عايزين جيوب الناس تتملي بأفكار وبجهد.. أبرز تصريحات السيسي بأسبوع افتتاحات الصعيد

شهد صعيد مصر افتتاح عدد من المشاريع التنموية الكبرى، بدأها الرئيس عبد الفتاح السيسي الأربعاء الماضي 22 ديسمبر ، من محافظة أسيوط، وتوالت الافتتاحات حتى وصلت محافظة أسوان أمس، فيما عرف بأسبوع الصعيد.
ويرصد "صدى البلد" في هذا التقرير أبرز ما جاء من تصريحات على لسان الرئيس السيسي خلال أسبوع افتتاحات الصعيد، التي بدأت بمصنع تكرير البترول بمحافظة أسيوط وانتهت بمشروعات تنموية بأسوان.
تصريحات السيسي بأسوان
شهد الرئيس السيسي، الثلاثاء، افتتاح مصنع اليوريا ونترات الأمونيا بمنطقة كيما بمحافظة أسوان احد أكبر المشاريع التنموية والصناعية لإنتاج أسمدة "الأمونيا – واليوريا" في مصر وتحدث السيسي خلال الافتتاح في بعض الأمور منها:
مش هعين حد من صحابي
تحدث الرئيس السيسي عن الإدارة الجيدة في المصانع، قائلاً: "أنا مش هعين حد في المصنع ملهوش لازمة لمجرد إنه قريبي ولا صاحبي ولا من معرفتي.. ده خطر كبير"
وأضاف السيسي: "الإدارة الجيدة لن تأتي إلا بمشاركة القطاع الخاص، لأنه بيدفع بفلوسه بقى فهيشتغل".
وتابع الرئيس السيسي: "الكلام ده ممكن يزعل مني العاملين في قطاع الأعمال، لكن أنا بتكلم في مصلحة أكبر من الشركة، أنا بتكلم عن مصلحة بلد".
وواصل: "بتكلم إن البلد ديه تعيش وتكبر، وإن المواطنين اللي بيعملوا داخل مصنع يعيشوا ويقبضوا، وتكون المصانع دية أداة في رفاهية المجتمع".
هقدم دعم مادي للفلاحين
وأمر الرئيس السيسي وزير قطاع الأعمال ، الدكتور هشام توفيق ، والمسؤولين بإمكانية تحويل الدعم المقدم للفلاحين عن طريق " شكائر " السماد ل دعم نقدي ، قائلا : " ياجماعة حولوا تحولوا الدعم المقدم لفلوس تتحط بدل الشكارة والاتنين للفدان عشان أحرر وأمنع الفساد المحتمل في إدارة المنظومة".
وأضاف الرئيس: "التجربة قابلة للتصويب وده مش معناه ان اللي قبلنا كانوا وحشين بس التجربة قالت أنها لازم تتصلح .. نصلحها ولا نقعد نتفرج عليها".
وتابع السيسي: "كلموا الناس زي منا بكلم هتلاقوا الناس معاكم عشان الناس عاوزة المصلحة".
دعم مشروع تربية البتلو
وقال الرئيس السيسي لوزير الزراعة، تعليقا على شرحه لمشروعات الوزارة في دعم مشروع " البتلو: "أنت اللي بتستفزني، أنا عايز أقولكم على حاجة أنا قلت قبل كده اللي عنده رأس ماشية بتجبله 5 كيلو لبن و6 كيلو وبأكلها نفس الأكل اللي بيأكلها رأس ماشية تجبلي 30 كيلو لبن يبقى بيظلم نفسه".
وأضاف الرئيس: "عاوز أقول للناس اللي بتسمعي اسمعونا يا أهل الزراعة إحنا مهمومين بيكم أوي وبناخد القرار ".
وتابع: "عايزين جيوب الناس تتملي بأفكار وبجهد، وجع قلب ليكم أنتم، لكن أحنا حد فينا وزنه هيزيد بالكلام ده هنخس كلنا وهنصفي".
أنا عايز الإجراء يوصل للناس
وجه الرئيس السيسي كلمة لوزير الزراعة والمسؤولين، قائلا: "يا دكتور مصطفى أنا عايز الإجراء يوصل للناس مش الرسايل اللي بنقولها".
وتابع الرئيس: "اشتغل وحط برامج مع المحافظين والكلام لحد ما يقولك انزل شيل الفدان قصب وحط الشتلة عشان الفرق هيعوض، ساعدني".
