المصري في بلده مواطن بالعافية

السلام عليكم
أستاذة نيفين مساء الخير ... أنا كنت الشهرين دول في امريكا لظروف علاج وعايزة أقولك وأقول لكل القراء يا جماعة مصر مافيهاش لا علاج ولا مستشفيات ولا تمريض ولا دكاترة كمان !!! مش قادرة اوصفلك الدنيا جوة مستشفى عاملة ازاي حاجة تطول العمر مش نطلع منها مكتئبين زي هنا !!! اكتشفت اننا في بلدنا بنتعامل اكننا مواطنين درجة مية مواطن على ما تفرج او بالعافية والدراع ... ايه اللي إحنا فيه ده ؟!! في رأيي إحنا محتاجين الف دهر عشان يادوب نسمع عن الضمير .. الف سنة عشان يادوب نفهم ... واكتر منهم عشان نتعلم فائدة وقيمة الضمير اللي بنربح منه اكتر من اللي البعض بيربحوه بشغل التلات ورقات والفتاوي المضللة وحط المناخير في اللي لينا فيه واللي ما لناش ... أمنية حياتي نبقى بني أدمين وتعامل على الاساس ده ... عايزة أقولك اني عملت فحوص طبية دقيقة جداً في مصر والتشخيص طلع سرطان تخيلي حالتي ممكن تبقى عاملة ازاي ... طيب أنا والصدفة لعبت دورها وحظي الحلو بعد قدر ربنا خلاني اقدر أسافر عشان اكتشف هناك ان معنديش سرطان اصلا والحكاية في منطقة صحية مختلفة تماماً ... تخيلي بقى الناس اللي مش قادرة تسافر وبدأت بالفعل في علاج للسرطان دول كان حالهم هيبقى ايه ؟ معقوله الكلام ده معقول وصلنا للدرجة دي .. عليه العوض علينا وفينا وحسبي الله ونعم الوكيل
اسماء محفوظ