بشرى للشباب.. لميس الحديدي تعلن انطلاق أكبر مسابقة للمشروعات ورواد الأعمال

أعلنت الإعلامية لميس الحديدي عن فتح باب التقديم لأكبر مسابقة تلفزيونية لرواد الأعمال في الوطن العربي، من خلال برنامجها "كلمة أخيرة" المذاع على قناة "on" اليوم الأحد.

وأعربت لميس الحديدي، عن سعادتها بإطلاق هذه المسابقة، مضيفة: "أخيرا وبعد غياب أنا سعيدة إني أعلن اليوم عن فتح باب التقديم لأكبر مسابقة تلفزيونية في الوطن العربي لرواد الأعمال من أصحاب المشروعات والستارتابس".
الفرصة في كلمة أخيرة
وكشفت لميس الحديدي عن تفاصيل المسابقة التلفزيونية الضخمة، قائلة: "ستتيح الفرصة للشباب الذين لديهم مشروعات، لسة بتبدأ انهم يعرضوها قدام ملايين المشاهدين ويدخلوا في منافسة قد تكون صعبة وفيها تحدي ، وهيقابلوا فيها لجنة تحكيم مش سهلة .. لكن هيخرجوا من المنافسة دي -سواء كسبوا أو خسروا - وهم بالتأكيد واخدين دَفعة قوية هاتنقل مشروعهم في حتة تانية.. المسابقة هتكون في شكل حلقه أسبوعيه و الجوائز ستكون كبيره و سنعلن عنها لاحقا".
وعن سبب إطلاق المسابقة، قالت "الحديدي": "ببساطة لأننا نعتقد إن الإعلام له مجموعة من الأدوار .. بينقلك المعلومة و يقدملك لك تحليلها، ويقدملك التسلية لكنه أيضا يضيء الطريق أمام نماذج يمكنها ان تحقق النجاح و يقدم لها الفرصة.. وهذا هو المستقبل، هؤلاء الشباب و هذه الشركات بأفكارها اللي بتحل مشاكل و فيها ابتكارات هي دي مستقبل اقتصاد هذا البلد .. الشباب اللي مش معتمدين علي وظيفه ثابته ، لكن غيروا الطريق و قرروا يقتحموا الصعاب و يفكروا بشكل مختلف،. هم دول المستقبل . والحقيقة أن الحكومه المصرية في رسمها لمستقبل اقتصاد هذا البلد تبحث عن هؤلاء الشباب ، تبني المستقبل عليهم و تدعمهم بطرق مختلفة ، و احنا في هذا البرنامج نريد أن نكون نافذتهم التي يطلون من خلالها علي المجتمع و الناس ، وعلي المستثمرين أيضا اللي ممكن ينقلوهم لمكان اخر.. دورنا اننا نقدم الفرصه لهذا النوع من النجاح الكفاح و ان يصبح عدوي بين الشباب".
وأضافت الإعلامية: "واحدة من أكتر الحاجات اللي بافتخر بيها في مشواري المهني هو إني قدمت أول نسخة من برامج مسابقات لرواد الأعمال .. المسابقة دي أتاحت الفرصة لشركات كانت صغيرة يوم ماتقدمت وبعد المسابقة كبروا بسرعة كبيرة .. مثلا كان من ضمنهم 4 شباب في بدايات العشرينات عرضوا فكرة شركتهم الصغيرة لأول مرة.. الشركة دي أصبحت شركة سويفل اللي وصلت قيمتها بعد سنتين بس ل مليار ونص مليار دولار و طرحت في ناسداك .. أيضا هارمونيكا اللي أصبح التطبيق الأكبر للتعارف في منطقة الشرق الأوسط .. شركة تذكرة اللي قدرت انها ترقمن حجوزات الاتوبيسات في مصر كلها.. وغيرهم كتير جدا من الشباب اللي قدمناهم فرصة عشان يحققوا نجاحات كبيرة . و نتمني النهارده ان هذا البرنامج يقدم الفرصه لشباب جدد و شركات جديدة" .
وتابعت: "النهاردة بنفتح باب التقديم على مسابقة الفرصة في كلمة أخيرة المسابقة إللي بنطلقها بالشراكة مع جهاز تنمية المشروعات ( مسميدا).. و الاستمارة هتلاقيها على صفحة الفرصة في كلمه أخيره على الفيسبوك".
شروط المسابقة
أوضحتها لميس الحديدي كالتالي: "الشركة لازم يكون مقرها في مصر وتكون مصرية بنسبة 51% على الأقل.
أن تكون شركتك ماعداش على تأسيسها أكثر من 3 سنين.
لازم تكون بدأت بالفعل المشروع على الأرض أو على الأقل عندك منتج تجريبي ( بروتوتايب)
أن يكون المشروع بيقدم فكرة جديدة أو حل لمشكلة أو بيخدم الاقتصاد بأي شكل
واحد على الأقل من المؤسسين الممثلين للمسابقة في البرنامج يكون معاه على الأقل مؤهل متوسط".
أما عن طريقة التقديم للمسابقة، فقالت: "ببساطة هاتدخل على صفحة الفرصة في كلمة أخيرة على فيسبوك .. هتلاقي لينك الاستمارة pin to top، وهكتب اسم مشروعك، والمحافظة اللي فيها مقر المشروع .. وبتحدد نشاط المشروع وممكن هنا تختار اكتر من اختيار لو كان مشروعك بيخدم أكتر من مجال .. مجالات المسابقة مفتوحة، ثم بيانات الممثل الرئيسي والشركاء المؤسسين، ثم أوصفلنا فكرة مشروعك باختصار وايه القيمة المضافة اللي مشروعك بيحققها .. المشكلة اللي بيحلها.. الحاجة اللي ماحدش غيره بيقدمها، وايه السوق اللي بتستهدفه؟ ومين هم عملاءك ، ومين منافسينك؟ وايه بيميزك عنهم؟ وإذا كان عندك عملاء حاليين ولا لسة؟ وهل بتحقق إيرادات؟ وفي الآخر بنطلب منك تحط لينك لفيديو مدته ماتزيدش عن دقيقتين بتحكيلنا فيه حكايتك وحكاية مشروعك.
لينك الاستمارة :
https://docs.google.com/forms/d/e/1FAIpQLSeYtzXJ_gqSFL73-4cRQOK-e-dOx0tse2r_9nMf_mejSCP2fg/viewform