أيمن بهجت قمر يكتب: مصر تطلب الطلاق !!

بصوا بقى ياض انت وهو:أظن منظري واضح ومش محتاج اوصفلكوا عينيا لتنين ورمانين ازاي ...هتقولولي من البونيات اللي عماله البسها من الناحيتين ؟هقولكوا جايز ..هتقولوا لي من العياط ؟هقولكوا ده اكيد ..ماهو انا الزمن جار عليا واتمرمطت وسيرتي بقت على كل لسان .
اخس عليكوا كله منكوا.. انا لما طلقتوني من حسني انا ما اتكلمتش وكبرتكوا ..وقلت انا من ايدكوا دي لإيدكوا دي ..ما انتوا رجالتي وولادي وخلاص كبرتوا واكيد بتدوروا على مصلحتي .
رشحتوا لي بعدها اكتر من عريس وبرضه في الآخر قلتلكوا اختاروا انتوا ..انا مش عايزه حاجه من الدنيا غير راجل ياخد باله مني ويحبكوا ...والله يسامحكوا اختارتوا لي راجل على باب الله غلبان زي مابيخرج زي مابييجي ...يا إما بيهتم باصحابه اكتر مني وطول الوقت معاهم او باله مشغول بيهم ..يا اما نايم على طول في الليفينج وسايبني وحدانيه ..لا حاسه بالأمان ولا حاسه اني بقالي راجل ..كل يوم اقول له ياعم الحاج حس بيا شويه دنا برضه مش صغيره وليا مقامي ..يقوللي معلشي اصلي مرتبط بجماعه كده وكل يوم لازم اديهم التمام ..اديته فرصه واتنين وتلاته لكن نقول ايه ! آدي مجايبكوا...وعلى رأي المثل اللي انا مألفاه هتاخد ايه يا خايب م الشراب السايب .
شوفوا بقى الراجل ده انا ماليش عيشه معاه ..البيت كل يوم خناقه ومولع نار..حتى انتوا بعد ماكنتوا واحد فجأه بقيتوا تلاته ..وانا ما اتجوزتوش الا عشان يلمكوا .. واما البيت يبقى عامل كده يبقى الراجل مش قادر يحكمه..كتكوا خيبه ف خيبتكوا .. خلصوني زي الرجاله كده وبطلوا معايره وخناقات وتنطيط على بعض ..انا جبت اخري منكوا ..دنا عيشت طول عمري بكرامه ..ايوه افتقرت واتداينت بس برضه كنت راسمه الشويتين ..لكن دلوقتي خلاص العمليه ظاطت ع الآخر وانا كبرت وتعبت ودي مسؤوليتكوا .
طلقوني منه ودورولي على راجل اتسند عليه ..راجل يسترني مش يشحت عليا ..والأهم راجل يحب عيالي ويراعيهم ومايفرقش بينهم .. طلقوني منه يا ولاد ال.......
أمكوا:مصر الحلواني