احنا اللي غربتنا فشنك.. بقلم: أيمن درويش

احنا اللي غربتنا فشنك
واحنا اليتامي في دي البلاد
واحنا اللي بيسمونا بنك
واحنا اللي مرمطنا البعاد
واحنا اللي شاحتين حبهم
واحنا اللي شايلين همهم
واحنا اللي سالفين ضحكهم
واحنا اللي بالنسبه لهم دفترشيكات
احنا اللي عايشين في الفشنك
واحنا اللي ضاحكين في الفشنك
واحنا اللي واكلين في الفشنك
ولما نزعل منهم نزعل فشنك
علاقتنا بيهم كرت شحن
وحبة صور متحمله علي اي لينك
الغربه تربه متزوقه بحبة ورود
احساس غبي انك تحس بعزله
عن كل الوجود

إنك تلاقي العيد بيجي وتتحرم من حضن أبوك
إنك بتقرأ الفاتحه ع الصحبه القديمه
إنك تحوش اللقمه وتبعتها لأخوك
ويوم ماتتعب حبه تاخد بالقديمه
وتلاقي كل اللي أنت عشتلهم باعوك
ويدوب تفكر يومين في نفسك تلقي مرض ثم مرض ثم التابوت
كل شئ في الغربه قسط
العزال جيبينه قسط
والعيال فرحتها قسط
والإيجار دفعينه قسط
حتي لما نحب نضحك
تترسم ضحكتنا قسط
احنا اللي بلونه وفاضيه
بتتنفخ بدين وقسط
احنا اللي غربتنا خدتنا
وخدرت أحلامنا بنج
والمحصله توب قماش
وطرحه شاش
وكام ترنك
احنا اللي مغتربين اونطا
واحنا اللي غربتنا فشنك