إيقاف مذيعة براديو "هيتس" بسبب رفضها الحكم ببراءة "مبارك"

منعت إدارة راديو هيتس الإعلامية عايدة سعودى، مقدمة إحدى البرامج بالمحطة، تقديمها للبرنامج مرة أخرة بسبب رفضها الحكم ببراءة الرئيس الأسبق مبارك ، واكدت أن الأمر لا يحتاج إلى أدلة لكى يتم محاسبة مبارك وأعوانه، وشبهت مبارك بتاجر المخدرات الذى يحصل على حكم براءة لعدم وجود أدلة ولكن الجميع يعلم انه تاجر مخدرات.
وعقبت سعودى على ذلك فى حلقتها بعد صدور الحكم ببراءة مبارك وأعوانه لعدم وجود أدلة قائلة: أنا قبل الحلقة مش عارفة أقول إيه ولا أعمل نفسي مش من هنا، جملة لا تعليق على أحكام القضاء جملة كلنا عارفينها وحافظينها عن ظهر قلب وبنحترمها، لكن عندي كام سؤال لما حد يحتفل بحكم براءة مثلًا ده يبقى تعليق ولا مش تعليق، لو هو عادي يبقى الحزن والقهر هو برضه عادي .
وأضافت: أنا من حقي كمواطنة ومذيعة أتوجع من حكم زي ده، أتوجع لشباب راح بسبب أفكار حرة عيش وحرية وعدالة اجتماعية وكرامة إنسانية، من حقي أحس بالقهر من الناس اللي بتحتفل بالبراءة هما أحرار بس من حقي أحس إنهم فرحانين في موت إخواتنا، وبراءة أشخاص كلنا عارفين اللي حصل في عهدهم وبنعاني من تبعاتهم من فقر ومرض وجهل .
وتابعت: قتل المتظاهرين لم يكن في بلد آخر، إنما كان هنا وقدام عنينا وشفناه في التليفزيون، من دهس مواطنين، وخرطوش في أصحابنا مش ناس سمعنا عنها، حق الناس تفرح بالبراءة لكن من حقي أحزن على الناس اللي ماتت واتصابت قدام عنينا بدون محاسبة الجاني .
وواصلت حديثها قائلة: لو فيه تاجر مخدرات في قضية ما خرج براءة لعدم ثبوت أدلة أو لأنهم تابوا لأي سبب ده مينفيش إنهم تجار مخدرات ودمَّروا أجيال كتير وعارفين إنهم عملوا ده، ده برضه مايخليهمش يبقوا أبرياء .
وختمت حديثها قائلة: منين دستور قال لنا عليه نعم وفيه ثورة يناير ومنين هي خيانة يناير منين الشباب الطاهر البريء بتوع ثورة يناير واللي الرئيس صرف لأهالي الشهداء تعويضات، ومنين هما الخونة العملاء اللي تآمروا على البلد، منين بنطالب بالاهتمام بأسر الشهداء ونراعيهم ومنين بنتهمهم بالعمالة، سؤال بقى مين القاتل.. إزاي نظام بيبقى قايم على معاداة شباب اللي هما 60% وبيتهمهم بالخيانة والتفاهة وإنهم عايشين على نظام افتراضي (تويتر)، وفي نفس الوقت كانوا هما دول الورد اللي فتح في جناين مصر، ومنين المذيع اللي بيشتم في ثورة يناير هو اللي بييجي يقول شهداء ثورة يناير، بس هما نفس الناس الخونة العملاء، بس يمكن أنا عندي انفصام شخصية أو بدأت تجيلي تربنة .