"سلامتك يا خال".. رسالة من الشاعر عماد حمدي إلى عبد الرحمن الأبنودي

وجه الشاعر عماد حمدي رسالة إلى الشاعر الكبير عبد الرحمن الأبنودي بعنوان سلامتك يا خال ، وذلك بعد إصابة الأبنودي بوعكة صحية مؤخرا .
وجاء في القصيدة :-
ألف سلامة وبعد الشر رب يصونك من الأهوال
ياللي دفعت شبابك مهر ولا فكرت في جاه ولا مال
شفت الذل وشفت القهر ويا حجاب في السجن يا خال
عشت النكسة وذقت النصر فرحة غنوة دموع موال
الف سلامة ياعاشق مصر ياللي حلفت زمان بترابها
فجر وصبح وظهر وعصر عدي نهارك وسط أحبابها
سبت الفيلا وسبت القصر واستحليت تشاركها عذابها
حب بلادك ملهوش حصر قلبك سايبه خفير على بابها
فايزة حليم ومنير ونجاة أحلى غناوي وأحلى حروف
وردة ورشدي صباح في ساعات ولا فؤادة في شيء م الخوف
والهلالية كمان بالذات كنا بنستناها الوف
بدل الثورة ثلاث ثورات دورك فيهم كان معروف
الف سلامة عليك يا حبيبنا قلب الشعب العربي معاك
لحظة تعبك إحنا تعبنا رب ياخالي يتم شفاك
كان على عينا إن إنت تسيبنا وتقعد ف الإسماعيلية هناك
أيوه صحيح بتغيب عن عينا بس قلوبنا أكيد شيفاك
وقال حمدي إن القصيدة هي مجرد تعبير عن حب جموع المصريين للشاعر الكبير الأبنودي ، الذي ترك بصمة ثقافية واضحة في جيله والأجيال الآخرى .