حكايات المصريين مع "سابع جار": إتهامات بالإنحلال.. وإشادات بتجسيد الواقع (صور)

منذ أن عرض مسلسل سابع جار على شاشة "سي بي سي"، وتابعه المصريين بشغف، بل أصبح لهم عدة حكايات مع المسلسل الدرامي، سواء تلك الحكايات تمثل إنطباعات إيجابية أو سلبية.
مسلسل " سابع جار " من بطولة دلال عبد العزيز وشيرين، ورحمة حسن، محمد علاء، هيدى كرم، أسامة عباس، تأليف وسيناريو هبة يسرى، وإخراج آيتن أمين ونادين خان، وينتمى إلى نوعية المسلسلات ال60 حلقة، و قد تم عرض 40 حلقة حتى الان .
بيحط السم في العسل
شادي أبو زيد قال: " مسلسل سابع جار بيحط السم في العسل.. طول عمرنا مجتمع محافظ وكويس إيه لازمة إني أكون بتفرج مع اختي على المسلسل وألاقي بنت تشرب سجاير عارف إنه في سياق للدراما بس كان ممكن تشرب سجاير اللي هي لبان ديه اللي كنا بنجيبها واحنا صغيريين.. أو يكتبوا تحذير قبل المسلسل أنه "الحلقة ديه فيها مشاهد فيها بنات بتشرب سجاير وده تمثيل مش بجد".
وتابع: "نيجي بقى للقطة التانية بتاعت الأفندي اللي بيشرب بيرة هو انتو بتعايروا الغلابة يعني إكمن البيرة غليت ومبقتش في متناول الجميع.. في ألف بديل للبيرة ممكن يشرب بيريل أو ممكن كان يقدملها ينسون ويشربوه سوى.. ثم أصلاً لزومه إيه أن الولد يقعد مع بنت لوحديهم ويبقى لابس شورت وركبته باينه وهي لابسة تيشيرت مخطط... تقصدوا ايه بقى ان شاءالله؟".
إنحلال وقلة إحترام
وفي نفس السياق قالت وجدان فتحي: " مسلسل سابع جار.. هو طبيعي إني بعد ما أكون معجبة بفكرته الاجتماعية أقرف منه.. إيه الانحلال ده وقلة الاحترام والدين والاخلاق.. حتى لو ده واقع في حياتنا وفيه 1% في بلدنا كده ليه نظهره بالاسلوب المقزز ده".
وأضافت: "ليه الألفاظ والإيحاءات القذرة دي تتقال قدام الناس.. غالبا اسوأ سيناريو شوفته في حياتي وحل المشاكل اللي بيواجهها المجتمع عمره ما كان بالأسلوب الرخيص ده".
المسلسل بيناقش أفكار
أما شيرين دحروج فقالت: " الناس المعترضه علي سابع جار أوي كده.. المفاجأه هي إن إنتوا اللي مش عايشين في الدنيا تمامًا.. المسلسل بيناقش أفكار و نماذج ناس عادي والمسلسل محكمش إيه الصح وإيه الغلط ده طرح لمجتمعنا دلوقتي فين المشكلة".
المسلسل بيجسد الواقع
وعلى نفس الوتيرة قال علاء علي الشيمي: " الدراما مش لازم دايمًا تصورلنا الصورة اللي إتربينا عليها لأن الحياة والواقع في صور تانية وأجواء تانية غير اللي إتربينا عليها وانا شايف ان الواقع دايمًا أسوء من دراما ممكن نشوفها علي الشاشة".
واستطرد: "العمل محترم جدًا خلانا كلنا نتابعه ونتشدله وده مش سهل.. أما موضوع العك اللي بيحصل واللي مش بيوافق أخلاقنا ولا عادتنا ولا اللي إتربينا عليه فده الوجه الآخر اللي ممكن ناس كتير تعيش وتموت ومتقابلوش في حياتها ولا حياة اللي حواليها لكن ده لا ينفي وجوده".