السيسي للشعب: "لازم تفضلوا متحدين"

قال الرئيس عبد الفتاح السيسي، إن الدولة اللى زي مصر اللى فيها 100 مليون نسمة عشان تعمل إنفاق كويس حقيقي مناسب لعدد السكان لا يمكن موازنتها تقل عن 18 تريليون جنيه، عشان حد يقولك هعملك تعليم كويس، عشان حد يقولك هعملك علاج كويس.
وتابع الرئيس في كلمته بمؤتمر"حكاية وطن": "الدولة لديها أفكار لمواجهة عجز الموازنة، ومنها التأمين الصحي الجديد، وتنفيذ المشروع على مدار 15 سنة سببه ضعف الموازنة المصرية ولكي يتناسب مع الدخول، وعملنا كمان مطالب فرضناها على أصحاب الدخول المختلفة عشان يكون في موارد تغطي هذا الموضوع، لكن لو دخلنا كان 18 تريليون في الموازنة مكناش عملنا كده".
واستطرد الرئيس:"كان لازم ناخد إجراءات الإصلاح الاقتصادي عشان نقف على أرضية ثابتة لبدء بناء دولة قوية من منظور اقتصادي، وبالطبع في تكلفة كبيرة بتدفع على مستوى الشعب، وشبكة الحماية الاجتماعية كان هدفها تخفيف قسوة الإجراءات الاقتصادية، والكلام ده مش عشان اخوفكوا، متخافوش أبدا غير لو انتوا اختلفتوا وتنازعتوا فتفشلوا وتذهب ريحكم، لازم تفضلوا كده متحدين وقابلوا التحديات بالعمل والأمل".