مشكلة تطوير السكة الحديد
قال الرئيس السيسي لوزير النقل اللواء كامل الوزير: "أنت تقريبا اللي اتعمل منذ عام 1952 وحتى عام 2010 في خمسين سنة تقريبا تلت مرات بالنسبة للجرارات ومرتين بالنسبة للركاب ومرة وعشرين في المية بالنسبة لعربات نقل البضائع في ستين سنة ولما بقول الكلام ده بحطه قدامكم عشان تعرفوا حجم المشكلة والدنيا اتغيرت يا كامل بس احنا مقدرناش نواكب ده معاهم".
وتابع الرئيس: "ليه اللي قبل مننا كانوا في الخمسينيات والستينيات كانوا قادرين يعملوا كده ويطوروا .. ليه ياكامل ؟ .. قول الحقيقة .. انا هقولها بمنتهى الوضوح التسعير .. الخط لو بياخد 5000 جنيه عشان يتحرك أنا باخد 1000 جنيه وأفضل ادعمه وسأتحمل معاه لحد ما ينهار".
حوار السيسي وكامل الوزير
قال المهندس كامل الوزير، وزير النقل، إن محطة أسوان في ديسمبر عام 2016، كانت بها العديد من التكسيرات، معقباً: "السياح كانوا بيمشوا يقعوا فيها على الأرصفة".
وأضاف كامل الوزير خلال كلمته أثناء مراسم افتتاح أعمال التوسعات والتطوير بمصنع كيما للأسمدة بأسوان، أن بعدها اجتمعت مع رئيس الهيئة الهندسية و2 من المقاولين، معقباً: "ومرجعناش للقاهرة إلا بعد تجديدها بالكامل .. واستغرق ذلك شهراً".
وتابع وزير النقل أن ما قاموا به في محطة أسوان خلال الأيام القليلة الماضية، هو بعض الدهانات والتلوين، وإضافة بعض الشاشات، معقباً: "ذلك للمحافظة على المحطات".
ورد الرئيس السيسي قائلاً: "هذا التطوير ليس من أجل السياح فقط، ولكن من أجلنا .. المواطن المصري يستحق .. وأي إنسان أو إنسانة مصرية تستحق".
ووجه السيسي حديثه ل وزير النقل قائلاً: "انتم دفعتوا الفلوس بتاعت التطويرات دية" .. ليرد الآخر قائلاً: "كنت أُطالب من وزارة النقل 44 مليون جنيه ل الهيئة الهندسية .. ولكن وفرولي 40 مليون فقط وضربوا على الباقي .. ولكن الهيئة الهندسية أصرت على 44 مليون جنيه".
وتابع وزير النقل ل الرئيس السيسي: "استسمحك إنها تكون هدية من القوات المسلحة لوزارة النقل وللشعب المصري" .. ليرد السيسي قائلاً: "ده بيقولي إن عليك 75 مليار جنيه".
افتتاح مشروع توشكى الخير
تحدث الرئيس، خلال افتتاحه مشروع توشكى الخير بصعيد مصر، وعلق على شرح الوزراء خلال عرضهم المشروعات، ومن أبرز ما جاء على لسان الرئيس:
قال الرئيس السيسي خلال افتتاحه مشروعات قومية بتوشكى: "المواضيع عشان تتعمل متتعملش كده ، مينفعش نقول غير الحقيقة، بدل ما نقول مش معانا فلوس، نقول المشروع مش ناجح، لا المشروع ناجح، وكل الأراضي الموجودة ، حتى في وادى النطرون، والدلتا تصلح للزراعة، ومش هنحط إيدينا على خدنا".
وأضاف الرئيس السيسي، خلال افتتاح المشروع القومي توشكى الخير، أن حائطا صخريا كان سبباً في عدم إتمام مشروع توشكى، حيث تسبب في وقف زراعة 300 ألف فدان خلال ال 20 سنة الماضية، مشيراً إلى أن وزارة الري عندما درست هذا الأمر أيضاً، وجدوا أن هذا يحتاج 3 ملايين طن من المفرقعات.
وتابع الرئيس السيسي موجهاً حديثه ل رئيس الهيئة الهندسية قائلاً: "هترد عليا ولا محتاجين تدرسوا!"، فرد اللواء إيهاب الفار قائلاً: "إحنا لم ندرس هذا الأمر مسبقاً، ولكن من اليوم سنبدأ في دراسة الأمر .. وفي خلال أسبوع سيتم الرد".
وواصل السيسي: "لكن كلها على مياه الآبار فقط .. فلما حبينا نعظم الزراعة اللي عندنا ونعظم استخدامنا للمياه .. وجدنا إن البرنامج ضخم جداً .. هل أنا أقدر أقول للمستثمر تعالى إعمل محطة معالجة تتكلف 20 مليار جنيه! .. مقدرش طبعاً".
