سلوى عثمان ل"الفجر الفني": "رمضان كريم" حتة مني.. شخصيتي في "الغرفة 207" مختلفة عليا.. وهذه أعمالي المرتقبة (خاص)

كشفت الفنانة سلوي عثمان، كواليس مشاركتها في مسلسل "رمضان كريم الجزء الثاني" كما كشفت عن دورها في مسلسل "الغرفة 207" وعن أعمالها المرتقبة.
ت
وأوضحت سلوي عثمان ل "الفجر الفني" تفاصيل مشاركتها في مسلسل (رمضان كريم الجزء الثاني) قائلة: "طبعًا أنا مشاركة في مسلسل رمضان كريم 2، ده بتاعي مقدرش مكنش موجودة في المسلسل..حاسة أن المسلسل كله بالنسبالي حته مني وكمان مبسوطة جدًا أن أنا وسيد رجب عاملين ديو مع بعض وفي بينا كيميا كبيرة جدًا".


وأضافت: "سيد رجب أولًا عسل جدًا.. وثانيًا شخصية فنية جميلة لما بقعد معاه ده بيخلينا نطلع شغل حلو أو ي".

وتابعت: "المسلسل كمان بقا في ضيوف جُدد إن شاء الله تتبسطوا بيهم زي زيزو وزوجها شريف.. وكمان النجمة الكبيرة سلوي خطاب دي إضافة كبيرة جدًا ومعانا فنانين كتير جدًا".

كواليس مسلسل رمضان كريم 2
وكشفت كواليس مشاركتها في مسلسل "الغرفة 207" قائلة: "أنا لما اترشحت للمسلسل كان عندي شوية خوف أني أمثل رعب، لأن الكلام ده انا معملتوش قبل كدة وانا بحب أنوع في الأعمال بتاعتي".

وأضافت: "أنا في الأول قولت مش هعمل المسلسل، بعدين قولت معملوش ليه ما أنا لازم اعمل حاجة مختلفة.. لأن أنا بحب دائمًا التغيير وأني أعمل شخصيات مختلفة متنوعة".


وتابعت: "التنويع في الأدوار مهم جدًا لأي ممثل يعني التنويع بيحسسني أن الممثل مش موجود في قالب واحد وكمان عشان ميتشافش بنفس الطريقة كل شوية".

وأكملت حديثها قائلة: "أنا بعد ما كنت السنة اللي فاتت دراما.. قولت السنة دي كوميدي كتير أن شاء الله في مسلسل "الغرفة 207" من التنويعات اللي أنا حبيت اعملها.. وحبيت أعمل شخصية جديدة عليا معملتهاش قبل كدة.. وهتعرفوا في الحلقات المتبقية أنها جديدة عليا".

وقالت سلوي عثمان، عن دور الفنانة "ريهام عبد الغفور" في مسلسل الغرفة207: "بصراحة تستاهل تاخذ أوسكار عن الحلقات دي وأيضًا هي تستاهل جائزة كبري عن دورها في المسلسل ده".


وتحدثت عن أعمالها المرتقبة قائلة: "في مسلسل اسمه "نصي الثاني" ده هيتعرض عبر المنصات الإلكترونية، وهو من بطولة علي ربيع ومحمد محمود، وفي كمان مجموعة ضيوف معانا في كل حلقة زي ميرنا نور الدين ورنا رئيس، ومحمود البزاوي وشباب كتير، وطبعًا المسلسل كوميدي وحاجة كدة لطيفة وخفيفة، هو بيتكلم عن الأسرة المصرية بشكل جميل مفيهوش أي تطرف في اي حدث من الأحداث أو أي مبدأ من المبادئ، فهو مسلسل إجتماعي خفيف لطيف مناسب لكل الأسر المصرية".