"السيسي" باكيا:"والله العظيم لو ينفع اتباع لاتباع..واللى يفكر يقرب من مصر هاشيله من على وش الأرض..وهنعوض المياه الناقصة"

السيسي:
غايتنا بقاء الدولة.. واستدعائي لوحدتكم ليس إجراء استثنائيا
"اللى يفكر يقرب من البلد دي هاشيله من على وش الأرض"
أرغب فى إنشاء أفضل حي مال وأعمال بالعاصمة الإدارية الجديدة
الانتهاء من إنشاء 3 مطارات بطاقة 1.7 مليون راكب
نفذنا 133 كوبري خلال 20 شهرا.. و6 آلاف كيلو طرق جديدة بنهاية العام
"ننشئ محطات معالجة مياه بنصف تكلفتها..والتفاصيل أمن قومي"
الدولة أنفقت 150 مليار جنيه لحل أزمة الكهرباء
"أعلم قلق المصريين من سد النهضة وسنعوض المياه الناقصة"
بدأ الرئيس عبد الفتاح السيسي كلمته خلال تدشين برنامج مصر 2030، قائلا«:انا هتكلم معاكم النهارده زي كل مره ما بتكلم بكل صدق وإخلاص وأمانه وبكل علم، وأرجو نحط تحت كلمة علم دي خط كويس، أنا بكلم كل المصريين خاصة الفئات اللى هما مش مثقفين أو مفكرين، لأن لو كل المصريين تفهموا اللى انا بقوله هيبقى الأمر بسيط وسهل على الباقي».
وتابع الرئيس قائلا :"خليني أقولكم إن الهدف بتاعنا الحفاظ على الدولة المصرية، أى دولة غايتها القومية هى بقاء الدولة والحفاظ على الدولة، وده معناه إن الدولة المصرية خلال الفترة اللى فاتت كانت معرضة لتهديد حقيقي ولا تزال، وأنا فى البرلمان قلت كلام واضح، قلت يا ترى اللى كانوا بيتمنوا وبيعملوا من أجل أن يكون مصير مصر كمصير الاخرين قائم ولا انتهى، لو كان انتهى يكون خير، لكن للأسف هو منتهاش لا يزال التآمر بيتم من أجل إسقاط مصر".
واستطرد الرئيس قائلا :«كل المخاطر اللى بنتكلم عليها ومتحسبين منها ملهاش أى قيمة غير فى حالة انقسام صفوف الشعب وتقاتل الدولة ومؤسساتها مع المواطنين، لأن كل اللى اتعمل قبل كده منفعش فبيعملوا حاجات تاني، والأمر ده لن ينتهي إلا بنجاحنا الحقيقي فى تجاوزه، وحديثي عن التآمر على مصر مش عشان إجراء استثنائي، لأن توحدنا وخوفنا على بلدنا مش إجراء استثنائي».
وتابع الرئيس، «أنا بقول الكلام ده عشان معانا هنا شباب من البرلمان ومن مبادرة القيادة، وأنا بوجه كلامى برضه لكل المصريين اللى بيسمعونى دلوقت، إن استراتيجيتنا اللى شغالين بيها هى المحافظة على الدولة والبناء لها».
في سياق متصل، هدد الرئيس السيسي أي جهة تفكر في المساس بمصر قائلا: "محدش يفكر ان طولة بالى وخلقي الحسن انه ضعف، اللى هيفكر يقرب للبلد دي هاشيله من على وش الارض".
وتابع الرئيس خلال كلمته:" انتوا 90 مليون وانا مسئول قدام ربنا انى أخلي بالى منكم عاوزين تخلوا بالكم معايا اهلا مش عاوزين اسكتوا".
واكد الرئيس:" مصر في رقبتنا كلنا وانا لما اقول كدا مش معناها انى بشكك فى حد".
وأعلن الرئيس عن رغبته فى إنشاء أفضل حي مال وأعمال فى العاصمة الإدارية الجديدة.
كما أعلن أنه تم الانتهاء من إنشاء ثلاثة مطارات بسعة 1.7 مليون راكب تستوعبها صالة الركاب، مضيفا: "ننتظر شراء العلامات الملاحية الإرشادية للمطارات حتي تكون جاهزة للاستخدام.
