خد خطيبتي مني.. اعترافات قاتل صديقه في الجيزة| خاص

ينشر موقع صدى البلد على نص اعترافات قاتل صديقه في الجيزة، في القضية التي حملت رقم 8584 لسنة 2024 جنايات قسم أوسيم، والمتهم فيها حسام صابر خليل باستدراج صديقه إلى منطقة زراعية في البراجيل بالقرب من محور الضبعة في الجيزة.
كان وسط ناس بتشرب مخدرات.. كواليس حادث أحمد فتوح لاعب الزمالك
دولارات.. أمن الجيزة يكشف لغز سرقة فيلا خالد عجاج
نص اعترافات قاتل صديقه في الزراعات ب الجيزة
وقال قاتل صديقه في الجيزة، اللي حصل بالظبط أني كنت خاطب واحدة اسمها رحاب رشدي من 3 شهور بداية شهر 12 اللي فات ده عالطول والعلاقة ما بينا كانت كويسة جداً لغاية ما شهر 2 اللي فات ابتدي لقيت تصرفاتها معايا أتغيرت وطريقتها ما بقتش حلوة خالص وتكدب عليا في حاجات كتير، وساعات أقولها أروح معاكي في أي مكان ترفض مش زي الاول معايا وابتديت الشغل مع سيد بريك في المغسلة قعدت معاه في فرح واحد من فترة كبيرة لغاية ما سيد بريك قالي تشتغل معايا في المغسلة.
وتابع المتهم "قولتله تمام أنا هشتغل معاك وفعلا ابتديت الشغل وأنا كنت خاطب وكنت بحكيله كل حاجه عني أنا ورحاب رشدي لما يكون ما بينا مشكلة، لغاية الأسبوع اللي فات لما ابتدا قبل شهر ، عالطول لقيت سيد بريك صاحب المغسلة بيقولي رحاب خطيبتك رافعة بوست علي الفيس بوك بتقول فيه ( تم بحمد لله فشكلة خطوبتي أنا أستغربت جدا من طريقته معايا وقتها، وبعدها لقيته يوم السبت الموافق 2024/3/2 واحنا الصبح ليه كنا فاتحين المغسلة علشان تبدأ شغل، لقيته بيقولي أنا رايح مع رحاب رشدي مشوار علشان هيا اتصلت عليا، انا استغربت وقتها من اللي بيقولهولي وبعدين أيه علاقته برحاب بالظبط لغايى ما لقيته رجع على أذان العصر في نفس اليوم.
واستكمل المتهم بقتل صديقه في الجيزة فقولتله عملت أيه مع رحاب بالظبط قالي أنا كنت معاها في كذا مشوار وبعد كده خلصنا المشاوير وروحتها البيت وأنا سكت ما ردتيش أرد عليه لغاية ما اليوم خلص وقفلنا المغسلة مع بعض بليل متأخر بعد الساعة العاشرة مساء، فقولتله أنا عايزك في موضوع مهم نتكلم فيه قالي نوصل محمد بشير الأول وبعدين تتكلم في اللي أنت عايزه وفعلا ركبنا المكنة بتاعتي بس سيد بريك هو اللي ساق المكنه، وأنا ركبت من ورا سيد ،عالطول ومحمد بشير ركب ورايا ووصلنا لبيته في قرية البراجيل بس أنا عارف أسم الشارع بتاعه وبعدها وأحنا راجعين قولتله أنت إزاي بتكلم رحاب رشدي اللي في الأصل خطيبتي مش المفروض نستني لغاية ما تنهي الموضوع ده وبعدين تتكلم معاها رد عليا بالظبط قالي بقولك إيه اللي بينكم وبين بعضيكم أنا مليش دخل فيه واللي أعمله ميخصكش يا حسام رديت عليه وقولتله إزاي يعني مش في بينا عيش وملح، لقيته بيرد عليا ويقولي الملح داب والعيش كلته الكلاب فقولتله ده إزاي ده ياريس.
وقال المتهم بقتل صديقه في الجيزة: بعد ما اتخانقنا قام سبلي وشتمني بأبويا وأمي رديت عليه الشتيمة علطول وسبتله قام هو واقف بالمكنة بتاعتي ونزل منها نزلت وراه لقيته بيشتمني تاني قمت قايله أنا اتخنقت منك ومسك فيا من فوق هدومي وأنا مسكت فيه من فوق هدومه وفضلنا ماسكين في بعض لغاية من قوة مسكتي ليه وهو برضه ماسك فيا من هدومي، وقع على الحجر بوشه وأنا وقعت فوق منه بس وشي لضهره قمت عدلته على ظهره لقيت وشه كله جاب دم وبالذات من مناخيره والحجر اللي وقع عليه لقيته برضه فيه دم وقعدت أزق في الحجر الكبير اللي كان موجود على الأرض اللي سيد وقع عليه بوشه لغاية ما الحجر بقى فوق صدر سيد.
وتابع قاتل صديقه في الجيزة، قمت واخد الشبشب بتاعه وحادفه بعيد في الزراعات، وبعد کده حطيت إيدي في جيوبه وأخدت التليفون بتاعه والفلوس وبطاقته ورخصة بتاعة مکنة كده كانت في جيبه، وبعدها ركبت المكنه بتاعتي ومشيت علطول وهو ده كل اللي حصل لغاية ما روحنا نقطة البراجيل وبعد كده مركز شرطة أوسيم وبعد كده لقيتهم من كثر ما الظباط كانوا بيتكلموا معايا وسألوني كتير أوي فرُحت قلتلهم كل حاجه والحقيقة اللي لسة حكيها دلوقتي وجابوني على النيابة النهاردة الصبح وهو ده كل اللي حصل بالظبط.