غضب شديد على تويتر والفيسبوك بعد تبرير حرمان المصريين في الخارج من التصويت “لمنع شراء الأصوات”

* تويتر: يمنع المصريين كلهم من التصويت ويقرر لنا هو مصلحتنا.. ما توقل عمدو موسى هو الرئيس واخلص
* فيسبوك: باختصار.. المصريون في الخارج ما بين عميل ومندس وقابض ومستعد يقبض وعيال سيس مش فارقة معاهم البلد باللي فيها
كتبت- نفيسة الصباغ:
بعد ثوان من نشر موقع “المصري اليوم” خبرا، نقلا عن مصدر عسكري، يفيد بأن الصيغة النهائية لقانون تنظيم مباشرة الحقوق السياسية تنص على إلغاء كوتة المرأة ومنع المصريين في الخارج من التصويت بحجة “منع شراء الأصوات”، انهالت ردود الفعل الغاضبة من النشطاء على موقع تويتر وبينهم عدد من المصريين في الخارج، منتقدين المبرر الذي قد يوحي بعدم الثقة فيهم والتشكيك في وطنيتهم، وبدأت مقترحات بالامتناع عن تحويل الأموال لمصر إذا لم يمنحوا حقوقهم كاملة كمواطنين.
وعلى موقع تويتر كان من بين التعليقات:
“يا نهار اسود ومنيل علي ده مجلس وديه حكومة هتجبولنا شلل رعاش”
“لو لم يسمحوا لنا بالتصويت في البرلمانية سوف نوقف تحويلات المصريين بالخارج تماماً”
و”يعني الاول قالولك عناصر خارجيه, خارج امبابه ودلوقتي بيخونوا المصريين في الخارج ومنعوا عنهم التصويت..ايه اللي بيحصل؟ هوا فين المصريين بالضبط؟”
“بما ان المصريين في الخارج برة اللعبة, والمصريين اللي في الداخل أصواتهم بتشترى بسهوله, يبقى نمنع التصويت عن دين ام الشعب و نخلص”
“على فكرة ممكن تفهم أى عقبات إجرائية مؤقتة لكن الكلام اللى إتقال فى تبرير المواضيع يحرق الدم و يستحق التعقيب”
“المجلس هيخلى الإنتخابات بطريقة ::::: صوتى يا اللى ما انتيش غرمانة ,,,,,, و الغرمانين اللى بره ولاد كلب ما يصوتوش
يا جماعه ده السودان بالرغم من كل المشاكل اللي كانت فيها في استفتاء الجنوب السوادنيين اللي في مصر صوتوا في هذا الاستفتاء يبقي احنا نمنع ده ؟
انت بتعامل المواطن المصري اللي عايش بره علي انه مواطن درجة تانية مش هامه البلد ولا الرئيس اللي هيجي ليها ده اسمه ايه ده يعني ؟؟؟
المصدر العسكري لو بيفهم كان مثلا يضحك علينا ويقول مش هينفع اصوات اللي فى الخارج فى مجلس الشعب هذه الدورة فقط نظرا لصعوبة العملية
طيب يوم الانتخابات الصبح عدي على أوسخها قهوة وطلع ورقة بميه هتجيب عشر أصوات يلعن أبو دي نزاهة
طب ما تجيب م الآخر يا مجلس و قوللنا عمرو موسي هو الرئيس و اخلص
مش وقف التحويلات بس .. وقف دفع التأمينات على العاملين فى الخارج ده اساسى
المفروض يمنع المصريين كلهم من التصويت لضمان عدم شراء اصواتهم فى الانتخابات!!!!! ويقررلنا هو مصلحتنا فين وىخلصنا
ومن بين التعليقات على موقع “الفيسبوك”:
باختصار: المصريون في الخارج ما بين عميل ومندس وقابض ومستعد يقبض وعيال سيس مش فارقة معاهم البلد باللي فيها.. وعشان ما حدش يقول “دول يعرفوا مرشحي البرلمان منين” أقولهم الراجل قال بكل بساطة هاتكون فيه قوائم يعني ممكن يصوتوا لصالح قائمة لها برنامج واضح، أما الحديث بهكذا وقاحة عن مواطنين مصريين غربهم فقر مبارك، فيعني أن الانتخابات الرئاسية ستأتي بما هو ألعن.
ممممم المصريين في الخارج مالهمشي صوت.. طب ماتريحوا نفسكوا وتسحبوا منهم الجنسية- وانا منهم- وخلاص
أنا رأيي ان ده موضوع لا يسكت عليه والجيش محتاج وقفة
و المصريين في الخارج قرروا انهم يدعموا محمد حسان رئيسا للجمهورية .. ممكن الجيش يديهم حق التصويت
ومن التعليقات على صفحة المجلس الأعلى للقوات المسلحة:
من فضلكم تكذيب فوري للكلام الفارغ وقلة الأدب دي عن المصريين في الخارج، ومافيش مانع من اعتذار رسمي
إيه الكلام العبيط اللى بيتقال عن منع المصريين بالخارج من التصويت بالانتخابات والتفسير المتخلف ده مصدر أساسى من مصادر الدخل القومى هو تحويلات المصريين بالخارج؟؟؟
وكانت “المصري اليوم” نقلت عن مصدر عسكري أن أهم التعديلات الجديدة على القانون تتضمن إلغاء كوتة المرأة وحرمان المصريين بالخارج من حق التصويت في الانتخابات البرلمانية، فضلاً عن أن يتم التصويت بالقائمة النسبية والنظام الفردي معاً، وتنفيذ الانتخابات النيابية على ثلاث مراحل.
وأوضح المصدر أن سبب إلغاء تصويت المصريين بالخارج يرجع لعدة عوامل أولها «أن هناك نحو 4 ملايين مصري مقيمين بالخارج في 139 دولة وبالتالي تشكل عملية إدارة الانتخابات في كل هذه الأماكن صعوبة كبيرة، فضلاً عن أنها لن تعكس الرغبة الحقيقية لإرادة الناخبين حيث سيتم استغلال هذه الكتلة التصويتية التي قد ترجح كفة مرشح على آخر من خلال عملية شراء الأصوات، خاصة أن هؤلاء المصريين يقيمون بالخارج وبالتالي قد لا يعبأون بهوية من يمثلهم كالمواطن الذي يقيم في مصر».