تقرحات المعدة ومش قادر أفتح الباب.. الفنان كريم سرور يشكو من الوسط الفني

كشف الفنان كريم سرور، عن تعرضه لأزمة صحية خلال الفترة الماضية.
وكتب "كريم" عبر حسابه الرسمي بموقع فيسبوك: "أنا كدة بقالي 4 أيام حرفيا مش قادر أتحرك ولو روحت الحمام دي تبقى معجزة من عند ربنا، وموارب باب الشقة عشان الديليفري بتاع الصيدلية أو المطعم لما ييجى يدخل علطول عشان مش هقدر بجد أقوم أفتح الباب".
وتابع: "المهم إني نزلت ستوري لعلاجي الكتير والحقن اللى باخدها وكتبت إني تعبان جداً ومعظم أصحابي عارفين إني عايش لوحدى، الكوميديا كلها بقى إنه جالي 3 مكالمات بالظبط من ناس هما آه أصحابى طبعاً لكن مش قريبين وبنتقابل كل فترة كبيرة".
واستكمل: "جالي كام مسدج كدة من نوعية مالك يابنى فيه إيه ومش هنحسب الري بلايز بتاعة الستورى عشان ده هنعتبره مجرد كومنت كده وأنا مش هحسب الكومنتات إنها اهتمام أكيد، طب ليه أنا بكتب الكلام ده، لإني فاكر كويس إن فيه فترات كنت شغال كتير ومنتشر والناس ساعتها كلها كانوا مهتمين أوي بيا، فخر الشلة بقى".
وأضاف: "مع الوقت بتحصل تموجات وعلو وهبوط، اللي مضايقنى جداً جداً إن من ضمن 3400 شخص شافوا الاستورى يجيلى 3 مكالمات ومش ناس قريبة أصلاً، اللي هو فكرة إن حتى القريبين منك هيحبوك على أساس نشاطك الحالي مش لشخصك".
وتابع: "الحالة دي عموما بتجيلي كتير بسبب تقرحات المعدة، وبتضرب القولون كمان، وباخد حوالي 5 أيام بدون حركة تماما لحد ما تستقر حركة الأمعاء وأبدأ اتحرك، لأنه أي حركة بجد بتكون مؤلمة جدا كأنك بتقطع جسمك وأحشاءك من جوه وبيكون ألم رهيب لدرجة ممكن تسمع صوت صرخاتي لو إنت أحد جيراني الأعزاء وعلى بعد 5 عمارات مثلا".
واستكمل: "أنا بقول الكلام ده وأنا صاحي بقالي ساعتين بحاول أقوم أدخل المطبخ أسخن شوربة الخضار وأجيب مياه عشان العلاج ومش قادر وحرارتي مرتفعة بشكل كبير فالموضوع أشبه بالتخريف، بس حسيت إني ماعنديش قدرة على المقاومة فعلاً وحبيت أفضفض شوية".
واختتم المنشور قائلا: "لو نكدت عليكم حقكم عليا ولو مش فارق معاكم فده كان شيئ متوقع من الأول، وأنا بالكتير بكرة أو بعده هكون كويس جداً وهستعيد نشاطي وحيويتي بكل سهولة".
وفي منشور آخر كتب: "مريض جدا جدا"، وانهالت التعليقات من زملائه من نجوم الفن، متمنيين له الشفاء.
يذكر أن آخر أعمال كريم سرور مسلسل "شاهد عيان" والذي عرض في رمضان الماضي، وهو من بطولة حسن الرداد، هنا شيحة، بسمة، وليد فواز.