أحمد نصحى: شجع إرهاب بلدك

عايز تشجع الإرهاب؟ الموضوع سهل خالص.. رُوح لهوليود الشرق.. اسحب الفنانين اللي بيتشحتفوا على مبارك.. اعمل بيهم فيديو مالوش تلاتين لازمة يخلي الناس تتعاطف مع الإرهاب.. اهري الناس خطب عن المؤامرات الخزعبلية ضد مصر بقيادة النرويج وفرسان مالطا .. اشتم قطر.. لأ صالح قطر.. عين البرادعي.. خوِّن البرادعي.. حارب السيناوية.. أمِّن إسرائيل.. اسجن الطلبة.. اقفل المنظمات الحقوقية.. الغِ الانتخابات..عيِّن الغُفَرا رؤساء الجامعات.. جرَّم المظاهرات.. اعتقل البنات.. اعدم المئات في دقايق معدودات…
إيه لسه الإرهاب ما انتشرش؟
أول ما تشوف حد بيتكلم عن الفساد.. قول عليه طابور خامس.. لو طالِب بحقه في أكل صحي وميه نضيفة.. قل له ممنوع الكلام في السياسة إحنا بنحارب الإرهاب دلوقتي.. ولو عاوز علاج على نفقة الدولة.. طلع له صباع كفتة.. لو دخله مش بيقضيه ونفسه مرتبه يزيد.. طلع له صباع محافظ الإسماعيلية.. عايرهم إنهم مش زي سوريا والعراق.. إيه ده إحنا لسه مابقناش زي سوريا والعراق فعلا؟!
يبقى روح مدينة الإنتاج الإعلامي..
خليهم يحرضوا على السيناوية، والمظاهرات السلمية، ويشاوروا على عنتيل الغربية ويقولوا بقى هي دي الشريعة الإسلامية.. شجَّعهم يذيعوا مكالمات النشطاء الشخصية.. ويستضيفوا شيوخ مشتاقين لأي حرب أهلية.. خلي مقدمي البرامج الرياضية يفكروا المشاهدين إننا لو فزنا فده عشان مصر رجعت تاني قوية بفضل القيادة السياسة، ولو خسرنا فطبعا ده أمر طبيعي بسبب أفعال الجماعة الإرهابية.
اعمل شارات سودا أعلى الشاشات وتحتها شريط أخبار بيحذر المواطنين من المشاركة في المظاهرات، أو كلمة ( لأ ) في الاستفتاءات.. وفي منتصف الشاشة تصريحات للمسؤولين إن شعب مصر دلوقت موحد أكتر من أي وقت فات.. إيه ده؟ فيه طفلة رفضت تغني تسلم الأيادي في التليفزيون.. المجرمة.. هاتها تاني يوم في نفس القناة.. اعملها محكمة تفتيش.. خليها تعترف إنها ماكنتش حافظة الأغنية بس.. أكد على البنت تقول للناس إنها مش مضغوط عليها، ولا حد محفظها حاجة.. تمام كده.. إيه ده؟ فيه فنان تاني فر من الحظيرة وهاجم قائد المسيرة؟ قول عليه فاشل، شاذ، عميل.. خلاص. الحمد لله بقينا على قلب رجل واحد.. كده نقدر نحل مشاكل البلد بجد..أووووبس مين الشاب العجيب اللي بيطالب بحل مشكلة الزبالة في الشوارع..بسيطة ما تقلقش.. خلي محافظ الدقهلية يهتف بكل فخر وحماس في وجه هذا الشاب المزقوق: يسقط أعدااااء مصر.. تسقط الزبااالة.. إيه لسه الزبالة ما سقطتش.. خليه يقول كمان مرة تسقط الزبااالة..برضه ما سقطتش.. غريبة أوي!
كفاية كده.. أنت عملت اللي عليك.. سيب الباقي بقى على المعارضة الإسلامية.. جه دورك يا حامل لواء الشريعة والشرعية.. انزل اهتف لداعش وارفع رايتها وسميها الدولة الإسلامية.. طنِّش أفعالها الإجرامية.. بس تبرأ من أفعالها في بيانات اللغة الإنجليزية.. أكد على الناس إن أم السيسي بعد 30 يونيو طلعت يهودية.. فكَّرهم تاني إن الحشد يومها كان بسبب الطائفة المسيحية.. وعشان كده لازم الثورة تبقى إسلامية.. اقنعهم بالعافية إن المصاحف بتتحرق والمساجد بتتهدم ومفيش حل غير إننا ننزل نجيب الهوية.. لو حد سألك هي فين ديَّه.. قل له سيبناها أمانة عند المجلس العسكري في جمعة الاستقرار للعسكر وللشعب الهوية.