انفراد.. ننشر نص اعترافات شقيق أكبر تاجر مخدرات بجنوب سيناء

حصل موقع "صدى البلد" على نص تحقيقات نيابة القاهرة الجديدة مع أكبر تنظيم دولي للاتجار في المخدرات بمنطقة الشرق الأوسط.
وننفرد بنشر التحقيقات مع شقيق أكبر مروج للمخدرات بجنوب سيناء والذي اعترف بتفاصيل العمليات وأسلوب تنفيذها ومن يقف وراء التمويل لها وعلاقة شقيقه ونجل شقيقه بإدارة ذلك التنظيم الدولي.
وجاء بالتحقيقات..
ما اسمك ؟ وما عمرك ؟ وأين تقطن؟ وما عملك؟
ج / عبد الله منيفي سلامة - 36 سنة _ مقاول - مقيم الجناين 46 السويس، ولا أحمل تحقيق شخصية.
س/ ما قولك فيما هو منسوب إليك من أنك متهم بجلب جوهري الحشيش والكبتاجون لداخل مصر بغير ترخيص؟
ج/ محصلش والحاجة دي بتاعة على ابن اخويا طلال.
س/ ما قولك فيما هو منسوب إليك من أنك متهم بحيازة جهاز ثريا المحظور تداوله فى مصر بغير إذن وزارة الاتصالات؟
ج/ الكلام ده محصلش والتليفون بتاع على ابن اخويا طلال.
س/ ما الذي حدث إذا وما ظروف ضبطك وإحضارك وعرضك علينا اليوم؟
ج/ هو اللي حصل إن أنا امبارح الساعة خمسة الفجر كنت في بيتي اللي في الجناين مشروع السويس بشارع القناة، لقيت ضباط دخلوا الشقة عندي وفتشوها وملقوش حاجة وسألوني على شقة علي وقلتلهم هي الشقة اللي قدامي، وفعلا كسرو الباب ودخلوا الشقة بس على ماكانش جوه، وطلعوا من شقة علي حتة حشيش وبرشام والتليفون ثريا، وبعد كدا خدوني وطلعوا بيا على مكتب مكافحة المخدرات في السويس وبعد كده جابوني على القاهرة.
س/ متى وأين حدث ذلك؟
ج/ الساعة خمسة فجرا يوم الاثنين 8/5/2017 فى بيتى اللي في شارع القناة بحي الجناين مشروع السويس.
وما سبب ومناسبة تواجدك بالمكان والزمان سالفي الذكر؟
ج/ أنا كنت في بيتي.
س/ ومن كان برفقتك آنذالك؟
ج/ كان معايا مراتي وعيالي.
س/ ومن القائم بضبطك تحديدا؟
ج/ هما كانوا ضباط كتير وفيهم ضابط اسمه محمد سلامة.
س/ وهل تبينت سبب قيامهم بضبطك؟
ج/ هو أنا معرفش بس أول ما فتحت باب الشقة لقيت الضابط بيقولي فين شقة علي وشاورت على الشقة اللي قدامي وقلتله إن دي شقة على.
س/ وهل القائمين بضبطك قاموا بتفتيشك؟
ج/ أيوه فتشوني أنا وما فتشوش بيتي بس هما فتشو شقة علي.
س/ وما هو محل ضبطك تفضيلا؟
ج/ هو العنوان اللي أنا اتمسكت منه هو الجناين مشروع القناة بيت ولاد منيفي بجوار السور وأنا قاعد بالدور التالت شقة 6.
س/ صف لنا تلك العين تحديدا؟
ج/ هو البيت ثلاثة أدوار كل دور فيه شقتين يمين السلم وشقه شماله، وأنا ساكن في الدور الأخير التالت بالشقة اللي على شمال السلم.
س/ وما الذي أسفر عنه تفتيش العين محل سكن المتهم على طلال منيفي سلامة؟
ج/ هما الضباط لما دخلوا الشقة وفتشوها لقوا حتة حشيش وبرشام وتليفونات ثريا ولقوا عنده فلوس دولارات كتير وحوالي 100 ألف جنيه مصري ويورو، وكان في فلوس تانية بس أنا معرفش كام.
س/ وهل شاهدت واقعة تفتيش منزل المتهم على طلال منيفي سلامة سلمى؟
ج / أيوi.
س/ ومن أي الأماكن تحديدا تم ضبط المضبوطات سالفة البيان؟
ج/ أنا معرفش هما طلعوها من الشقة منين بالضبط بس هي الحاجة دي طلعوها من شقة علي.
س/ وملك من تلك المضبوطات تحديدا؟
ج/ هي بتاعة على علشان هما طلعوها من الشقة بتاعته.
س/ ومن له حيازة العين محل ضبط تلك المضبوطات سالفة البيان؟
ج/ هي شقة على ابن اخويا طلال وأنا ساكن في الشقة اللي قدامه.
س/ وما سبب احتفاظ المتهم علي طلال منيفي سلامة بجوهر الحشيش المخدر بالعين محل سكنه؟
ج/ هو على بقاله حوالي سنتين بيتعاطى حشيش وهو كده كده شغال مع أبو طلال في تجارة الحشيش والبرشام.
