فينك يا أبويا ؟‎

وبقينا دايما زعلانين علي حال مجتمعنا ،،،،،،بنشوف نماذج بشر غريبه في الكلام والشكل والتفكير والمضمون كمان عارفين وصلنا لكدة ليه؟ وازاي؟
خلونا بقي نتكلم مع بعض بصراحه ولو لمرة ونواجه الحقيقه اللي يمكن هي مرة لكن لو معترفناش بيها وممشيناش في الحل هتكون العيشه اكتر مرارة الأسرة عندنا في أغلب الأحيان اتفككت واتدهورت و ولادنا اتبهدلوا معانا وفي وسطنا.
في المقال ده تحديدا هكلمكم عن أول وأهم عنصر فالأسره، وهو ربان السفينه بمعني أصح "حاكم الليله" كلامي اليوم معاك ياعزيزي الأب عارفين انك شايل المسئوليه علي اكتافك ومطلوب منك العيشه والأكل واللبس والشرب والمدارس وغيره وأحيانا كتير بتشتغل اكتر من شغلانه علشان توفي طلبات بيتك وولادك وبالذات في الظروف الصعبة اللي كلنا بنمر بيها دلوقتي.
بس لو سمحتلي ممكن أسألك شويه اسئله كدة وعايزاك تجاوبني مش علشاني لكن علشان بيتك ومراتك وولادك ياتري في زحمه الحياه دي كلها فكرت تجمع ولادك حواليك وتتكلم معاهم؟
ياتري فكرت هما بيعملوا ايه ؟ وايه الخطر اللي حواليهم؟؟؟
ياتري تعرف مين صحابهم وبيعملوا ايه؟؟؟؟
ياتري فكرت تصاحبهم وتحتويهم؟ ؟؟؟
ياتري سمعت منهم عن أحلامهم أو بيفكروا ازاي؟؟؟؟
ياتري فكرت تزرع فيهم أفكار ومبادئ وتابعها ؟؟؟
ياتري بتقعد مع مراتك وتتكلم معاها عن مشاكل اولادكم؟؟؟؟
ياتري في حوار اصلا بينك وبين مراتك ؟؟ ولا هي عيشه وخلاص؟؟؟
لازم تعرف يا حاكم الليله أن الأب مش فلوس وخلاص دورك أكبر وأهم من كدة بكتير ،،،انت اللي بتزرع وتبني وتناقش وتفهم وتحتوي لغاية ما ولادك يقفوا علي رجليهم ويقدروا يبقوا قد الحياه ودوامتها حاول تراجع حساباتك وتوازن الأمور مع بيتك وولادك.
وبلاش تصحي في يوم علي كابوس كبير وتلاقي ولادك بيقولولك فينك "يا أبويا" الحق بيتك وولادك قبل فوات الأوان لأن الخطر والصراع بقي كبير وفوق الوصف.