مخرجة ومؤلفة "سابع جار" لدلال عبد العزيز: "كان نفسي أنام في حضنك"

حرصت المخرجة والكاتبة هبة يسري، على نعي الفنانة الراحلة دلال عبد العزيز بكلمات مؤثرة خاصة وإنهما عملا سوياً في مسلسل سابع جار.

وكتبت هبة من خلال حسابها الرسمي على "الفيسبوك": "صباح الخير...معلش انا رجعت الفيس بوك بس عشان أنعي دلال عبد العزيز وأقدر اعبر عن جزء صغير من اللي جوايا ناحيتها إن ساعدني عقلي وقلبي علي الوصف... شوفت دلال عبد العزيز في عزا من سنين طويلة اوي وهي فضلت تبصلي كتير كأنها بتتفرج عليا وأنا ماشيه عيني جت في عينها كتير وهي مشالتش عينها وفضلت تتفحصني كأنها عايزة تعرف انا مين بصة الأمهات الاستكشافيه المعروفة اللي أحنا بنقول لأمهاتنا ميعملوهاش".

وتابعت قائلة: "اللحظه دي أتأكدت أن هيبقي بيني وبين الست دي حاجه كبيرة، من ساعة ما سابع جار كان فكرة وانا مكانش في دماغي غيرها كأني بكتب الدور عشانها ولما وافقت كنت في منتهي السعادة اول يوم قابلناها فيه وهي بتسألنا بتعملوا ايه والدور ايه سرحت فيها كانت كل حته فيها أمان حسيت وهي قاعدة بتتكلم وتهزر أن انا عايزه اروح انام في حضنها.. بدأت معانا الشغل ولما المسلسل بدأ يسمع مع الناس وثقت فينا اكتر وكانت بتتفاني في كل لقطة بنصورها بتشتغل بحرفة وموهبة وصدق مشوفتهوش في حياتي الشغل معاها هي بالذات ممتع بدرجة أن انا مكنتش مصدقه أن اللي بيحصل ده حقيقي أن الست دي اللي انا حلمت سنين بيها تعمل الدور وتبقي كمان مبسوطه واحنا مبسوطين ..ساعات من كتر ماهي متألقه مبقولش (كت) فهمت كل حاجه فهمت طريقه الشغل بذكاء شديد وافقت على كل حاجه بتطلب منها رغم أنها نجمه كبيرة واحنا بنعمل اول عمل من النوعية دي".
في الجنة ونعيمها.. أحمد سعد يودع دلال عبد العزيز بكلمات مؤثرة
موجز السوشيال ميديا.. مواطن يتبرع بعمرة للفنانة الراحلة دلال عبد العزيز.. بوسي شلبي تستعيد ذكرياتها مع النجوم الراحلين
كما اضافت: "كانت بتجبلنا هدايا لكل الكرو وجابتلي شال وشكرتني بكل حب وطيبه علي المسلسل وانا قولتلها أنه منغيرك مكنتش هفرح ولا المسلسل هيبقي كده.. يوم جالي اوردر فجأة مش محضراه ولوكيشن مشوفتوش في وسط التصوير اللي كان وصل عشرين ساعه لقيتها بتاخدني في حضنها وتطبطب عليه لقيت نفسي فعلا نمت كأني في حضن ماما بالظبط ... يمكن معرفتش اقول كل حاجه بس الست دي أنا مدينة لها بحتة من روحي حتة من حلمي حته من خيالي اللي حققتهولي".

واختتمت حديثها: "فراقك مش مصدقاه يا مدام دلال من امبارح صاحيه شويه اعيط وشويه الدموع تنزل من غير ما عيط ..دلال في الأساس قبلت المسلسل عشان قالت ده رزق اللي شغالين معايا ... صحيح يا ست الكل انتي كنتي رزقنا كلنا ...ربنا يسعدك عنده ويصبرنا علي فراقك يارب اكون عرفت اوصلك انا بحبك اد ايه ومدينة ليكي بأد ايه".