فرض غرامة مالية على التبول في الشارع

مساء الخير أستاذة نيفين ،
انا بشوف ظاهرة كانت موجودة من قبل كدا في مصر لكن لاحظت أنها زادت وهية ( التبول ) في الشارع ، ونفسي افهم .. هية الظاهرة دي راجعة لايه يمكن نقدر من خلالكم او حتى نعمل دعوة عامة للتغلب عليها .. ممكن تفيديني ؟
سارة
فضفضة
محررة الصفحة .. نيفين حجازي
يا سارة .. هوة التبول في الشارع بس ؟!
انا هحكيلك موقف فوق الخيال .. وانا ماشية على كوبري أكتوبر في عز الزحمة فجأة وقف الطريق تماماً .. ليه بقى ؟! اتاري فيه عربية وقفت يمين في الجزء المعلق من الكوبري .. وكانت عربية جديدة وغالية مش توك توك يعني ، البيه الأب ركن وموقف الطريق بالكامل وراه والست اللي هية مراته والمفروض أنها أم .. نزلت ابنها عنده حوالي خمس سنين .. بيتبول من فوق الكوبري على دماغ الناس اللي تحت ، والله العظيم ما صدقت عيني .. يعني إحنا ما فقناش على منظر التبول تحت الكباري .. دلوقتي الموقف أخد أشكال ومظاهر تانية ،
انا من الصدمة قعدت أتصور لو انا اللي ماشية تحت المنطقة دي .. شعوري هيبقى ايه ؟!
شوفي يا سارة .. مبدئيا العيب هنا في السلوك نفسه ولما أم زي اللي بحكيلك عنها دي وأب بالمنظر ده فرحانين جداً وعادي جداً منزلين ابنهم يتصرف كدة يبقى طبيعي قوي لما الطفل ده يكبر هيتصرف مع أولاده بنفس المنطق !!
الحل هنا انه يصدر قرار بغرامات مالية في حال الإمساك بشخص بيتصرف كدة او الإبلاغ عنه او اكتشافه عبر كاميرات الشارع تتوجه له سيارة الشرطة للقبض عليه ويدفع الغرامة ، لان النوع ده من الناس مش هيفهموا إحنا بنتكلم في ايه لكن يفهموا كويس جداً وجع الغرامة لما تنزل على جيبهم ، وعلى فكرة الدنيا برة ماشية كلها بنظام الغرامات المالية علشان محدش يفتكر ان الشعوب برة متقدمة خلقة ربنا .. لا خالص .. انا بضم صوتي لصوتك لوضع غرامة على التبول في الشارع او البصق في الشارع وإلقاء القمامة في الشارع وكل المخالفات المؤذية .