وأكمل: "أقدر أقوله تعالى إعمل تأهيل لشبكات المصارف ديه! .. لاء طبعاً .. لأن ده شغل دولة .. وعايزين ننشر ده في الإعلام عشان الناس تعرف توشكى متعملتش ليه قبل كده".
تصريحات الرئيس في قنا
وتوالت افتتاحات الرئيس السيسي، يوم السبت الماضي 25 ديسمبر ، لعدد من المشروعات القومية في صعيد مصر من داخل محافظة قنا وتحدث فيها عن عدد من الامور منها :
أنا عايز أطمن على المنشاءات
قال الرئيس السيسى، خلال كلمته بفعاليات افتتاح عدد من المشروعات بمحافظة قنا: "كان المسار البديل لتوفير المرافق وطرح الأراضي للمواطنين كان عمل المجمعات"، معقبا: "أصل الموضوع مش إنشاءات بس لكن أنا عايز اتطمن إن المنشأ اللى إحنا عملناه وطرحنا أفكار للعمل طبقا لطبيعة كل محافظة".
وأكد الرئيس السيسي أنه يريد أن يطمئن ويقيم ال 825 مشروعا صناعيا منذ عام 2014، قائلا للدكتورة نيفين جامع، وزيرة التجارة والصناعة: "حجم العائد بتاعهم على الناتج المحلي أد إيه، وحجم التشغيل بتاعهم أد إيه".
لماذا لم ينجح مشروع توشكى؟
تساءل الرئيس السيسي عن سبب عدم نجاح مشروع "توشكى" من 20 عاما، قائلا: "لما هنروح توشكى كمان يومين هنرد غيبة ناس مش موجودة دلوقتى، وليه هو منجحش من 20 سنة ونجح دلوقتي؟".
وأضاف الرئيس السيسي، خلال افتتاحه عددا من المشروعات القومية بصعيد مصر: "بقول للناس اللي شغالة في الصناعة إن النموذج اللي بنعمله بنحاول يبقا مواكب للنجاح مع العالم وفي كلام كتير هيتعمل".
معالجة أراضي مجرى العيون
كشف الرئيس السيسي تكلفة معالجة أرض الروبيكي، قائلا: "معالجة أرض مجرى العيون تكلفت أكثر من 3 أو 4 مليارات جنيه، وذلك لمعالجة الأرض قبل البناء".
وأضاف الرئيس السيسي، في كلمته خلال افتتاحه عددا من المشروعات القومية بمحافظة قنا، أن تطوير منطقة الروبيكي تأخر 20 عاما، وكان لهذا التأخر آثار سلبية.
من جانبه، أوضح الدكتور عاصم الجزار، وزير الإسكان، أن معالجة تربة أرض الروبيكي تكلفت 3.9 مليار جنيه، بالإضافة إلى توفير 1007 وحدات سكنية مجانية لسكان الروبيكي.
ولفتت الدكتورة نيفين جامع، وزيرة التجارة والصناعة، إلى أنه سيتم افتتاح ما يقرب من 100 مصنع وعدد من الورش ومعارض ومركز تكنولوجي في منطقة الروبيكي.
توفير الاكتفاء الذاتي بالسوق
أكد الرئيس، أنه يستهدف في المرحلة الحالية توفير الاكتفاء الذاتي للسوق المحلي من المتطلبات، قائلا :" انا بستهدف في المرحلة دي أننا نكفي السوق المحلي من طلباته".
وتابع الرئيس السيسي، خلال افتتاحه لعدد من المشروعات القومية بصعيد مصر: "أنا قولت لما البس قميص من مصر بمستوى زي اللي بره مش أنا وفرت فرصة عمل وعملة صعبة وزودت الناتج المحلي".
وأضاف الرئيس السيسي خلال كلمته في افتتاح عدد من المشروعات القومية: "إحنا مش بنقنن الوضع عشان ناخد منهم حاجة، أوعى تفتكر إن البلد مش عايزة تستجدي ضرائب، إحنا بس مش عايزين حد يغلط".
واستطرد: "إحنا مش بنترصد الغلط والأخطاء، متابعا: "إحنا معاك في المحاولة بس مش معاك في الغلط".
أوعى تعمل كده يا كامل
قال الفريق كامل الوزير، وزير النقل، إن محور كلبشة تكلف ما يقارب من مليار و50 مليون جنيه، متابعا: الانتهاء من إنشاء المحاور سيعمل على تقليل التكلفة وتيسير الحركة على المواطنين والأهالي.
وأضاف "كامل الوزير" خلال كلمته في افتتاح عددا من المشروعات القومية: "التأخر في إنشاء المحاور والكباري سيؤثر بالسلب نتيجة توفير علاوات وتعويضات، ولهذا من الضروري تسريع العمل في المحاور لتكون من سنة إلى سنتين".
