دعوة جنسية ..

مساء الخير .. مش هقول انا راجل ولا ست .. لأن ده مش مهم .. لكن المهم اننا لازم نعترف بأن كتير جدا مننا عنده مشكلة في علاقته الخاصة .. يا إما حالة من الكسوف بتدوم كتير فطبعا ده بيلغي اهم حاجة بين اتنين متجوزين وهية المتعة وانا مش بتكلم كلام عيب على فكرة انا بتكلم في حاجة احلها الله بين اي زوجين
.. يا إما حالة من الجهل الجنسي فبالتالي بنوصل لنفس النتيجة وهية الفشل في إتمام العلاقة الخاصة بشكل مرضي للطرفين .. وبالرغم من ان كتير مننا نفسه يكمل حياته مع الشخص اللي اختاره إلا ان الموضوع ده اكتشفت انه السبب في حالات طلاق كتيرة جدا والكلام ده مش من دماغي ده من عدد الإحصائيات اللي اتعملت بخصوص نفس الموضوع وفعلا اثبتت ان أكبر نسب من الطلاق كانت بسبب الجهل الجنسي ده بخلاف أسباب أخرى .
طيب .. المفروض دلوقتي نعمل ايه .. نقفل الموضوع من بابه ونقول كالعادة عيب ؟ مع انه أصلا مش حرام ولا عيب لإن ربنا مش هيخلقلنا حاجة عيب ولا ايه ؟
ولا هنبدأ نتناقش بشكل علمي وبجد يمكن نقدر نوصل لحلول ولو مبدئية لضمان استمرار الحياة الزوجية ؟ .. وياريت ما ننساش حاجة مهمة .. ان الحياة الزوجية اللي فيها مشاكل من النوع ده عمرها ما كانت سليمة في باقي تفاصيل الحياة اليومية العادية ولا كانوا اصحابها سلام أصلا .. ركزوا كده وهتلاقوا كلامي صح .. وعلى فكرة تاني .. الكلام ده برضه للستات والرجالة .. اللي هيطلع يقول ايه قلة الأدب أو غيره هيبقى أول واحد عنده مشكلة جنسية حقيقية .. فكروا في الكلام الأول بعدين ردوا وماننساش كمان أن الرسول عليه الصلاة والسلام كان بيتكلم في الأمور دي عادي لأن ده حق البشر عليه انهم يعرفوا ويتعلموا أصول التعاملات الزوجية لأن بالقطع كان وارد يحصل فيها مخالفات كتيرة بين الزوجين .. أدعوا الله ان الرسالة بمعناها المحترم والشرعي والمهذب يكون وصل .. والسلام عليكم.