بالصور.. أدمن صفحة "شاو مينج بيغشش ثانوية عامة" يحرض الطلاب على خطط جديدة للغش

نشرت صفحة "شاو مينج بيغشش ثانوية عامة" العديد من الخطط التحريضية الجديدة، التي هدفها تقديم خطط جديدة لطلاب الثانوية العامة للنجاح في الغش.
ونشر أدمن الصفحة الخطة الأولى ونصها: "موش عارف تطلع الموبايل تغش؟ بسيطة، سماعة بلوتوث صغيرة تقدر تحطها في قبضة يدك قبل ما تدخل اللجنة.. اعمل Connect للسماعة للموبايل، واعمل بعدها بلوتوث الموبايل مخفى، وخبى الموبايل إنت بأه براحتك وخليه Vibration عشان تحس بيه، وطبعا يكون ليك واحد صاحبك بره اللجنة أودام صفحتنا كل ما تنزل الإجابة يمليهالك بالراحة ويعيدها مرة واتنين و5 كمان، وإنت كل اللى عليك تكون السماعة في حتة سهل تطلعها منها مثلا جيب القميص أو جنب الحيطة أو في منديل.. اتعامل إنت بأه".
وأضاف الأدمن: "ووقت ما الموبايل يتهز دوس ع الزرار اللى في السماعة وحط إيدك على خدك أو جنب ودنك كأنك ساند واسمع الإجابة، أو تخبى الموبايل في أى حتة في اللجنة وتعمله صامت بس تفتح مكالمة قبل ما تدخل مع اللى معاك بره، وهو يكون على الصفحة هنا وأول ما يسمعك بتكح مثلا أو بتستغفر ربنا يقولك ع الإجابات اللى معاه، وطبعا تتفقو على علامات بينكو سهلة، مثلا تقرب إيدك من بؤك وفيها السماعة وتكح، أو تستغفر ربنا، أو تقول هاااااااااااح.. اخترعوا إنتو بأه حاجات متتقفش".
كما نشر أدمن الصفحة الخطة الثانية ونصها: "ماعرفتش تعمل الطريقة الأولى #بسيطة.. خلى موبايلك معاك ولو نوكيا 1200
انزل الحمام بس على الأقل بعد نص الوقت، واتصل بزميلك وخد منه الإجابات، وطبعا هتكون مخبى معاك قلم زيادة غير اللى بتكتب بيه، وبقول #مخبى لأن ممكن حد ياخده منك، وعلبة المناديل وده حقك عشان تنشف وكده فموش لازم تخبيها، لما تتصل وإنت في الحمام وهو يمليك الإجابة بسرعة اكتبها ع المنديل وحطه في جيبك، وإنت طالع إغسل إيدك ووشك واخرج وانت ماسك منديل تانى وبتنشف، وحط المنديل اودامك على التختة، وبراحة طلع منديل الإجابات وعييش وخلى بالك".
وأضاف: "وممكن تطلع موبايلك وتكون فاتح النت على الصفحة وتنقل منها، بس دى طريقة هتاخد وقت ومجهود شوية "طريقة تعبانة يعنى"، وبخصوص الجهاز بتاع التفتيش ع الموبايلات، فيه طريقة شغالة، شيل البطارية من الموبايل وهو موش هيصفر ولما تطلع لجنتك حط البطارية وافتح موبايلك بسرعة وظبط حالك، وغالبا الجهاز بيعتمد على الإشارات اللاسلكية للموبايل في الكشف عنه".