لوسي في ندوة صدى البلد: شيلت حواجبي بالموس عشان أظهر زي الشيطان.. كرهت شخصيتي في انحراف.. وأنا صريحة ومبحبش اللون الرمادي

حلت النجمة لوسي، مع نجوم وصناع مسلسل انحراف، ضيوفا على موقع صدى البلد الإخباري، في ندوة صحفية، للاحتفال بالنجاح الكبير الذي حققه المسلسل في الموسم الدرامي الرمضاني لعام 2022.

لوسي لصدى البلد: شيلت حواجبي بالموس عشان أظهر زي الشيطان بمسلسل انحراف
وقالت النجمة لوسي، إنها تلقت مكالمة من المخرج رؤوف عبد العزيز، يعرض عليها المشاركة في مسلسل انحراف، وعلقت: «أنا اعرف اسم المخرج رؤوف عبد العزيز، وانه ما بيقبلش أي ورق ولا أي ممثلين أو ممثلات، وأعماله ناجحة، لكن ما كنتش أعرف صوته، ونجاح المخرج يحط مين من الممثلين وفين وليه».
وأضافت لوسي خلال ندوة موقع صدى البلد الإخباري: «المخرج رؤوف عبد العزيز قالي إن عنده 5 حلقات لي، فأنا اتاخدت، فقولتله الموضوع ايه، فأجاب أن الموضوع صعب ويحتاج ممثلة تقدر تعمله، وكان يتحدث بجدية وثقة في انني سأوافق على الدور، وبعد 5 دقائق من المكالمة ولما عرفت ان روجينا هي البطلة قولتله أنا موافقة، فقالي أنا جايلك النهاردة».
وتابعت لوسي: «قولت للمخرج رؤوف عبد العزيز، أنت بتتكلم على رمضان اللي بعد 10 أيام، هتعمله ازاي، فقالي ما تقلقيش ده شغلي، المهم جالي وحكالي عن دوري في المسلسل وهي أم الشيطان فوزية، فقولتله أنا محتارة وعاوزة أعمل البوستر بشكل تاني غير فوزية، فحطيت باروكة شيك، وادينا لمسة للتساؤل هل دي واحدة بلدي أو افرنجي، وكل ده حصل في 5 أو 6 ساعات».
وتابعت لوسي: «سألت المخرج رؤوف عبد العزيز، انت شايف فوزية ازاي يا أستاذ، قالي هي واحدة مفترية وعايقة والمكياج ما بتشيلهوش، بس أنا كنت بشيل المكياج وأنا نايمة لأني من المدرسة دي، وبعد فترة من التحضير استقررت على الباروكة اللي معمولة بالأكسجين».
وأوضحت لوسي أنها كانت حريصة على تقديم شخصية فوزية في مسلسل انحراف، بطريقة غير فجة، وأخدتها بهدوء مع المايسترو رؤوف عبد العزيز، وأنا قولت المايسترو لأنه من غير ما يشاور بعصايته لازم يكون في المسلسل قائد يقود مشاعرك وأحاسيسك اللي انت مش عارفها، وأنا تجرأت وشيلت حواجبي بالموس عشان اظهر بشكل الشيطان في أحداث المسلسل».
وهنا توقف المخرج رؤوف عبد العزيز، ليكشف تفاصيل جرأة لوسي في إزالة حواجبها بالموس، قائلا: «أنا في نطاق التحضير للشخصية بكون حابب أعيش الممثل جوة الشخصية، وده مارسته مع لوسي ، اللي اتجهت بقوة ناحية الدور وبدأت تتعايش مع الشخصية وتفكر بتفكيرها، لحد ما تفاجأت وأنا رايحلها وهي بتقولي بص بقى أنا شيلت حواجبي بالموس، وأنا كنت عايزها تعيش جوة الشخصية بس مش للدرجادي، لكنها بررت ذلك بأنها تريد عمل حواجب خاصة بشخصية فوزية».
وأضافت لوسي، قائلة: «ده مش جديد عليا لأني كنت بشيل حواجبي وشعري في فوازير رمضان علشان اجسد الشخصيات بشكلها الطبيعي، وأنا جريئة في الحتة دي، وممكن البس حاجات عشان تبين جسم الشخصية بشكل مختلف والشكل بيساعد على الأداء».
كرهت شخصيتها في مسلسل انحراف.. لوسي: بتعامل مع التمثيل بقلبي
قالت النجمة لوسي انها كانت غير راغبة في تصوير مشهد المرآة خلال كواليس مسلسل انحراف، وعلقت قائلة: «في مشهد أنا ما كنتش عاوزة أعمله وهو مشهد المراية، وقولت للمخرج رؤوف عبد العزيز الشخصية في المشهد ما يتعيطش، وأنا بحب أتعامل مع الشخصية بكل قلبي».
