سايح في دمه.. تفاصيل مروعة لمقتل موظف بالمرج داخل شقته.. فيديو

رصد برنامج "تفاصيل"، المُذاع عبر فضائية "صدى البلد 2 " ، تقديم الإعلامية "نهال طايل"، تفاصيل جريمة قتل بشعة لموظف بالمرج رميا بالرصاص.

وروى "شقيق الضحية"، تفاصيل الواقعة، قائلا: "كنت أنا أول واحد شوفته.. سمعت الناس بتقول بتاع الصابون مات"، كنت قاعد عند المحل، وأخويا كان بيطلع يوضب حاجته في الشقه ويعمل الصابون للمحل، أول ما طلعت دخلت البلكونة لقته سايح في دمه".

وأضاف: "الخرطوش داخل في وشه وزوره.. وأخدناه وجرينا على المستشفى مكنش بيتكلم، ويعتبر شايله ميت، بس مش بإيدينا حاجه ، كان طافح دم من بوقه، والدكاتره شفطوا الدم ودخلوه الرعاية".

وتابع: "قبل الحادثة كان عندي كنت بعمله شاي شربنا الشاي ومكنش فيه مشاكل ولقينا ناس داخلة بساكسين وخرطوش وبندقية وشماريخ.. واللي ضرب أخويا كان معاه خرطوش".
وقال: "أخويا كان يرجع من الشغل ينام ساعة وينزل المحل بيساعد نفسه على المعيشة، وبقول حسبي الله ونعم الوكيل، هما الطيبين بيحصل فيهم كدا، واللي حصل ميرضيش حد، وأنا عايز حق أخويا".

قتل بالخرطوش.. زوجة ضحية المرج: مش عارفه أقول ل أولادي أبوهم فين..فيديو

رصد برنامج "تفاصيل"، المُذاع عبر فضائية "صدى البلد 2 " ، تقديم الإعلامية "نهال طايل"، تفاصيل جريمة قتل بشعة لموظف بالمرج ضربا بالرصاص.
وعلقت "زوجة الضحية"، على قتل زوجها قائله: "بقوم الصبح أدور عليه في الشقة والشارع مش لاقياه، بقول أنه في حته وهيرجع، بكدب نفسي وبقول هيرجع"، مردفه: "عندي 3 أولاد محمد وعبدالحميد وكريم".

وأضافت: "زوجي كان بيشتغل في البيت وفجأة سمعنا صوت ضرب النار وناس بتصوت طلعنا نشوف في أيه لقينا حسن أخوه منزله على السلم وكله دم"، لافته: "زوجي كان معايا ومكنش فيه أي مشاكل مع أي حد".
وأشارت: "متكلمش معايا في أي حاجه، ومكنش ليه مشاكل مع أي حد، وكل الناس كانت بتحبه، وكان بيقعد مع العواجيز والأطفال، محمود مكنش ليه مشاكل، كان بيجي من شغله ينام ساعتين وبعدين ينزل المحل".
وأوضحت: "شوفنا حسن أخوه نازل بيه كله دم، طلعنا بيه على المستشفى وقعد أسبوع في الرعاية وبعدين توفى"، مؤكده: "كان حنين وكان طيب، وعمره ما زعلني، ومكنش يخليني أنام زعلانه، محمود كان طيب مع الناس كلها".
وتابعت: "نزلت جري على الصويت شوفته ولحد دلوقتي مش مصدقه أنه راح مني، وحاسه أنه في حتة وهيرجع"، لافته: "محمد ابني دائما يعيط ويسألني على باباه ويقولي أبويا وحشني".

وأكملت: "محمود ضحك علينا كلنا ومشي بسرعة، وأنا عايزه حقه وحق عيالي، عايزه حق الأطفال الصغيرين مش عارفه أقول لأولادي أبوهم فين، أنا ضهري عريان مش حاسه بأي حاجه، حاسه أني فاضية".