أحمد حامد دياب : اللهم ارض عن الرئيس الجديد

من يوم ما الرئيس الجديد المنتخب نجح (ربنا يارب يوفقه ويعينه ويوفقنا فى معارضته وتقويمه) وانا ملاحظ ان شباب فيسبوك ابتدوا فعلاً فى تعظيم الحاكم وتضخيمه ونفخه علينا وبدأت الخطوات الفعلية فى صناعة الفرعون
انا مش معترض على الرئيس الجديد لان هى دى الديمقراطية لكن انا معترض على تعامل الشعب معاه من أول يومين تلاقى واحد يقول ده الرئيس النهارده مشي على رجله!! التانى يغنى ويقول الرئيس نزل من العربية بنفسه!!التالت يلحن ويقول وقف فى البلكونه بنفسه!!! الرابع يرد يقول ده ما شاء الله سلم على واحد واقف!! يقوم الخامس بقا يجيب صورة ابنه ويقول ابن الرئيس قال ماليش دعوه بابويا!! والخامس يلحن عليه ويقول مرات الرئيس قالت مش عارف ايه!!
ناقص بقا الناس تقول ده دخل الحمام لوحده واتشطف لوحده وناقص كمان يقولوا ان من كرامات الرئيس الجديد انه بيرد على موبيله وانه بيلبس شبشب بلاستيك فى الحمام وبينام فى جلابية وانه ما شاء الله متواضع لدرجة انه بياكل فول بالزيت واللمون وماشاء الله على تواضع الرئيس الجديد النهارده كان ماشي فى الشارع ولا حول ولا قوة الا بالله العلى العظيم ونعيط من الفرح بالرئيس الجديد!!!
الواضح جداً اننا لسه مترسختش عندنا فكرة ان الرئيس ده موظف عند الشعب وواضح برضه اننا مازلنا عندنا عقدة صناعة الحاكم كاسطورة!!
لكن لازم نقول الحق ..الحق ان اوباما أكبر رئيس لاكبر دولة فى العالم بيمشي فى الشارع ومن غير ما يفقل الشوارع برضه وكمان بيهزر مع الشعب حتى مع عامل النضافه (الزبال يعنى ) وكمان بيتصور معاه وممكن يألش عليه عامل النضافه اللي هو الزبال ويعلم عليه كمان!! كذالك رئيس وزراء هولاندا بيروح شغله بالعجله ولو الكوتش نام منه بيسحب العجله ويمشي بيها عادى كده ومن غير ما يتصور والهولانديين يقولوا شوفتوا رئيس الوزراء متواضع ازاى والنسوان تزعرت ويقولوا ايات واشعار فيه!!!
ثقافتنا لازم تتغير .يعنى مش لو الرئيس صلى الضهر نصوره ونقول لقد صلى الرئيس الضهر ونروح قايلين آيتين قرآن وقد قام سيادته بصلاة السنة ركعتين بعد الصلاه (تكبييير) وبعد كده نقول والجدير بالذكر ان الرئيس قد توضأ بنفسه وبدون مساعده من اى شخص اثناء الوضوء أو الاستنجاء!!!
وبعد شوية نجيب صورته وهو بيتغدى ونقول لقد مسك السيد الرئيس الملعقه بيده وتناول الطعام القرديحي اللي اتعمل بمية من الحنفية وقد اعدت الطعام زوجته الفاضله وأكل سيادته بالعيش وشكر الله ونروح قايلين آيتين قرآن !!!(كلوا من طيبات ما رزقناكم)
والنهارده الرئيس كان معدى قدام محل عصير والدنيا حر وقد نزل سيادته من السيارة وقام بطلب شوب عصير دوبل ثم دفع الحساب اه والله دفع الحساب ثم شرب سيادته العصير(وجلعنا من الماء كل شئ حى)
خلاصة الكلام الرئيس ده له برنامج لازم اننا نحاسبه على تنفيذه .. ونحاسبه على التضخم والاحتياطى وارتفاع الاسعار وغيره
وله برنامج لازم يتحاسب عليه ولو نفذ اى حاجه فيه مش لازم نغنى له اخترناك اخترناك !! لان الناس انتخبته عشان يعمل كده فعلاً .. يعنى هو موظف بعقد عمل لمدة معينة ملزوم بخدمة جموع المصريين يعنى لو خدم فده الواجب يحاسبه عليه ربنا واحنا كمان نثنى عليه يوم ما ينفذ برنامجه ولو مش نفذه اولاً ما انتخبوش تانى ونورى له العين الحمرا وكمان ربنا ه يسأله وحساب ربنا هيكون عسير
خلاصة الكلام اللي يتلسع من حسنى مبارك ينفخ فى محمد مرسي يعنى الرئيس ده واحد زينا اخترناه عشان يدير مصالحنا يعنى زى ناظر العزبة بالضبط واحنا اصحاب العزبة
ف ياريت نغمة تعظيم الحاكم دى بلاش منها وفى تصرفاته الانسانية فدى المفروض انه بيعملها من دافع ضميره وربنا ه يحاسبه عليها الا لو كانت رياء ومنظره وده طبعاً اللي يعرفه ربنا بس
ولو عمل انجاز هنحس بيه كلنا وكمان هيبقى تنفيذ لبنود العقد اللي بينا وبينه
الحكاية بالظبط زى ماتكون انت اتعاقدت مع مقاول يبنى ويشطب لك بيت
وانت كل لما يبنى طوبه تعمل هوليله وفرح (هو لسه مبناش لكن احنا بنتكلم عن الواقع) وكمان لما يعمل حاجه يعنى مثلاً المقاول راح محلات مش عارف ايه فى العتبة واشترى حزام وتقعد بقا تصورة وتصور الحزام وتعمل ليله وتوفيق عكاشة يتكلم عن نوع الحزم وانه جلد ماسونى مفتخر وان وائل غنيم لابس واحد زيه
الرئيس ده عباره عن سواق احنا أجرناه عشان يسوق عربية مصر فلما يدور العربية مش لازم كلنا نهلل لان ده دوره ولما ينقل على الغيار الاول مش لازم نزعرط ولما يجيب التانى مش لازم نعيط من الفرح ولما يفتح فى السرعه مش لازم يغمى علينا!! كمان لو أكل مطب لازم نشد عليه ونقوله مش تفتح ؟؟؟ (لانه بيشتغل عندنا) ولو رجع مارش لازم نصحصح معاه ونشوفه ه يخبط فى مين ونحاول ننبهه ونفاديه وننزل نزق معاه لكن هو السواق واحنا أصحاب العربية!!!!وكل واحد لازم يعرف حدوده
يا ريت ثقافتنا تجاه الرئيس تتغير ولازم نعرفه ان احنا اللي جبناه عشان يمشي مصالحنا مش عشان فرعون ويتحكم فينا
ويا ريت معاملتنا للرئيس وعياله ومراته تبقى زى معاملتنا للسواق أو للمقاول اللي هيبنى البيت إحنا بنحترمه عشان سنه ومقامه لكن الصح اللي بيعمله واجب عليه وبند متفقين عليه وهو بينفذ الاتفاق والغلط والتأخير ده غلطه وتجاوز منه واحنا لازم م نسمحلوش بكده
وكل رئيس وانتوا طيبين
Comment *