بالصور: أمين شرطة يطلق النار علي محامي ببورسعيد

اطلق امين شرطه النار من مسدسه علي محامي ببورسعيد اثناء وجوده بسيارته وبجواره زوجته في ساعه متاخره مساء امس امام باب 20 عند سور الميناء بالقرب من قبة هيئة قناة السويس بحي الشرق ببورسعيد وتم نقله الي مستشفي بورسعيد العام
وقال محمد وجدي المحامي المصاب وانا ماشي من عند باب 20 متجه ناحية قبة قناة السويس كان هناك سياره خلفي بتديني نور جامد وانا باعديها جت كسرت عليا نزل منها اثنين امناء شرطه.. امين الشرطة الاول قالي فين رخصك قلت له والله معييش رخص المحفظه نسيتها في البيت قالي ومين الاموره اللي جنبك دي ' بيتكلم عن مراتي ' قلت له وانت مالك مين الاموره اللي جنبي دي بصلي انا واتكلم معايا.. قعد يخبط ع الباب جامد وقالي انزل م العربيه قلت له مش نازل قام مطلع الطبنجه من جنبه وقام معمرها وحاططها علي دماغي قلت له طب وبعدين ولما لقاني مش عايز انزل عايز يضربني بالطبنجه في انفي وانا حشتها وبعد ماحشتها من علي وشي فضل واقف يخبط علي العربيه ويقولي انزل ولما قلت له والله مانا نازل قام ضارب بالطبنجه واطلق النار علي ايدي وهي علي ' الدركسيون '.. وهما كانوا 2 امناء شرطه واحد منهم هرب والثاني كان هيهرب لكن ضابط الجيش اللي عند القبه هو اللي مسكه وهو الوقت في قسم الشرق
ومن جانبه قال صفوت عبد الحميد نقيب المحامين ببورسعيد انه تم اتخاذ الاجراءات القانونيه لدي النيابه العامه بالاضافه الي اتخاذ الاجراءات الاداريه الخاصه بوزارة الداخليه ومديرية امن بورسعيد
وعلي الفور حضر الي مستشفي بورسعيد العام بمجرد العلم بالخبر الدكتور عادل تعيلب وكيل وزارة الصحه وصفوت عبد الحميد نقيب المحامين ببورسعيد كما حضر مساعد مدير امن بورسعيد والرائد مختار السنباري رئيس قسم حقوق الانسان بمديرية امن بورسعيد واطمأن اللواء محمود الديب مدير امن بورسعيد علي المحامي المصاب وامر باجراءا التحقيقات اللازمه للوقوف علي ملابسات الحادث