وأكمل: الوزارة تعمل على تنفيذ 12 محور في وقت واحد، منهم 9 محاور في الصعيد و 3 في وجه بحري، سيتم الانتهاء منهم في شهر 6 لعام 2023.
واستطرد: تم إنشاء محطة إقليمية في كل مركز من مراكز القطار السريع، ليعلق الرئيس السيسي على حديثه قائلا: "أنا لو عملت كده يا كامل هدخل على الأراضي الزراعية"، ليبادره معلقا: "إحنا مبندخلش على الأراضي الزراعية إلا في حالة إنشاء محاور النيل فقط".
كما ووجه سؤالا ل هاني تادرس رئيس شركة السلام قائلا: "تدخل تعمل الكوبرى بتاع دار السلام هتاخد 25% ولما تخلصه هتاخد الباقي".
تصريحات السيسي بأسيوط
وكانت قد بدأت افتتاحات الرئيس عبد الفتاح السيسي يوم الأربعاء الماضي بافتتاح عدد من المشروعات التنموية بصعيد مصر من محافظة أسيوط والذي تحدث فيها عن:
استصلاح الفدان ب 300 ألف
قال الرئيس السيسي، إنه من المهم توفير وحدات سكنية حتى يتم جذب المواطن للعيش بها وهو ما يستلزم التعاون لإنجاز هذا الأمر موضحا أن الفدان تمنه من 250 : 300 ألف جنيه أي أن المليون فدان تتكلف 300 مليار جنيه.
وأشار الرئيس السيسي، خلال كلمته بفعاليات افتتاح مجمع انتاج البنزين بشركة أسيوط، إلى أن الدولة المصرية تدشن مجتمعات عمرانية لتستفيد بالأراضي الزراعية.
وأشار الرئيس السيسي، إلى أن تدشين المجتمعات العمرانية يواجهها ردود أفعال من المواطن تتمثل فى رغبته بالبقاء بجوار أسرته، لافتا إلى 300 ألف جنيه تكلفة تحويل الأراضى لزراعية وفي هذه الحالة ممكن أن يصل الفدان مليون جنيه معقبا: "في النهاية عايزين نعيش والمواطن بيكون عايز يعيش وأنا كمان عايزه يعيش".
الحكومة تعبت معايا جدا
قال الرئيس السيسي، في حديث للمواطنين: "كل الجرى والتطور اللي بعمله دا اللي بيعاني منه معايا الحكومة، لأنهم أما بيقعدوا معايا مبيعجبنيش حاجة خالص".
وأضاف الرئيس السيسي، خلال إفتتاحه ل مجمع انتاج البنزين بشركة اسيوط: "بقولهم بالمناسبة اللي خلص مش بشوفوا، أنا بشوف اللي ناقص، ومش هفرح أبدا غير إن قدرتوا تخلصوا كل شيء".
حل مشكلة التجمع العمراني
قال الرئيس عبد الفتاح السيسي: "هناك 200 ألف وحدة فى القاهرة، وعلشان إحنا نسيب أهلنا فى الحالة الموجودة فيها القاهرة بالتجمع العمراني دا لا، ودا مش إقتصادي؟، وهنربح منه رضا ربنا ورضاكوا يا ناس".
وفي سياق متصل، تابع الرئيس السيسي، خلال افتتاحه لمجمع إنتاج البنزين بشركة أسيوط: "ادخلوا فى مشروعات أخرى بعجلة الاقتصاد، إحنا مش بنشجعهم بالكلام".
بطاقة تموين لواحد بيتجوز
تحدث الرئيس السيسي عن الزيادة السكانية في مصر، قائلا: "الزيادة هتحتاج توفير مجمعات سكنية ومدارس وطرق ومستشفيات، هل نحن نمتلك القدرة المالية لفعل ذلك؟".
وأضاف "الرئيس السيسي"، خلال كلمته بافتتاح عددا من المشروعات القومية التنموية بمحافظة أسيوط، : "المواطن في الآخر بيقول إنه عايز يعيش واحنا عايزينه يعيش بس لازم يفهم أضرار الزيادة السكانية".
وأردف: يجب أن يكون هناك أرضية فهم مشتركة للواقع وأسبابه وطرح حلول ، مشددا على ضرورة مواجهة ثقافة البناء والتعديات على الأراضي الزراعية، وأيضا ثقافة النمو السكاني.
وتابع: الدولة تعمل على نشر ثقافة التوعية بالزيادة السكانية، من خلال مبادراتها ولكن المواطن يجب أن يساهم في نشر تلك الثقافة، مضيفا: لا يمكن هدي بطاقة تموين لشخص بيتجوز لأنه إزاي بيتجوز وهو مش قادر ينفق على أسرته.