الناظر: «قناة السويس الجديدة» تؤكد أن مفيش مستحيل على شباب مصر

أشاد الدكتور هانى الناظر، رئيس المركز القومي للبحوث سابقًا، بعبور 3 سفن صباح أمس السبت فى قناة السويس الجديدة، مؤكدًا أنه لا يوجد مستحيل على الشباب المصرى، معربًا عن سعادة كل من وضع شهادات استثمار فى قناة السويس ممن ساعدوا على إشاعة الخير ونشره لكل مصرى.
وكتب "الناظر" فى تدوينة له عبر صفحته الشخصية بموقع التواصل الاجتماعى "فيس بوك": "عاوز أقول حاجة للشباب بعد ما شفت النهاردة السفن العملاقة وهي بتعدي القناة الجديدة واحدة ورا واحدة.. اللي حصل ده بيقولك مفيش حاجة اسمها مستحيل علي الشباب المصري.. أهم عملوها الشباب وفي أقل من سنة كمان واهو حصل اللي قعدوا يقولوا لكم عليه موش هتقدروا ومينفعش وموش هيحصل ودي أحلام وأوهام.. لا ياشباب انتم تقدروا تعملوا كمان أكتر من كده.. خلاص أديكم شفتم علي الطبيعة".
وتابع: أيوة انت وهي تقدروا تحققوا أحلامكم وطموحاتكم وتعملوا حاجات التانيين بيقولوا عليها المستحيل.. النهاردة البداية الحقيقية يا شباب ويا بنات انطلقوا حلقوا في السما بأفكاركم وأحلامكم وأمانيكم.. خليكم مؤمنين بقدرة الله وواثقين في أنفسكم.. اتعبوا واشتغلوا وحولوا الأماني لواقع لانكم تقدروا فعلا زي ماخواتكم وزمايلكم ما قدروا وحولوا حلم القناة الجديدة الي واقع وحقيقة.. البلد أمانة في أيديكم وهتكبر بيكم وبسواعدكم يا شباب مصر".
وأضاف "الناظر": "النهاردة المصريين فرحانين ولكن في ناس فرحتهم خاصة ومضاعفة.. الناس دول هم اللي حطوا فلوسهم في شهادات استثمار قناة السويس لأنهم عرفوا ان كل قرش دفعوه مكانش بس استثمار ليهم ولولادهم ولكن استثمار لكل المصريين اللي عايشين علي أرض المحروسة.. يعني الخير عاد عليهم وهيعود علي كل مصري.. فعلا ده الاستثمار الحقيقي".