لقاء الخميسي لمنتقديها: "وفروا وقتكم الثمين في شئ أهم"

أعربت الفنانة لقاء الخميسي، عن استيائها من الأشخاص الذين يقومون بانتقادها دائمًا، وقامت بتوجيه رسالة لهم، وذلك من خلال حسابها الشخصي على موقع الصور والفيديوهات "إنستجرام".
حيث نشرت "لقاء"، صورة لها، وعلقت على الصورة قائلة : "لقاء .. هو دا انا.. يافنانة بتكتبي بالإنجليزي ليه، يافنانة انت بتلبسي مفتوح ليه ماتلمي نفسك، يووووه مالك لابسة مقفل كدا ليه، انت قصيتي شعرك ليه، شكلك وحش، انتي طولتي شعرك ليه شكلك بلدي، انتي بتنزلي بوست يوم الجمعه بدل ماتصلي، انتي متصوره كدا ليه، فينك يا منصف انت سالت ايدك خالص، فستانك قرف وذوقك زفت، انت على فكرة اخرتك جهنم، اعرفي ربنا بقي، ايه دا انتي مسيحية ولا مسلمة ، انتي سهرانة وبترقصي ومش حاسة بالناس، انت معندكيش دم، حسبُنا الله فيكي وفي امثالك، جهنم وبئس المصير، ماتحترمي سنك بقى وتتلمي انتي قدوة ".
وأكملت "الخميسي"، قائلة :" أولاً أحب أوجه الشكر للناس اللي بتحبني زي ما انا، وجمهوري المهذب المحترم اللي مقدرني زي ما أنا، ولو أحيانًا اختلف معايا في الرأي لا يفسد في الود قضيه بيننا، شكرًا ".
واستطردت لقاء قائلة: "أما عن هؤلاء المتنمرين الكارهين للحياة والحب واحترام الآخر وتقبل الآخر، ياجماعة صفحتي هي بيتي اللي فاتحاه لحبايبي وصحابي اللي بيحبوني زي ما أنا وأنا بحبهم، أما عن هؤلاء الكارهين الحاقدين اللي مالهومش لاشغل ولا مشغله غير إهانة الناس وفرض أرائهم على الآخرين بدون أي احترام للحريات واختلاف الاّراء والطبائع والأفكار، ياجماعة وفرو وقتكم الثمين في شئ أهم من إنكم تتابعو شخص مش بتحبوه، واحتفظوا بطاقتكم الإبداعية في الإهانات والتنمر والألفاظ البذيئة والكره لنفسكم، المهم أنكم تبقو كويسين لنفسكم وحياتكم وماتحاولوش تملو علينا أرائكم الجدلية،ماتضيعوش وقتكم الثمين مع حد مختلف عنكم وبيضايقكم، الحياة لا تحتمل، احفظوا وقتكم للمتعة والسعادة، والتحقق بعيدًا عن الهري والسُباب والتنمر، يمكن تعيشو أحسن.. خليكم في حياتكم ودعو الخلق للخالق، ماتنصبوش نفسكم المتحدث باسم الله، كل واحد ليه حياته، كل واحد يبص في ورقته، أنا هو أنا، اختار حياتي كما أريد".