صبري فواز يكتب : الدراما المصرية المفترى عليها

شوف ريقنا نشف قد أيه وضاعت مننا ثورة عظيمة عشان ما قدرناش نوحد الأضداد السياسية و الثورية لا فى الميدان و لا في الانتخابات .. يمكن عشان الخلاف حاد جداً .. الله أعلم ..
المهم.. فجأة كده بقدرة قادر توحد الإخوان والسلفيون والاشتراكيون الثوريون والليبراليون والفلول والكنبة على حاجة واحدة .. أيه هى .. ( الدراما المصرية )
..
قال أيه .. الألفاظ بقت وحشة .. طب ماهى بقت وحشة فى البرلمان وفى الشارع وفى البرامج وفى المدارس.. هى يعنى الدراما لوحدها ؟
قال أيه .. فيه أعمال مستواها وحش .. طب ما كل نشاط فى الدنيا فيه الحلو و الوحش
وأخيراً الكبيرة بقى : قال اييييه
الدراما تكلفت مليار و شوية .. والناس مش لاقية تاكل ) (
______________ .. طيب .. ____________
مش هانتكلم فى إن ورا المسلسلات دى آلاف البشر فاتحة بيوتها
ومش ها نتكلم فى إن المهنة زي أى مهنة مليانة بالفنانين والفنيين والعمال والخدمات..
ومش هانتكلم فى إن الدراما المصرية هى السند الإستراتيجي والاقتصادي والثقافي لمصر عبر العصور .. والأيام دي تحديداً مصر محتاجة لها جداً
ومش هانتكلم فى إن الفن المصري هو المنتج الوحيد - تقريباً - اللى صنع فى مصر بجد.. و الوحيد - فعلاً - اللي نسبة التصدير فيه 100% .. وآخر الأرقام بتؤكد أن المسلسلات ه تحقق أرباح في رمضان بس 80 مليون جنيه من التسويق وعائد الاعلانات .. والأرباح مستمرة باقي السنة.
و مش هانتكلم عن الدور الخطير اللي الفن المصري يؤديه داخلياً وخارجياً
____________ .. لكن .. ___________
تعالوا نتكلم في: هل الدراما المصرية هي اللي عاملة مشاكل للاقتصاد المصري ؟ رغم إنها بالدراسات بتكسب دا غير الدور الثقافي والاستراتيجي ..
طب ما فيه عربيات فاخرة وطائرات خاصة بالمليارات ما بتحققش عائد.. والناس مش لاقية تاكل
طب ما فيه 18 مليار جنيه بيروحوا فى لوك لوك الموبايلات ما بتحققش عائد.. والناس مش لاقيه تاكل
طب مافيه 16 مليار بيروحوا فى الدروس الخصوصية ما بتحققش عائد.. والناس مش لاقية تاكل
طب مافيه مليارات المليارات اللى بيروحوا فى تسقيع الأراضى ما بتحققش عائد وبتعطل تنمية .. و الناس مش لاقية تاكل
طب مافيه مليارات مهدرة فى الرياضة المصرية و- نتايجها دولياً تفضح - و الناس مش لاقية تاكل
طب ما فيه مليارات المليارات بيروحوا فى تجارة المخدرات- مع الفارق - والناس مش لاقية تاكل
طب مافيه مليارات ما تتعدش فى تجارة السلاح - دا غير خطره - والناس مش لاقية تاكل
طب ما فيه هدر للتريليونات بيتصرف على الجيش - اللى مش عارف يحمى الحدود - .. والناس مش لاقية تاكل
و مليارات بتتصرف على الشرطة - فى عز الانفلات الأمني- .. والناس مش لاقية تاكل
والمليارات بتهدر فى التعليم - اللى بيخرج جهلة بشهادة- والناس مش لاقية تاكل
ومليارات بتهدر على الأوقاف والأزهر والكنائس والجوامع - ومع ذلك لا فيه سماحة و لا دين فى البلد- .. والناس مش لاقية تاكل
و الإنتخابات أهدرت كام ؟ و ال .. و ال .. و ال .. و ال ........ يوووووووووه
. . . . . . . . . . .
لا إله إلا الله .. بقى جايين فى السنة اللى الدراما فيها عاملة قفزة مهولة على مستوى الصورة... والسنة اللى ظهر فيها مجموعة أعمال ناجحة بقيمتها الفنية لا بوجود نجم .. والسنة اللى ظهر فيها مجموعة تِفرِح من الوجوه الجديدة صبيان وبنات .. – مش هنتكلم عن العائد - وتعملوا كده ؟؟؟؟
فياريت اللى يتكلم كلمة يبقى عارف بيقول أيه عشان البلد مش ناقصة
وروحوا شوفوا أمريكا وفرنسا وتركيا والهند بيعملوا أيه للدراما و بالدراما .. وكل سنة واحنا طيبين وسذج وبينضحك علينا .. على رأى الشاعر / محمد محمد الشهاوى
و ما نال الهزيمة غير شعبٍ .. يرى فى كل ناعقةٍ صوابا
..
على فكرة .. حد فيكم يعرف تمن القطعة الواحدة فى محلات (استقبال للموبيليا) .. و الناس مش لاقية تاكل ؟؟؟؟؟؟؟؟؟
Comment *