وتابع:"فى غضون عامين هناك تسع شركات أو عشر كل واحدة تعمل 500 متر علشان خلال سنتين نكون جهزنا وخلصنا الميناء".
وقال: «إحنا بنخوض تجربة لتحسين البنية الأساسية، وفى دول عملت الموضوع ده قبل كده زي أمريكا بس كان عندهم دولة قوية فى ظل أزمة اقتصادية، لكن إحنا معندناش بنية أساسية ومحتاجين ننفذها فى أسرع وقت، إحنا عملنا 5000 كيلو طرق طورناهم ووصلوا ل6000 كيلو، وآخر السنة دى هيكونوا خلصوا، وإحنا عملينهم عشان نشغل الناس وعشان عندنا نقص حقيقي فى البنية الأساسية».
وتابع الرئيس قائلا: «أنا هقول كلمة متزعلوش منها، بس عشان انتوا عايشين جوه مصر مش واخدين بالكوا إن فى نقص واننا معندناش بنية أساسية، بس احنا بنحاول نعمل نبني دولة حقيقية، عملنا 133 كوبري فى 20 شهرا، وعملناهم عشان نسهل على الناس ومصالحهم، وهنوفر عليهم وقود لإن اللى هيمشى 5 دقايق مش يستهلك زى اللى بيمشى ساعة، إضافة إلى أن المواطن يحس إنه فى بلده معزز مكرم يقدر يمشي بشكل مرتاح».
واستطرد الرئيس قائلا: «اسمعوا مصر فيها حوالى 70 ألف كيلو موجودين على مدار تاريخها لو حبينا نعمل صيانة ليهم وعملنا 10% يعني 7 آلاف كيلو ويخلصوا ال70 ألفا فى 10 سنين، اللى انا بقول عليه ده معاقش المبالغ المخصصة لصيانة الطرق، أنا كنت أقدر أقول إن احنا عندنا بنية أساسية محترمة لحركتك وحركة الصناعة للموانئ والمطارات وخلافه إلا إذا كان عندي بنية أساسية محترمة!، احان استراتيجيتنا البناء والحفاظ».
في سياق أخر، أكد الرئيس أن أزمة الكهرباء كلفت الدولة نحو 150 مليار جنيه لحلها وذلك خلال عام واحد فقط، مضيفا أن مشكلة الطرق كلفت الدولة نحو50 مليار جنيه،
وأشار إلى أن إيجار المصنع الواحد من مصانع الغاز المسال يبلغ فى اليوم 5 ملايين دولار ووفرناه حتي لا يكون هناك مشكلة غاز فى مصر وحتي تعمل كل المصانع، مؤكدا أنه بنهاية 2017 سنكون أنتجنا كهرباء بما يعادل ما أنتجته مصر فى تاريخها.
وقال: إحنا محتاجين نعمل محطات معالجة المياه بتكلفة 25 مليار جنيه بنصف تكلفتها الحقيقية وكانت 50 مليارا، لافتا إلى أن تلك المعلومات كان لا يجب أن يتم التصريح بها لأنها أمن قومي.
وأشار الرئيس إلى أن معالجة المياه غير كافية قائلا: «لو احنا خايفين من الفقر المائي وبنبص لقدام هنلاقيه مش كفاية، خاصة أن حجم المياه اللى بيجي لمصر ما بيزدش كتير، ولازم نعتمد على تحلية مياه البحر وتوفر لنا على الأقل مليون متر مكعب يوميا».
وأكد أن الدولة تعمل على مضاعفة محطات معالجة المياه بحجم ما تم إنجازه فى 20 سنة ماضية، مؤكدا أن سيتم توفير 10 ملايين متر مياه فى اليوم الواحد، وأكد أنه يعلم جيدا قلق المصريين من فقر المياه وأزمة سد النهضة، مرددا هنعوض المياه اللى هتنقص من بناء السد ، مش هسيب الفلاحين من غير مياه".
وطالب الإعلام و القائمين عليه بتحري الدقة فى المعلومات المتداولة حول السد، قائلا: فى أي مجال قبل ما نتكلم هاتحاسب عليها أمام الله وإللي يتكلم لابد أن يكون دارس.
