جه علية اليوم

ازيكم جميعا يارب تكونوا بخير .. ازيك استاذة نيفين لعلك بألف خير ,
انا إتجوزت مرتين من جنسيات أجنبية مختلفة وما حصلش نصيب , وقررت أرجع مصر علشان هستكمل شغلي هنا .. ولاني مش ناوي أكمل حياتي لواحدي فقررت ارتبط بإنسانة مصرية , المهم إن ربنا وفقني فعلا وقابلت بنت كويسة جدا لكن مشكلتي بدأت أول ما حسيت إن معاد الفرح قرب .. مش متخيل ان هييجي علية اليوم وبدل ما واحدة تكلمني علشان نسهر وننبسط ألاقيها مكلماني تقولي هات عيش فينو وانت جاي ولا هات كيلو لبن !! .. الصراحة الإستقرار جميل لكن مش تركيبتي ولا شخصيتي ألاقي نفسي واقف مستني دوري عند الفرن .. مش عارف هل حد فاهم اللي أنا بقوله دة ولا مستغربين ؟ .. أكيد مش هبوظ الجوازة لانها كمان انسانة ممتازة لكن حاسس بحاجات مش ظريفة .. إحساس زهق أو يمكن غلس .. مش عارف .. حد ممكن من إخواتنا في فضفضة يقدر يفسرلي الحدوتة دي ؟ ويفيدني برأيه بدل ما أبوظ حياتي وانا مش ناقص ؟
صديقكم .. ياسر
[email protected]