هيثم عرابي في رسالة خاصة ل "مسئولي الأهلي": أنا حزين.. وداين تدان

وجه هيثم عرابي، مسئول التعاقدات السابق بالنادي الأهلي، رسالة إلى مسئولي النادي الأحمر وجماهيره وأعضائه، قبل ساعات من الجمعية العمومية الخاصة بالنادي لعرض ميزانية النادي.
وكتب عرابي عبر صفحته على فيسبوك قائلا: "كأهلاوي لازم تكون حزين .. بنشوف حاجات عمرنا ما شوفناها في نادينا وحاجات كتيره اتكسرت، ملتزم الصمت ومبحاولش اتكلم في اي حاجه تخص النادي علشان كلامي مايتفهمش غلط او محدش يزايد عليا لاني عارف ان في ناس مستنياني اغلط بس اعتبروني بتكلم بحكم اني مشجع اهلاوي وليا طلب واحد".
وتابع: "الجمعيه العموميه جايه وبدء تكسير العظام وضرب من تحت لتحت وتسريب اخبار وتعظيم في ناس وتقليل في ناس فسواء هتأيد الميزانيه او هترفضها اعمل اللي تعمله دي وجهة نظرك وحقك بس متاخدوش اسم الاهلى لتحت ولحد كده وكفايه حربوا حربكم وسيبولنا الاهلى بتاعنا اللي احنا عارفينه ولو لمره واحده حسسونا ان مصلحة الاهلى فوق مصلحتك بجد".
أضاف: "بطولاتنا الحقيقيه كانت في اخلاقنا ومواقفنا احترامنا لرموزنا والمشي علي نهجهم واحترام اسم النادي وقواعده ومتنساش ان هييجي اليوم اللي هتكون فيه في نفس المكان وهتكون تاريخ فإختار تاريخك هيكون ايه ؟"، واختتم: "داين تدان".