وفي وسط الكلام، بكى الرئيس عبدالفتاح السيسي تأثرا خلال إلقاء كلمته حول "تطوير العشوائيات والحديث عن مشروعات الصحة والتنمية" باحتفالية استراتيجية التنمية المستدامة لعام 2030.
وقال السيسي "أنا هاقول تعبير صعب جدا: والله العظيم أنا لو ينفع اتباع لاتباع".
واقترح الرئيس مبادرة "دعم مصر بجنيه"، خلال إلقاء كلمته حول "تطوير العشوائيات والحديث عن مشروعات الصحة والتنمية" باحتفالية استراتيجية التنمية المستدامة لعام 2030.
وحول تفاصيل المبادرة قال الرئيس: "لو كل موبايل فى مصر من ال300 مليون موبايل صبّح على مصر بجنيه هيبقي فى الشهر ب300 مليون جنيه وفى السنة بحوالي 4 مليارات جنيه".
وأشار إلى أن صندوق "تحيا مصر" تلقي أكثر من 4 مليارات جنيه، منها مليار جنيه من الجيش.
وأكد السيسي أنه لدينا نحو 27 ألف قرية عشوائية واذا لم نتصد لهذه المشكلة فسيصبح لدينا قريبا نحو 37 ألف قرية عشوائية.
وطالب الرئيس المصريين بالعمل والبناء بشكل قوي، قائلا: "عاوز أبقي جنب المستشفي والمدرسة والطريق اللى بيتعمل مش بلوكات مساكن شعبية.. لا إحنا بنعمل سكن يليق بالبني آدمين".
وأكد الرئيس أنه يجب ان ننجز المشروعات بشكل متكامل حتي تكون عامل جذب، قائلا "لما قالولي اعمل مشروع 60 متر قلت ماينفعش ازاى البنات والولاد يبقوا فى أوضة واحدة انتوا مش خايفين على عرض ولادكم".
على صعيد آخر، قال الرئيس عبدالفتاح السيسى إن الدولة عملت على بناء كيانات للمشروعات الصغيرة والمتوسطة للشباب ، بتوفيرها 200 مليار لهم، مرددا: نعمل في المحافظة على دولتنا ومواجهة كل التحديات ودعم سياستنا الخارجية ودعم الأمن القومى المصري والعربي.
وشدد على أن مصر تواجه مجموعة من التحديات الخارجية التى كانت تتركز على توصيل حقيقة نقل الحكم بعد قيام ثورة 30 يونيو ومدي شرعيته، قائلا : "علاقتنا مع العالم كله تشهد تحسنا ملحوظا ولم نكوّن عداوة مع أي دولة".
وأكد بضرورة أن تكون مؤسسات الدولة قوية، مشيرا إلى أن تلك المؤسسات تضم "البرلمان ، الحكومة والرئاسة" ، وأن أى اهتزاز فى واحدة منها ستدمر الدولة المصرية، مرددا : "قوة الدولة تأتى من قوة مؤسساتها وقدرتها على مواجهة الصعاب".
كما تحدث عن الصعوبات التى تواجه الدولة المصرية قائلا: «هو اللى ضرب السياحة فى مصر ضربها ليه، ضربها عشان قطاع بالكامل يخرج، قطاع كان بيجيب 12 مليار دولار، وإحنا فى أمس الحاجة للدولار فى مصر، وإحنا لازم ناخد بالنا إن ده تخطيط معمولنا عشان مانقمش، هما عاوزين يضربوا البناء عشان يأثروا على بقاء الدولة».
وأضاف:« كان من الممكن نركز كل اهتماماتنا على الإرهاب ونقول أصل إحنا عندنا حرب، لكن إحنا مشينا بالتوازي بنحارب الإرهاب وبنبني فى نفس الوقت».
وتابع الرئيس ، أنه خلال عامين ونصف العام استهلكت مصر وقودا ب533 مليار جنيه بالأسعار العالمية، وبإجمالي 384 مليار جنيه، وأشقاؤنا فى الخليج ساهموا ب51 مليار جنيه.
