بالفيديو و الصور .. لمحات سريعة عن اليوم التاني لمهرجان كان السينمائي الدولي

امبارح كان يوم حافل جدا من ايام مهرجان كان السينمائي الدولي المتميزة واللي كان فيها فعاليات كتيرة لافلام ومؤتمرات وعروض مهمة وكان من اولها عرض الفيلم الفرنسي Rust and Bone واللي بتقوم ببطولته ماريون كوليتيارد وجان ميشيل كورريا و ارمند فيرديور واخراج وتأليف جاك أوديار وبيتكلم الفيلم عن اب بيلاقي نفسه فجأة لازم يعتني بابنه الصغير اللي عمره 5 سنين واللي بيعرفه بالعافية
لكنه معندوش بيت او فلوس ولا حتي اصحاب فبيضطر انه يسافر لشمال فرنسا لاخته وفعلا بتتحسن الامور وبتحصل ليهم العديد من الامور اللي بتساعدهم علي انهم يعيشوا حياة كويسة . وبعدها اتعمل مؤتمر صحفي ضخم بحضور ابطال الفيلم ومخرجه واللي قال " الفيلم بيتكلم عن واقع شخصيات في فترة الازمة ".. وقالت ماريون كوليتيارد ان شخصية ستيفاني اللي قدمتها في الفيلم انها شخصية مثيرة وانها لما قرأت السيناريو لغاية اخرتها مقدرتش تعرف مين هي وعشان كده بدأت هي والمخرج يدوروا علي مسار الشخصية اللي اثارها جدا ".
وكان الحدث التاني هو العرض الخاص للفيلم واللي اتعمل في قصر المهرجانات وحضره عدد كبير من نجوم السينما العالمية ومنهم ايفا لونجوريا واللي بتحضر المهرجان لانها الوجه الاعلاني لشركة لوريال العالمية وجين فوندا واللي رقصت علي السجادة الحمرا مع المزيكا وكمان كانت المفاجأة بوجود النجم جاكي شان واللي شد الانتباه ليه بشكل كبير وكان وسط مجموعة كبيرة من نجوم السينما الاسيوية .. ده غير اسرة الفيلم واللي ركزت معاهم الكاميرات وخصوصا مع ماريون اللي كانت متألقة بأناقة شديدة والطفل الصغير اللي كان معاهم ..
وكمان امبارح كان فيه ال Photocall الخاص بلجنة تحكيم الكاميرا الذهبية واللي بتضم المخرج البرازيلي كارلوس دييجيس وهو رئيس لجنة التحكيم و الاعضاء هما المخرج الفرنسي ميشال اندريو ومدير التصوير الفرنسي ريمي شيفرين والناقد الفرنسي فرانسيس جافيلي و ال Art Director هيرفي ايكوفيك و الصحفية جلوريا ساتا وكانت الملاحظة علي لجنة التحكيم دي ان كلها رجالة كماعدا الصحفية جلوريا هي اللي كسرت القاعدة .
ومن بين الاحداث اللي تمت امبارح كمان كان افتتاح كلاسيكات كان مع مؤسسة السينما العالمية واللي انشأها مارتن سكورسيزي وكان الافتتاح امبارح بفيلمين رجعت لهم الحياة مرة تانية بعد ما تم ترميمهم كنوع من الحفاظ علي تراث السينما في العالم وكان اول عرض امبارح لفيلمين في صالة بونويل وهما الفيلم الهندي Kalpana والفيلم الاندونيسي After The Curfew .
اما سينما الشاطئ فعرضت فيلمين من افلام الاسطورة جيممس بوند وهما James Bond contre Dr.No وCasino Royale وده في عروض مفتوحة للجمهور وده في اطار الاحتفالية اللي عاملها المهرجان لمرور 50 سنة علي وجود جيمس بوند علي الساحة السينمائية .
في الوقت اللي كانت قاعة Soixantie بتعرض فيلم عن المخرج رومان بولانسكي واسمه Roman Polanski : A film memoir واللي قدمه المخرج Laurent Bouzereau واللي حس بالفخر بان فيلمه عن رومان بولانسكي بيشارك في المهرجان ووصف رد فعله لما عرف الخبر بانه كان طاير من الفرحة لان مهرجان كان بيمثل ليه وللصناعة السينمائية العالمية اكبر شرف يمكن انه يحصل لفيلم لو لمخرجه لانه حدث بيتيح ان الفيلم يتعرض قدام اكبر جمهور ذواق.
وكمان كان امبارح الPhotocall الخاص بالفيلم الصيني Mystery وكمان العرض الخاص واللي اتعمل في قاعة مسرح Debussy ، والفيلم بيتعرض في مسابقة نظرة ما واللي بيتحدي بيه المخرج Lou Ye الرقابة من جديد بعد مرور 5 سنين من منعه من تصوير اي فيلم وخصوصا وان فيلمه الجديد بيتكلم عن قصة Lu Jie الست الحزينة اللي مكنتش قادرة تتخيل ان في حياة جوزها ست تانية غيرها لغاية ما بتشوفه داخل فندق ومعاه واحدة تانية .
وفي نفس القاعة اللي اتعرض فيها فيلم Mystery اتعرض فيلم المخرج الكازاخي دارجان عميربايف Student واللي اخد داران قصته من الادب الروسي من كتاب الجريمة والعقاب، للكاتب الروسي الشهير دوستويفسكي.وده الفيلم السادس ليه والتالت ليه في القايمة اللي اختارتها لجنة مسابقة نظرة ما واللي اكد عدد كبير من النقاد ان الفيلم بيهتم بالدقة وفيه نفحة شاعرية .
اما الحدث المهم كمان ولكن بالنسبة لينا هنا في مصر والعالم العربي بشكل اكبر هو عرض الفيلم المصري "بعد الموقعة" امبارح واللي لقي اهتمام كبير سواء في ال Photocall او المؤتمر الصحفي اللي اتعمل للفيلم وحضره المنتج الفرنسي للفيلم جورج مارك بينامو ومساعد مؤلف السيناريو عمر شامة والمخرج يسري نصر الله وابطال الفيلم الثلاثة منة شلبي وناهد السباعي وباسم سمرة .. وانتهت فعاليات اليوم بالعرض الخاص للفيلم في قصر المهرجانات ...