عزبة البرج.. أهم مدن دمياط حوّلتها الأمطار لمنطقة مقطوعة

تعتبر عزبة البرج من أشهر مدن محافظة دمياط، كما أنها أهم مصدر للأسماك بالمحافظة؛ كونها تملك أكبر أسطول صيد فى المنطقة، ويشتغل معظم سكانها بالصيد؛ بفضل موقعها الجغرافى، حيث تقع فى نهاية النيل والتقائه مع البحر الأبيض المتوسط، ورغم أهميتها، فإن الطريق الوحيد الذى يربطها ب6 قرى فى دمياط، من أسوأ طرق المحافظة الداخلية على الإطلاق، وظهرت سوءاته بعد سقوط الأمطار التى يعانى منها مستخدمو الطريق حتى اليوم.
يقول رامى محمود، سائق ميكروباص: "تعبنا من الشكاوى، إحنا كنا فى الصيف وعربياتنا متبهدله من الطريق والمطبات والحفر اللى عليه، غير إنه ضيق جدا لأنه بيشتغل اتجاهين وفيه بيوت على الطريق من الجانبين فى معظمه لأن فيه 6 قرى على الطريق بداية من البصايلة والجواهره والخياطة وطبل والشيخ درغام وكفر حميدو، وبعدين مدينة عزبة البرج، وكمان الترعة اللى لسه متردمتش والمشاكل اللى بتسببها، النهارده يزيد علينا المطر اللى حول الطريق لطين، مش عارفين نمشى، وكتير من أصحاب العربيات فضلت تقف متشتغلش لأن الطريق مش أمان، النيل من جانب والترعة الجانب التانى، والطريق زحمة جدا وعليه ضغط كبير، بنطالب المسؤولين الاهتمام بالطريق اللى بيستفيد منه عشرات الآلاف من المواطنين، الطريق محتاج يتوسع والترعة تتغطى ونستفيد منها فى الطريق، وياريت يتعمل مزدوج علشان الحوادث".
أما محمود رضا، تاجر خضار، يقول: "عزبة البرج ملهاش غير الطرق ده اللى بيربطها بدمياط، ومفيش أى بدي غير النيل وفى الأزمة اللى فاتت دى كتير من أصحاب الميكروباصات اللى شغاله على الخط وقفت وخافت على عربيتها، والناس كانت بتجازف وتعدى فى المعديه بالنيل وتروح رأس البر، وبعدين تركب لدمياط، طيب وإحنا نجيب بضاعتنا إزاى ولسه لغاية النهارده الطريق طين ومش عارفين نروح ولا نيجى، المدينة ملهاش غير الطريق ده لازم يكون فيه حل".
كان الدكتور إسماعيل طه، محافظ دمياط، أكد أن الطريق ضمن خطة التطوير والرصف خلال الأشهر القليلة المقبلة.