محمود يكتب قصيدة : "قد القسم"

وخلاص خرجت يا مصر وحلفت القسم
وحلفت ان الظلم عدى وانحسم
وحلفت ان المصري ويا المصري واحد
كتفه في كتفه عمره ما في يوم انقسم
***********
لو صاحبي راح او دمي ساح أو قبري قدامي اترسم
هموت شهيد واكون سعيد بإني نفذت القسم
وكفاية ليا ... اجمل هدية ... قالها عليا حبيب ربي في سماه
حاجة أكيدة ... النار بعيدة .... عن عين بتحرس في سبيل الله
***********
كام أب كان قلقان وكان دايما حزين
أسابيع تفوت كان نفسه تخلص كلها
كام أم فارقت ابنها اربع سنين
علشان تشوفه في يوم بيحمي أرضها
يوم التخرج تحضنه بفرحة وحنين
ياخد رصاصة الغدر جوا حضنها
طب كام شهيد ضحى بنفسه علشان تعيش
والدم سال على بدلته واحمر لونها
وكام امين وكام مجند كام شاويش
مهانتش يوم بلده عليه ولا كان يخونها
وكفاية ليا ... اجمل هدية ... قالها عليا حبيب ربي في سماه
حاجة أكيدة ... النار بعيدة .... عن عين بتحرس في سبيل الله
لو صاحبي راح او دمي ساح أو قبري قدامي اترسم
هموت شهيد واكون سعيد بإني نفذت القسم