فريدة سيف النصر تعلق على إلغاء حفل محمد رمضان بالإسكندرية

علقت الفنانة فريدة سيف النصر عبر صفحتها الرسمية على موقع التواصل الإجتماعى " فيس بوك " مدافعة عن الفنان محمد رمضان بعد مهاجمته وإلغاء حفلته في محافظة الإسكندرية.
ما كتبته الفنانة فريدة سيف النصر
علقت الفنانة فريدة سيف النصر كاتبة: "هو في إيه.. محمد رمضان، كده أوفر أوي، اللي بنسمعه ده أغرب من الخيال طول عمرنا بنعمل مسرح في ماريا عروسة البحر الأبيض طول عمرنا عارفينها فاتحة أحضانها للفن، وهي منبعة أكرم ناس ذواقة لكل الألوان من مستوى السيد درويش لحد بدارة، وحمو بيكا وأكتر من كده هو وزمايله، أشمعنى بقى.. لا إله إلا الله".
وأضافت: "على فكرة اللي اتخرب بيته اللي عامل الحفلة، وعارفين هم حقيقي باعوا التذاكر كلها، طيب الناس اللي بتحبه يولعوا يعني علشان العند والتصاريح.. على فكره معجبينه كلهم شباب، وغالبية عظمى ملهمش في عند وحقد العواجيز ومحاولات الهدد، لكن لو سعادتك ارتحت يهمنا راحتك يا رب بردًا وسلامًا، يا ساتر يا رب".
وذكرت: "المسؤول عن التصريح ناقص يدخل اللي مش على مزاجه بفيزا، واللي مش قادرين يفهموه، الفنان لو له عمر بيستمر أكتر من أي مركز وكرسي زائل، هو إيه الغلب ده هو تار، ولا إيه، طيب نفهم علشان مندافعش فهمونا يا ريسنا الإسكندرية مش بتاعت أي مسؤول، دي بتاعتنا كلنا معظمنا أهالينا هناك عند العروسة، وكرم الدنيا، والجدعنة الإسكندراني مبيكرهش حد وبيحب كل الألوان ما بيكا أهو مثلا تاني أهو".
وتابعت فريدة سيف النصر: يعني إيه تصاريح؟ محافظات مصر كلها للمصريين.. وكل ده وقت لتصريح حفلة معروفه للكل وإشمعنى الأجانب هوا يتعمل كل حاجة وحفلات لغير مصريين على رأسنا، لكن بالنسبة لأبنها إيه بقى هو في إيه؟، الحرب والحقد مش للدرجة دي كتير كدة الإسكندرية أهلها بس اللي يقرروا، ولو قالوا يبقى تمام، لكن عند مع مسؤول مينفعش، واللي يكلمني ويقول لي بتطبلي له أهو شغلك معاه إيه الأدب ده، أولًا رمضان مبيدخلش في حاجة، في حاله ومحترم قسمًا بالله وبرضه مسلسل موسى، محمد سلامة اللي رشحني، ده ابني، يعني اسألوه، ومسلسل العمدة اللي مرشحني محمد سامي، وكنت عايزه اشتغل معاه بجد، وأنا بحبه هو ومي جدًا من القلب للقلب، ده لو بيقبضني وعامل لي بطولات مش هتضايق كده بس بجد حرام نهدى بقى.
واختتمت فريدة المنشور كاتبة: وتاني بسيطة نعمل له مسرحية في بلدنا الإسكندرية، ونعرف بقى بتصريح ولا خيبة تقيلة، بعد العمر ده كله فيها وقبل ما الكراسي دي ما يتقعد عليها، وياما راح وجه كتير ومشيوا معاش فوقوا هو في إيه، ولا يمكن هناخد فيزا قريب ما هو هيبقى للفنانين كلهم بقى، ولا يكون معمول ل رمضان بس يا عيني يا بني، حلوة فيزا دي ما هو كان ده المخطط ناسيين الله المستعان، وأنا بقى ربنا خالقني كده وبخسر على فكرة بس بكسب نفسي اللي بصدقه وألاقيه مظلوم بجد، أو مستهدف بدافع ما دام مقتنعة، هو مش أسوء ما فيها، بس كل موضوعه ربنا، كل ما بيتحارب بيوسع عليه أوي، وبيقف جنبه، ومحبينه يزيدوا، حاسبوا ربنا بقى، استغفر الله جرى لنا إيه؟، ويبقى السؤال مين السبب هو في حد اشترى العروسة، فهمونا دي بتاعتنا حتة من روحنا وعمرنا نفهم، سلام.
فريدة سيف النصر

مشاركة الفنانة فريدة سيف النصر في مسلسل العمدة
جدير بالذكر أن الفنانة فريدة سيف النصر ستشارك في بطولة مسلسل "العمدة" بطولة النجم محمد رمضان، والمقرر أن يخوض به منافسات دراما رمضان المقبل، والمسلسل من تأليف وإخراج محمد سامى، سيناريو وحوار محمد سامى ومهاب طارق، وبدأ المخرج محمد سامى تصوير أولى مشاهد المسلسل أمس الأحد في منطقة جاردن سيتى، وجمعت المشاهد الأولى محمد رمضان وعدد من الفنانين، حيث يستمر تصوير المسلسل في نفس اللوكيشن لمدة 3 أيام.
تعاون الفنان محمد رمضان والمخرج محمد سامي
مسلسل "العمدة" يعد التعاون الثالث في الدراما التليفزيونية بين المخرج محمد سامى وبطل العمل محمد رمضان، حيث قدما سويًا مسلسلات الأسطورة والبرنس، وحققا سويًا نجاحًا كبيرًا، نظرًا للكيمياء التي تجمعهما على مدار أكثر من 6 سنوات وايضا المسلسل التعاون الثاني بين محمد رمضان وفريدة سيف النصر، حيث قدما سويًا مسلسل "موسى" العام قبل الماضى، من إخراج محمد سامى، وشارك في بطولته كل من رياض الخولى، سمية الخشاب، عبير صبرى، هبة مجدى، أسماء جلال، وعدد من الفنانين.
محمد رمضان ومحمد سامي