سخرية على “تويتر” من اقتحام مقاهي البورصة: نظام مصر مش حيبقى برلماني ولا رئاسي.. حيبقى فخفخينا

* النضج السياسي من اللعب على المكشوف للعب ع المشاريب..الإخوان: لن نشارك فى موقعة البورصة لأن بعض المشاريب غير متفق عليها
* الاخوان: لم نشارك فى موقعة البورصة لأن الجلوس هناك التفاف على الارادة الشعبية
كتب إسلام الكلحي ومحمد كساب:
دشن نشطاء على موقع التواصل الإجتماعي ''تويتر'' هاش تاج باسم بورصة ” #borsa “، سخروا فيه من اقتحام قوات الشرطة العسكرية مقاهي البورصة مساء أمس، المعروفة بتردد كثير من النشطاء السياسيين عليها.
وفيما قال أحد النشطاء ساخرا '' نضوج العسكر سياسيا: بعد مرحلة اللعب على المكشوف، الآن اللعب على المشاريب'' قال مستخدم آخر '' يا مشير يا مشير .. مين هيحاسب ع العصير''..
وفي تحريف لتصريح حمدين صباحي المرشح المحتمل لانتخابات الرئاسة حول حوارات المجلس العسكري مع القوى السياسية قال ناشط '' حمدين صباحي :حوارات المجلس العسكري مع القوى السياسية لابد أن تكون في البورصة''.
وهذه مختارات من باقي التعليقات حول اقتحام الشرطة العسكرية لمقاهي البورصة:
-أحمد شفيق: أنا شايشت وشربت وحاسبت واتحاسبت.
-الإخوان المسلمين: لن نشارك فى موقعة البورصة لأن بعض المشاريب غير متفق عليها !
-الاخوان المسلمين: لم نشارك فى موقعة البورصة، لأن الجلوس هناك هو التفاف على الارادة الشعبية .
- بعد حادثة البورصة اتوقع ان نظام مصر مش حيبقى برلماني ولا رئاسي ..... حيبقى فخفخينا
- جمال مبارك في رسالة من السجن : “مش دي البورصه اللي قولتلكم وقعوها.. التانية بتاعت الاسهم ” .
-نزل يابنى الشاى فى الخمسينة ..دول آنسونا وسابوا سينا.
- عالبورصة راجعين هنشيش بالملايين
- يا ابو دبورة و نسر وكاب .. مين هيدفع الحساب .. يا مشير يا مشير مش هحاسب عالعصير
- شارع شارع زنجة زنجة....نزل يابني شوب المانجة .
- اشرب يا ابني بسرعه السحلب .. العسكري جاي يتسحب .
- ثورة ثورة حتي النصر .. ثورة في كل قهاوي مصر.
-من الهتافات امام قهوة البورصة .اهدى يا باشا اهدى يا بيه .. نزل يابنى الكركديه .
- عمر سليمان: المصريون غير مؤهلين للتشييش
- تعمل ثورة يجيلك جيش.. وفهمنا، لكن تطلب قهوة يجيلك جيش برضه... تميم البرغوتي
- بيقولك سبب هجوم الجيش علي قهوة البورصه بالليل كان ان في اتنين بيلعبوا شطرنج عسكري مات .
-آه يا مصر وآه يا مصر .. لسة فيكي زغلول وقص .
-عسكر عسكر عسكر ليه .. أنا اتسطلت ولا ايه .
-بمناسبة ما حدث لقهوة البورصة : اتقوا شر الحليب اذا غضب .
-هما بيشربوا شيشة تفاااااح .. وأحنا القص دوخنا و داااااااااخ .