فى بلدنا القوانين تفانين

فى بلدنا القوانين تفانين
تتلحن على النوت الموسيقية
ويغنيها مطربين شعبيين
علشان تبقى شعبية
وتوصل للملايين
وتتذاع فى النشرات العالمية
ويا سلام لو تبقى جلسة رسمية
وكل النواب حاضرين
وان وافق على القانون عشرة
بقدرة قادر تبقى مية
وتتذاع على الفورى
ويبقى كل الناس شاهدين
إن فى بلدنا حرية
فى سن القوانين
وينقطع لسان اللى يقول
إن بلدنا زى الغول
بتاكل الغلبان والمسكين
كفانا ظلم حرام
دى بلدنا بلد أهرام
بلد النيل والبساتين
قول بلد حرية
قول ديمقراطية
قول ذى ما انت عايز
كله بيتلحن على النوت الموسيقية
بس اوعى تقرب من السلطة
خد عبرة من اللى قبلك
حاول يقرب جتله جلطة
ومش مصدق
روح وجرب
بس يابنى عنى ابعد
أنا عاشق للنوت الموسيقية
بكلمات القوانين الشعبية