س/ وما سبب احتفاظ المتهم علي طلال منيفي سلامة بتلك العقاقير المخدرة المضبوطة بالعين محل سكنه؟
ج/ هو علي وأبوه طلال شغالين في تصنيع البرشام من حوالي ست شهور.
س/ وما سبب ضبط تلك المبالغ المالية والعملات الأجنبية بالعين محل سكن المتهم علي طلال منيفي سلامة؟
ج/ هو ممكن تكون الفلوس دي بتاعة شغل المخدرات مع أبوه طلال.
س/ وما سبب ضبط الهاتف المحمول الثريا بالعين محل سكن المتهم علي طلال منيفي سلامة؟
ج/ هو التليفون الثريا ده بيبقى شبكة في الجبل والعرب معاهم التليفون ده عشان بيتكلموا فيه وهنا في قلب الجبل.
س/ وما طبيعة عمل المتهم على طلال منيفي سلامة سلمى؟
ج/ هو على عنده كسرتين سن بس هو شغال في تجارة المخدرات مع أبوه طلال.
س/ وما طبيعة عمل المتهم طلال منيفي سلامة سلمى؟
ج/ هو أخويا طلال شغال في المقاولات بس هو بقاله فترة كبيرة شغال في المخدرات هو وابنه على.
س/ وما طبيعة المواد المخدرة والتي يقوم كلا من المتهمان سالفي الذكر بالاتجار بها؟
ج/ هما بيجيبوا حشيش من ليبيا ويدخلوا عن طريق السلوم والبرشام هما بيصنعوا بس انا معرفش هما بيصنعوا ازاي.
س/ ومنذ متى وسالفي الذكر يقومون بالاتجار في المواد المخدرة؟
ج/ هو طلال بيتاجر منذ 8 سنوات وعلى ابنه منذ سنتين.
س/ وما معلوماتك بشأن اتجار سالفي الذكر في جوهر الحشيش المخدر؟
ج/ هو اللي أنا اعرفه إن هما بيدخلوا الحشيش دة من ليبيا عن طريق السلوم.
س/ وما وسيلة سالفي الذكر في إدخال تلك المواد المخدرة من جوهر الحشيش المخدر؟
ج/ هو اللي أنا اعرفه إن هما بيدخلوا الحشيش بعربيات لاند كروزر نص نقل.
س/ وما هو مسار إدخال تلك المواد المخدرة من جوهر الحشيش المخدر؟
ج/ هو اللي أنا اعرفه إن هنا في مناطق بيبقوا عارفينها فيها ميقات جبلية وبيقطعوا السلك اللي على الحدود مع ليبيا وبيخشوا وبيجروا بالعربيات لاند كروزر في المدقات الجبلية دي.
س/ وهل نما إلى علمك مساعدة ثمة قبائل لسالفي الذكر في إدخال تلك المواد المخدرة عن طريق المسارات سالفة البيان؟
ج/ هو في قبائل عند السلوم بتساعدهم عشان يعدوا الحاجات دي بس أنا معرفش أسمائهم.
س/ وكيف يتم توزيع تلك المواد المخدرة "جوهر الحشيش المخدر" بمعرفة سالفي الذكر؟
ج/ أنا اللي اعرفه إن هنا بيوزعوا الحشيش ده في الإسماعيلية.
س/ وبمن استعان سالفو الذكر في توزيع جوهر الحشيش المخدر بداخل نطاق الإسماعيلية؟
ج/ هو في تجار بالإسماعيلية هما اللي بييجوا بيوزعوا بالقاهرة، وأخويا طلال بيجيب الحشيش من ليبيا وهنا التجار بتوع الإسماعيلية دول هما اللي بيوزعوا.
س/ وهل يساعد سالفي الذكر أشخاص آخرون في حلب أو الاتجار في المواد المخدرة؟
ج/ أنا اللي اعرفه إن في ناس من لبنان بتساعدهم بس أنا معرفش هما مين.
س/ وممن يتحصل أخوك محب وابنه على المبالغ المالية لشراء المخدرات؟
ج/ هو اللي انا اعرفه إن الناس بتوع لبنان دول معاهم فلوس وأخويا طلال معاه فلوس وهما أكيد بيتفقوا مع بعض على ثمن الحاجة.
س/ وما معلوماتك بشأن المزرعة الكائنة برأس سدر جنوب سيناء محل إقامة المتهم طلال منيفي سلامة؟
ج/ هي دي مزرعة زيتون بتاعة أخويا طلال.
س/ وما صلتك بشركة البركة للمقاولات العمومية وكذا مزرعة البركة؟
ج/ شركة البركة دي اللي أنا اعرفه إنها بتاعة على وشغالة في كسارات السن الزلط والمزرعة دي بتاعة طلال اخويا بتاعة الزيتون.
س/ هل تم ضبطك في وقائع مماثلة؟
ج/ لا.
س/ ما قولك فيما هو منسوب إليك من أنك متهم بجلب جوهرين الحشيش والكبتاجون لداخل مصر بغير ترخيص؟
ج/ محصلش والحاجة دي بتاعة على ابن اخويا طلال.
س/ ما قولك فيما هو منسوب إليك من أنك متهم بحيازة جهاز ثريا المحظور تداوله فى مصر بغير إذن وزارة الاتصالات؟
ج/ الكلام ده محصلش والتليفون بتاع على ابن اخويا طلال.