سلمي صباحي تكتب مقالاً علي صفحتها بعنوان 'السر'

كتبت سلمي صباحي اليوم علي صفحتها الشخصية بموقع التواصل الاجتماعي 'فيسبوك'، مقالة بعنوان 'السر'، عقب الإفراج عنها حيث كتبت قائلة: 'السر.. أني حسيت أن ربنا بيحبني أوي.. ابتلاني ونصفني.. السر إني دُقت جزء من الظلم اللي داقه أبويا.. السر اني حين كنت بشوف صمود أمي أيام وشهور لما كانوا بيعتقلوا أبويا.. السر إن بعد 6 سنين جواز اكتشفت في 'أشرف' حاجات جديدة وإتأكد شعوري إنه هدية ربنا ليٌه'. وأضافت 'السر إن المحامين العظماء حامد جبر، ومحمد منيب 'عمامي' اللي اتولدت وسطيهم وكبرت قدامهم دافعوا عني بقلب الأب ولما رجعت البيت أخدوني في حضنهم، وبكوا من فرحة رجوعي.. السر إن كل المحامين الكبار الأعزاء أصدقاء أبويا واللي بيعتبروني زي بنتهم دافعوا عني متطوعين وبقلب صادق جدا.. السر إن المحامي المحترم خالد أبوبكر ظهر في حياتي فجأه ليلة التحقيق، سمع قصتي وطلب مني أعمله توكيل عشان يقف جنبي تطوعا منه، وماسابنيش لحظة'.
وتابعت سلمي وأشارت إلي مساندة أصدقائها لها فقالت: 'السر.. أن أصحابي الجدعان 'بنات ورجاله' كانوا واقفين طول الايام في النيابة وقدام القسم بس عشان يحسسوني إنهم جنبي.. السر إني اكتشفت عظمة حب الناس ودعواتهم الصادقة كانت بتوصلني وأنا لوحدي في الحجز'.
كما أشارت سلمي إلي المعاملة الجيدة التي وجدتها من ضباط القسم ومن وكلاء النيابة قائلة ' السر إن ضباط قسم العجوزة كلهم باختلاف الرتب كانوا بيتعاملوا معايا 'كإنسانة'.. السر.. إن ملازم أول أصغر مني بكام سنه من القسم قاللي 'لما كنت في ثانوي كنت بتابعك في برنامج 'شبابيك' وأحس إنك أختي أنا، وواثق إنك بريئة.. السر إن رئيس ووكلاء نيابة العجوزة في منتهي الاحترام.. السر إن رئيس نيابة العجوزة رجل عنده ضمير مهني حقيقي، بعد تحقيقات استمرت 3 أيام وبعد ما كتب مذكرة تفيد إني مجني علي ولست مدانة، جه القرار بالحبس قاللي 'انا بعتذرلك'.
ولفتت سلمي إلي أسرتها قائلة 'السر إني لما رجعت بيتي لقيت 'بنتي بتقولي وحشتيني يا ماما.. ودي جملة جديدة اتعلمتها.. السر إني عرفت قيمة سريري، وإني بعد 5 أيام من غير نوم نمت لمدة 6 ساعات فيهم البركة ولما صحيت لقيت 654 'ميسد كول' و 76 رسالة بيباركولي'.
ثم أردفت سلمي قائلة: 'السر إني لقيت اسمي 'ستاتس' علي 'فيسبوك' وأكتر من 30 مقال بأقلام كبار الكتاب عني في الجرايد والاف التويتات بتدعمني.. السر إني حسيت بوجع المظلومين.. السر إني اكتشفت إن الظلم بيقوي.. السر في سبحة 'الطاهر' عمر طاهر.. السر في الاية الكريمة 'لاَّ إلَهَ إلاَّ أَنتَ سُبْحَانَكَ إنِّي كُنتُ مِنَ الظَّالِمِينَ' اللي كتبتها علي جدران الحجز عشان أي حد يدخل الحجز ده يقراها'.
وتابعت سلمة قائلة 'السر إني لقيت الوقت اللي افتكرت فيه كل حاجة حلوة ربنا أكرمني بيها في حياتي، ولقيت نفسي محظوظة جدا بالأهل والأصحاب والاحبة.. السر إن لما افتكروني دراع أبويا عشان يلووه.. لاقوني ضهره المستقيم اللي مايتحنيش.. السر إني افتكرت لما كان أبويا بيقعد معايا بالليل في البلكونة أغنيله 'حبيبتي من ضفايرها طل القمر'، وهو يقرالي شعر من ديوان محمود درويش 'لماذا تركت الحصان وحيدا' ودايما كانت تشغلني جملة في القصيدة دي عرفت معناها دلوقتي 'مثلما كنت تحملني يا أبي'.. ببساطه السر إنك تعرف تشوف 'المنحة' المستخبية في قلب 'المحنة'.
وختمت سلمي مقالها بدعاء قائلة: 'أحمدك يا ربي يا حبيبي يا سندي.. وأشكر كل حد وقف معايا ورد غيبتي ودعالي وساندني'.