هيثم عرابي يغادر مصر ويوجه رسالة للأهلي

أعلن هيثم عرابي مدير تعاقدات الأهلي السابق هجرته خارج مصر إلى أوروبا لقضاء فترة معايشة مع بعض الأندية هناك.
ووجه هيثم عرابي رسالة إلى جماهير الأهلي عبر حسابه على "فيس بوك" أن الأحمر سيظل في قلبه مشيرًا إلى أنه اصطدم بالواقع الأليم في العمل بمصر على اعتبارات غير الكفاءة المهنية.
وكتب عرابي على "فيس بوك:
"السلام عليكم .. انا سافرت من مصر امبارح الي أوروبا ، عشان أخوض فترة معايشة مع بعض الأندية الأوروبية في الادارة الرياضية، وكمان هيكون في تعاون رياضي بيني وبين بعض الاندية دي ..
انا جيت مصر وعشت تجربة اتعلمت منها كتير، واشتغلت في النادي الأهلي اللي كان بيمثل بالنسبة ليا حلم ، وربنا اعلم وانا في النادي اشتغلت بضمير واخلاص واجتهد في كل لحظة ، علشان أكون قد مسؤولية اسم النادي الاهلي وجمهوره الرائع . واكيد التجربة ليها وعليها
وبالتأكيد اصطدمت وسط كل دا بواقع الشغل في مصر ، ومع ذلك انا ماشي و راضي تماما عن التجربة ، لان حتي في سلبيتها علمتني كتير وفادتني علي مستوي الشغل والمستوي الإنساني .
في مجموعة كانت حواليا وانا في مصر وهما عارفين نفسهم كويس، بشكرهم جدا لأنهم هونوا حاجات كتير عليا ، لان مع طبيعة الشغل والجو الموجود في البلد.. مهم انك تختار الناس الصح والدائرة اللي تكون حواليك وبجد حتوحشوني.
وللاسف النصيحة اللي اقدر اقولها بعد التجربة دي ، او تقدر تقول الدرس الأكبر
النجاح في مصر له حسابات أخرى مش من أولوياتها الكفاءة المهنية
اما بالنسبة للاهلي فمفيش كلمة ممكن اكتبها ممكن تعبر عن اللي جوايا تجاه النادي ، او تشرح هو بالنسبة ليا ايه..
، بالتأكيد عمر الاهلي ليا مكان محطة في حياتي و انتهت الاهلي بالنسبة لي بيتي اللي أتمنى رجوعه في يوم من الأيام و احرص دايما على نجاحه و انه يكون في أحسن حال و صورة و بالتوفيق دايما للنادي ولكل شخص بينتمي او بيشتغل للنادي او بيساعد في رفع اسم النادي
تمنياتي للجميع بخير ، حتي الناس اللي اختلفت معاهم .. بالتوفيق دايما لكم .. اشوفكم علي خير".