وأضاف: "إلى الآن نحصل على وقود من أشقائنا العرب، ولكن بتعاقدات تجارية أى بالأجل، وأنا بقولكم الكلام ده عشان تبقوا عارفين الدنيا ماشية إزاى، يعني إحنا بنطلب أجل فى السداد حتى تستقر أمورنا بشكل أفضل من الواقع اللى عايشين فيه وحتى تنتهى الأزمة اللى اتعملتلنا يا مصريين».
وتابع "لو افترضنا أن موازنة مصر 850 مليار جنيه، احنا بنتمنى يكون عندنا 250 مليار جنيه عجز عشان مش معانا ال850، وعندى 250 مليار دعم، وده اللى مصر بتقدمه للمواطن فرق أسعار فى قطاع الطاقة والغاز والسلع والخدمات، و250 مليار خدمة الدين وهو سداد الديون وفوائد القروض، وكانت ديون مصر فى عام 2011 "تريليون جنيه"، وخلال الأربع سنوات الماضية وصلت إلى 2 تريليون جنيه، فماذا يتبقى لمصر، وأنا بس بوضحلكم الصورة، وأنا لما كنت رئيس مخابرات قلت الكلام دا لكل اللى التقيت بيهم، وقلته فى حملتى الانتخابية وبقوله دلوقتى كمان".
وفيما يخص الحكومة، طالب الرئيس عبدالفتاح السيسي بضرورة تناول أداء الحكومة بشكل موضوعي وعلي أسس سليمة قائلا :"اتركوا غير الجيد الان لأننا فى اطار المحافظة على الدولة المصرية وعلينا النظر للنصف الممتلئ من الكوب".
وتابع الرئيس: لما يكون فيه حكومة ودولة مستقرة الامور ماشية تعالوا نلخبط فى الحكومة يعني اوع حد يزعل مني انتوا هتعرفوا اكتر مني الحكومة دي كويسة ولا لأ، انا اللى باقعد معاهم كل يوم، فليه كل شوية مهاجمة طخ طخ".
وأضاف: "انا مكنتش هتكلم عن الاعلام صحيح يعني ليه كدا لو فى حاجة عاوزة تتعدل نعدلها والناس مستعدة وأرجو نوفر مناخ جيد ،ولو بنتكلم عن بناء دولة يبقي حافظوا وشجعوا".
كما طالب الرئيس عبدالفتاح السيسي المصريين بتوحيد صفوفهم لمواجهة التحديات التى تواجهنا في بناء الدولة.
وأضاف الرئيس، "لو فى اصلاح يبقي لازم ندفع التمن.. التمن دا يبقي على حساب الاسر يعني مرتبات الناس لا ، وانا بقول وبسمع من كل المصريين".
وتابع :"اذا كان فى 7 مليون موظف، مليون منهم كفاية ، هل مصر هتقول للأسر دي ملكمش مكان عندنا، هل مصر قالت عندنا عجز موازنة فنخفض مرتباتكم 10% هل هيأثر على حجم العلاوة الدورية اللى بتتاخد كل سنة لا ".
واكد الرئيس أن هناك الكثير من التشريعات والقوانين تحتاج للتعديل قائلا:" نعدلها اذا كنتوا عاوزين تصلحوا كلامكم بجد تقفوا جنب مؤسسات الدولة"، مشددا على انه لابد ان نكون دولة تحترم القانون وسيادته.
واوضح الرئيس ان هناك مخططا لهدم الدولة قائلا إنه يبدأ بأن نشكك فى البرلمان ونهاجمه ثم الحكومة ثم مؤسسات الدولة "، وواصل قائلا:"لا يا جماعة مش ها يتبقى حاجة".
وفي ختام كلمته، قال الرئيس عبدالفتاح السيسي إننا أنجزنا مشروعات خلال العام ونصف العام الماضيين كانت تستغرق 20 عاما.
وأضاف الرئيس: "مش عاوزة اقسم ان اللي اتعمل فى سنة ونص ميتعملش فى 20 سنة هذا ليس جهدي انا ولكن جهدكم يا مصريين".
كما طمأن الرئيس كل المصريين، قائلا.." مصر واقفة على رجليها وبخير وسلام".