وأضافت لوسي في ندوة صحفية بموقع صدى البلد الإخباري: «أنا بتعامل مع عربيتي بقلبي لما يكون المشوار طويل بقولها قربنا نوصل، ولهذا السبب قررت أن أصور هذا المشهد من كل قلبي»، وأشارت إلى أنها استقرت على شكل شخصية فوزية مع المخرج رؤوف عبد العزيز، فهي سيدة تظهر بكامل أناقتها ومكياجها، وبحوزتها مطواة ومخدرات لترمي بلائها على الناس، فهي سيدة سيئة من تلقاء نفسها وتكوين شخصيتها.
أوضحت لوسي أنها كرهت شخصية فوزية رغم أنها لا تكره أحد، وعلقت: «أنا في الطبيعي لا تكره أحد لكني كرهت شخصية فوزية في مسلسل انحراف».
a href="/5256892" title="جلسة تصوير خاصة للنجمة لوسي في صدى البلد على هامش ندوة مسلسل" انحراف"|شاهد"=""
جلسة تصوير خاصة للنجمة لوسي في صدى البلد على هامش ندوة مسلسل"انحراف"|شاهد
لوسي لصدى البلد: وافقت على مسلسل انحراف بسبب روجينا
لوسي ل صدى البلد: عشقت العمل مع المخرج رؤوف عبد العزيز
قالت النجمة لوسي، إن مشهد قتلها في مسلسل انحراف، استغرق ساعات طويلة للتصوير، مشيرة إلى أنها عشقت العمل مع المخرج رؤوف عبد العزيز وباقي فريق العمل.
وأضافت لوسي خلال ندوة موقع صدى البلد الإخباري: أنا فضلت من الساعة 8 مساء لحد 2 ونصف صباحا لابسة وحاطة المايك في رجلي وكنت في مكان وهم في مكان، وأنا ما بحبش أحط ديكوباج للمشهد لأن ده عمل المخرج الذي يخرج العمل».
وتابعت لوسي: «اللي حواليا من ماكيير ومساعدين بدأوا يحسوا اني بدأت أقلق بسبب مرور الساعات، لقيتهم بيسلوني اللي تقوم ترقص واللي تشغل كليب من بتوعي، بعدها حسيت بالزهق وخلعت ملابس التصوير وارتديت ملابسي».
وأضافت لوسي: «المهم بعدها أخدوني للمخرج رؤوف عبد العزيز، لقيته بيقولي انتي يرضيكي الديكور اللي أنا بعمله والإضاءة دي بقالي 4 ساعات وعايزة ما تصوريش، فقولتله أنا رايحة ألبس، بس مش هقدر أعمل المشهد زي ما انت عاوزه، فقالي اتفضلي روحي، قولتله شكرا».
وتابعت لوسي، قائلة: «خرجت وأنا ببص للديكور والإضاءة دي وأنا متقطعة بس ربنا هو اللي بيسبب الأسباب والمشهد اتعمل اكتر من رائع، وأنا عاوزة أشكر المخرج رؤوف عبد العزيز، والمؤلف مصطفى شهيب، وكل كرو العمل».
لوسي: أنا شخصية صريحة ومبحبش اللون الرمادي
حكت النجمة لوسي، كواليس مشاهدها مع الفنان رامي الطمباري، خلال مسلسل انحراف، الذي تم عرضه في الموسم الدرامي الرمضاني الماضي.
وقالت لوسي خلال ندوة موقع صدى البلد الإخباري، انها تفاجأت بشخص بجوارها بملابس مهلهلة وشكله غريب، فسألت عنه، فعلمت أنه هو الذي سيلعب دور زوجها دبور في الأحداث، فقررت الاقتراب منه والتعرف عليه.
وأضافت لوسي: «قربت من رامي الطمباري، وقولتله احنا كان لازم نعرف بعض أكتر من قبل كده»، مضيفة إلى أنها شخصية صريحة، قائلة: «بحب أقول على الأبيض أبيض والأسود أسود، لكن اللون الرمادي ده أنا ما بحبوش».
لوسي تخضع لجلسة تصوير في صدى البلد
خضعت النجمة لوسي، لجلسة تصوير خاصة لموقع صدى البلد الإخباري، على هامش ندوة مسلسل انحراف، الذي تشارك في بطولته، وهو بطولة النجمة روجينا، وإخراج رؤوف عبد العزيز.