على شيحة : وصية

فيها أنا شبت
وإيدى بتبنى
وأما زرعت وبان محصولى
آلقى ايدين غير ايدى بتجنى
عارف يابنى
كنت باحس بذل الحاجة
فيه افواه عايزة ومحتاجة
فيه اشياء لازم تتغير
عمرى بحاله قضيته فى غابة
ليه يحكمنى لصوص وديابة
ناس مساكين والباقى غلابة
وعيون ظالم بتهددنى
تعمل ايه لو كنت مكانى
لو غلطان ناقش تعجبنى
وده مش عيب
جو الغابة ما فيهش حبيب
ينفع آشكى وآبكى لديب
حكم الغابة ما يعرف رحمة
صوتك ضايع وسط الزحمة
ومش مسموع
تهمة وجاهزة
انك ماشى وف الممنوع
والموضوع أنا عايز حقى وموت يا حمار
اصل خبايا العدل فى بلدى فيها أسرار
يعنى دخلت فى قصة رشوة وكام سمسار
واللى معاه لازم يغلبنى
فاهم يابنى
يا عودى الأخضر
يا ابن الطين والنيل الأسمر
يا ابن الخير والهرم الأكبر
عايزك تفهم يوم وتقدر
انك مصرى ووطنك أكبر
وإن الدم رخيص علشانها
وان الهم تلال هانزيلها
تكبر مصر... عدوك يصغر
شوف كنايسها ودق جرسها
صوت مساجدها والله أكبر
تعرف انك مصرى حقيقى
وند الفتنة قبل ما تكبر
وافرح يا ابنى
وشوف عمالها ثروة مصر وهما آمالها
واسأل تعرف عن أحوالها وليه دبحوهم؟
بعد ما مصوا الدم رموهم
هما عبيد !!!
أول مرة أحس فى بلدى بثورة وعيد
أول مرة أحس بمايو لابس لى جديد
واسمع صوت المكن الداير
وأشكر ثورة شهر يناير
واعلن ان الجيش المصرى
فاهم نبض الشعب الثاير
فاضل يا ابنى وصيه اسمعها
مصر جميلة وما أروعها
سن سلاحك لو روعها
طامع فيها ومش إنسان
احفظ نيلها
رد جميلها
يصبح ليك فى الدنيا كيان
دا انا لو باقى فى عمرى ثوانى
ازرع شجرة فى كل مكان
ازرع حب وخير وتفانى
يسعد كل بنى الانسان
اصل انا مصرى وبلدى كريمة
ربى ذكرها وف القرآن
شعر
على شيحة
اول مايو 2011