عارف اننا بدأنا مع بعض واتجمعنا على هدف واحد وعلى الرغم من كدا لمجرد اختلاف فى الرأى كتفه مبقاش جنب كتفى !! عارف اننا غلطنا نفس الاخطاء ؟ بس انا دلوقتى مش عاوز اغلط تانى !! فاكر لما نزلنا وقولنا عيش حرية عداله اجتماعية وفرحنا لما مبارك مشى والمجلس العسكرى مسك الحكم وقولنا الامل اهو قدامنا .... واتضحك علينا .. فاكر . فاكر مجلس الوزراء ومحمد محمود .. طب فاكر ماسبيروا وست البنات طب فاكر لما اتخونا وقالوا مفيش خرطوش وقالوا ايه اللى وداها هناك ؟؟ ... فاكر هما كانوا فين وبيعملوا ايه مع العسكر فى الوقت اللى شوهوا فيه كل ولد وبنت قعدوا فى الاعتصامات ؟!! فاكر لما قولنا يسقط حكم العسكر قالوا عننا خونه وضد الجيش ؟ .. عارف لما بنقول يسقط حكم العسكر بتاعتنا غير يسقط حكم العسكر بتاعتهم ؟!! وعلى الرغم من دا كله يا صاحبى نزلنا وانتخبنا محمد مرسى فى الاعادة وعصرنا لمون !! عارف عملنا كدا ليه لان المبرر الوحيد وقتها ان شفيق مينفعش يبقى هو الرئيس وعيب فى حق الثورة . فاكر لما نزلنا نهتف يسقط الفلول وحشدنا كمان لمحمد مرسى ؟!! ... على الرغم من كل اللى حصل من خلافات لكن قدرنا نعديها وننتخب محمد مرسى عشان الثورة تنجح !! انا عارف انك فاكر كل الكلام دا ..بس عارف بقوله ليه دلوقتى ؟ ... استنى هتعرف اصبر لسه جاى كتير . وقت دستور الاخوان اعترضنا على تشكيل اللجنة ومحدش سمعنا اعترضنا على طريقة عملها ومحدش عبرنا وقفنا ضد اسلوبها محدش شافنا ... واتسلق الدستور ... ونزلنا نحشد الناس تقول لا .. عشان اكتر من 35 مادة ودستور مهلهل وغير مترابط ودستور ومن افسد الدساتير فى العالم وطلعوا قالوا قولوا نعم للدين ومؤتمرات وندوات وطبعوا ملايين النسخ وحشدوا الناس كويس جداااا وخونونا كويس جدااااا - ودا بيحصل دلوقتى عارف متقلقش- بس برضو مخوفناش ونزلنا . فاكر لما نزلنا عملوا معانا ايه ؟!! فاكر ايه اللى حصل واتضربنا وفى الاخر .. موتوا بغيظكم . وعدى الدستور .... عارف انك زهقت من كتر الكلام ونفسك تعرف انا بقولك دا كله ليه مع انك عارفه بس استنى لسه عندى كلام ليك .. هو مش حقى عليك تسمعنى ؟! فاكر لما نزلت عشان توصل رسالتك لمجلس الشعب المنتخب وشباب الاخوان وقفوا قصادك وضربوك .. طب فاكر الاتحادية وجمعة كشف الحساب وغيرهم ؟! خلاص كويس انك منستش التاريخ دا كله . بس تفتكر فى التاريخ دا كله احنا غلطنا كاااام مرة وكنا سبب اساسى فى انحراف الثورة عن مسارها ؟؟ .... اعتقد انك عارف الاجابة وهتجاوب بسرعة . مش هكلمك عن رائيك فى الدستور ورائى فى الدستور او انا هقول نعم وانت هتقول لا لان اكيد كل واحد مننا ليه وجهه نظره اللى لازم التانى يحترمها وانا مش عاوز اقنعك تقول نعم لاااا انا عاوز اعرفك حاجة الدستور دا يعنى عقد والعقد اساسه طرفين لكن فى الدستور اكتر من طرف لانه موجود فيه اطراف الدولة كلها بكل مؤسساتها وكتابه الدستور هى تفاوض بين كل الاطراف دى عشان توافق على بنود العقد ابسط حدود قواعد التفاوض هو كيفيه الحصول على اعلى مكسب ممكن ومفيشش حاجة بلوى الدراع بالبلدى يا صاحبى اخد الحق صنعه . عارف اننا فى التفاوض دا اخدنا اكتر من 98 % من المكاسب اللى عاوزينها ومع الوقت نقدر ناخد ال 2 % الباقيين . تيجى مره واحدة منغلطش ونلعب صح ؟ !! خايف من الفلول ؟ ... طب عملت ايه عشان ميرجعوش نزلت الشارع ؟ حد يعرفك فى الشارع ؟ رصيد كام عند الناس ؟ لو نزلت تحشد الناس تقدر تحشد كام لصالحك ؟ وزنك ايه عند الناس ؟ .. بعد 3 سنين وداخلين الرابعه ... سألت نفسك احنا ايه او احنا مين فى الشارع ؟ ... فكرت تحلل نتايج اى استفتاء حصل او اى انتخابات حصلت ؟ مقدرتش يا صاحبى ولو قدرت يبقى تيقنت من حقيقة عجزنا انا عارف ان انا عاجز وبقول .. انا عاجز .. انت بقى عارف ؟
