محمد رمضان: تزوجت فى شهر بسبب قلم ألماظ هدية من أمير

كشف الفنان محمد رمضان، أنه تزوج وعمره 19 عاما عقب إنتهائه من تصوير فيلم إحكى يا شهرذاد .
وأضاف خلال لقائه فى برنامج واحد من الناس مع الإعلامى عمرو الليثى على قناة الحياة قائلا: خطبت زوجتى الأولى واتفقنا إن الجواز يكون بعد خمس سنين عشان أكون نفسى، وكنت بعمل مسلسل حنان وحنين، وكلمنى مخرج مسرحية قاعدين ليه مع الفنان على الحجار عشان أشارك فيها بمشاهد بسيطة، وافقت وأثناء العرض الأول للمسرحية فوجئت بأن هناك شخص يقولوا عليه سمو الأمير أعطاني قلم به فصوص الماظ ومدح تمثيلى .
وتابع قائلا: بعدها تفاجآت بخناقة بين مخرج المسرحية وعلى الحجار بسببى، لقيته بيقول للمخرج إنه هينسحب من المسرحية فى حالة إستمرارى فيها، مبرر موقفه بأنى أعتمد على فكرة الإرتجال، لقيت المخرج حلف بالطلاق إنى مش همشى، رحت طلعت على المسرح وتفاجآت بخمسة تبع بطل العمل مسكونى ووقعونى على الأرض، واللى كسرنى إن دماغى كانت عند رجل ممثلين فى الكواليس، واللى حصل دة كان ضد سماتنا كفنانين،المهم مشيت ورحت إسكندرية أخدت من قريبى فلوس لإن كنت محتاج فى الوقت دة، بعدها إفتكرت القلم الهدية رحت على محل ألماظ عشان اتأكد وعرفت إن تمنه 75 ألف، وكنت رافض إنى أبيعة لأن هدية، لكن صاحب المحل صمم وقالى هديك 100 ألف جنية فوافقت وبدل ما إتجوز بعد خمس سنين إتجوزت بعدها بشهر، وخلفت حنين وعندى 20 سنة وهى عندها دلوقت 4 سنين، وحصل طلاق ، وأنا متجوز دلوقتي نسرين وعندى إبنى على عمره خمس شهور .