هاني شاكر ل حمو بيكا: انت طيب وبحبك.. بس الفن مش بالعافية والعياط|فيديو

علّق الفنان هانى شاكر ونقيب المهن الموسيقية على أزمة حمو بيكا مطرب المهرجانات الشعبية، مع نقابة الموسيقيين.
وقال هاني شاكر، خلال حواره مع الإعلامية إنجي أنور مقدمة برنامج "مصر جديدة"، الذي يبث على قناة ETC ، مساء أمس الأربعاء: "اللي اتعمل مع حمو بيكا متعملش مع أي حد ولا شاكوش ولا عمر كمال".
وأضاف هاني شاكر: "جبناله مدرس مخصوص عشان مخارج الألفاظ وعشان يغنى صح وراح مرة واحدة، وتراجعت عن تنفيذ حكم بحبس حمو بيكا، لمدة عامين، وكتر خيرك دعيت عليا خلال شهر رمضان وأنا عمري ما أذيتك".
وتابع هانى شاكر: "هو طيب وأنا حقيقى بحبه.. بس الفن مش بالعافية ومش بالعياط".
وأوضح هانى شاكر :"تاريخ حمو بيكا واغانيه فى البداية شئ مخذل وكلنا بنتبرأ منها وجتلك فرصة مرة واتنين والمرتين سقطت ".
وأختتم هانى شاكر:"ولو احنا فى بينا وبينك حاجة كنا نفذنا حكم الحبس وانا أعضاء المجلس بنراعى ربنا ومش بنحط حد فى دماغنا ".
حمو بيكا : سيبونا نشتغل فى بلدنا
طالب مؤدي المهرجانات حمو بيكا بعودته للغناء فى مصر وحصوله على تصريح من خلال بث مباشر عبر صفحته بموقع التواصل الاجتماعي فيسبوك .
وقال حمو بيكا من خلال البث المباشر :" ليه تمنع الفرحة من على وشوش الناس وحشونى صحابى واخواتى وكل حاجة فى مصر ،أنا بقالى شهر عدى عليا كأنه 100 سنة برا مصر ، مصر أم الدنيا وهتفضل بخير, سيبونا نشتغل جوه بلدنا، أنا هنا شغال بس مش بحس بطعم النجاح غير فى بلدى مصر".
وأضاف حمو بيكا :"الحمدلله عندى حفلات فى دبى وتركيا ولبنان تكفينى سنة ،انا طالع افضفض معاكوا شوية مش زعلان ان انا مش شغال فى مصر ,انا زعلان انكو حرمتوا جمهورى منى , كل اللى طلبه سيبونى اشتغل زى زمايلى كل مطربين المهرجانات والراب خدوا الكارنيهات مفضلش غيرى".
وتابع حمو بيكا :"بلاش تقفوا فى طريقنا , مش مبقاش فى العمر غير حاجة بسيطة ومفيش حاجة دايمة غير السيرة الطيبة وسيبوه الملك للمالك وبلاش تقطعوا فى أرزاق الناس الحياة صعبة وسيبوه الناس ترزق ربنا اللى بيقسم الأرزاق ".
واكمل حمو بيكا :" الرزق بيتاخد منى فى مصر , ربنا جبلى رزق فى مكان تانى فى مكان محدش بيقول فيه ممنوع , فى نقابة هنا فى دبى بس محدش بيقولك انت ممنوع ولا متشتغلش ".
وأوضح حمو بيكا :" هنا الناس بتقدر الفن وكل واحد فى حاله اللى عايز يشتغل يشتغل والخير هنا كتير وفى بلدنا الخير اكتر سبونا نرزق ".
وأختتم حمو بيكا :" رسالة لأمى وحشتينى وربنا ميحرمنى منك واخواتى وحشتونى وزوجتى ووش الخير هى حاليا معايا فى السفر وبلاش تتنمروا على حد ".