حديثنا عن كواليس مسلسل "العيلة دي"؟

أوضحت قائلة: "كواليس المسلسل جميلة جدًا والناس والزملاء كلهم القدام والجداد كلهم زمايل، وكل شخص في المسلسل حاسس أنه بينتمي للعائلة اللي فيها، يعني في الآخر كلنا عائلات مختلفة بردو بتتجمع، يعني الحمد لله الكواليس كلها كويسة".


ما رأيك في المواهب الشابة المشاركة في المسلسل ؟

أعربت عن رأيها قائلة: "هما كويسين وحلوين جدًا.. بس أنا بقول دائمًا أن الواحد كل ما يقدم في الشغلانة كل ما بينضج اكثر، طبعًا الشباب كلهم حلوين وبأذن الله أكيد قدام هيكونوا أحلي وأحلى".



ماذا عن مشاركتك في الجزء الثاني من مسلسل "رمضان كريم" ؟

أوضحت كواليس مشاركتها قائلة: "طبعًا أنا مشاركة في مسلسل رمضان كريم 2، ده بتاعي مقدرش مكنش موجودة في المسلسل، حاسة أن المسلسل كله بالنسبالي حته مني وكمان مبسوطة جدًا أن أنا وسيد رجب عاملين ديو مع بعض وفي بينا كيميا كبيرة جدًا".


حديثنا عن مشاركتك في مسلسل "الغرفة 207" ؟

كشفت سلوى عثمان عن كواليس مشاركتها في مسلسل "الغرفة 207" قائلة:"أنا لما اترشحت للمسلسل كان عندي شوية خوف أني أمثل رعب، لأن الكلام ده انا معملتوش قبل كدة وأنا بحب أنوع في الأعمال بتاعتي".

وأضافت: "أنا في الأول قولت مش هعمل المسلسل.. بعدين قولت معملوش ليه ما أنا لازم اعمل حاجة مختلفة لأن أنا بحب دائمًا التغيير وأني أعمل شخصيات مختلفة متنوعة".


وتابعت: "أنا بحب التنويع جدًا لأن لازم الممثل يتنوع في أعماله عشان ميتشافش في قالب واحد.. ومسلسل "الغرفة 207" من التنويعات اللي أنا حبيت اعملها وحبيت أعمل شخصية جديدة عليا معملتهاش قبل كده، وهتعرفوا في الحلقات المتبقية أنها جديدة عليا".

ما رأيك في حالة الرعب اللي عاملاها ريهام عبد الغفور في المسلسل ؟

قالت سلوى عثمان، عن دور الفنانة "ريهام عبد الغفور" في مسلسل الغرفة207: "ريهام عبد الغفور بصراحة تستاهل تاخذ أوسكار عن الحلقات دي و أيضًا هي تستاهل جائزة كبري عن دورها في المسلسل ده".

ما هي أعمالك الجديدة ؟

تحدثت سلوى عثمان عن أعمالها المرتقبة قائلة: "في مسلسل اسمه "نصي الثاني" ده هيتعرض عبر المنصات الإلكترونية وهو من بطولة علي ربيع ومحمد محمود.. وفي كمان مجموعة ضيوف معانا في كل حلقة زي ميرنا نور الدين ورنا رئيس ومحمود البزاوي وشباب كتير، وطبعًا المسلسل كوميدي وحاجة كده لطيفة وخفيفة، هو بيتكلم عن الأسرة المصرية بشكل جميل مفيهوش أي تطرف في اي حدث من الأحداث أو أي مبدأ من المبادئ، فهو مسلسل إجتماعي خفيف لطيف ومناسب لكل الأسر المصرية".