يوسف عزت يكتب: لو تختفي

آه يا لو لو شوية تختفى
دايما بتزودي همى
ولأملي الباقي بتصرفى
تعكنيني وحالي ومزاجي تقرفي
سبيني أقعد اتكلم مع نفسي شوية
مش يمكن اتشفي
آخد وادي في الكلام ساعة روقان
مش يمكن اصطفي
ليه غاوية ترجعيني للفات
وتخلي عقلي وقلبي في سكات
وفاكرة أنك لما تيجي بيكي هحتفي
دايما مصاحبة جملة
ياريت اللي جرى ماكان
أو اللي ماكنش كان جرى
مشكلتك ان غباء الماضي بتكشفي
ياما قبل ال لو كنا فاكرين أننا بنكسب
وياما بعد ال لو أدركنا أننا بنخسر
وياما حاولنا نتفادى ال لو لكن
ناخد علقه الضمير ونتحسر
عمرك يا لو ما اتوجدتي في مكان وتشرفي
آه يا لو لو بس تعرفي
نفسي ييجي اليوم وللأبد تختفي