صباح الورد

مبروك يا دودو!

قال روكا الحرامي للملك رمسيس الثاني: مسُعد بيه أبوشرز بتاع الدخل المحدود حاله عدم وبيهُر ياعم رمسيس. لَمّ عياله الخمسة ومراته وحماته وبقاله جمعتين مستخبي في المنور ورا الماسورة ورابط عينيه بحتة سودا عشان ماحدش يشوفه ، قلت له خايف من إيه يا مسعد بيه .. دي مصر اتغيرت وشبان ميدان التحرير طربقوا العشة علي دماغ الفراخ اللي فيها وربطوا الديوك من رجليهم بدوبارة وسلموهم للنائب العام .
قال الشيخ غريب : الله يعينه !
قال روكا: مُسعد بيه عيط بالدموع وقال لي هو ده اللي أنا خايف منه . سيادة المستشار مش عاتق حد يامعلم .. شغَّال الله ينوَّر تقولش وابور 005حصان . آلاف متكلبشين بحديد علي بابه وكل حي مستني دوره ، وبعدين شاور سيادتك ع الفانلة المخرومة اللي مداري بيها عضمه وقال لي : خايف يبعت ياخدني ويسألني من أين لك هذا ؟ قلت له ضحكتني يا ابو دماغ هربانة . إيش ياخد الريح من البلاط يامُسعد بيه ، أنت يادوبك عضمة قايمة وعضمة نايمة وفوقهم جلدة متغطية بنص فانلة ، لو النائب العام بعت لك روح ومش ح تندم . ح ياخدك بالحضن ويقول لك مبروك يا دودو.. مافاضلش بينك وبين اللحمة غير خطوتين..
قال الملك لروكا: أتصور أن مُسعد بيه أبوشرز والملايين من أحفادي سيخرجون قريبا جدا من زنزانة الدخل المحدود ، بعد التغيير الذي تشهده مملكتي الآن.
قال روكا للملك: مش النظرية سيادتك.. أصل بتاع الدخل المحدود زي السردينة عايم بقاله زمن في زيت التموين، لو الموج حدفه بره ح يقطع النفس ويفطس.. شرب من مية الحنفية لحد ما إتكرع وياما قرقش بسنانه الحاجات اللي بتلعب جواها. نام علي مرتبة خشب وعمل قبقابه مخدة واتغطي بجرنان قديم . بيخاف من الصابونه لاتعضه . لو شاف جزمة في البترينة يسأل البياع بتشتغل بكام حجر بطارية . ده ح يروح الجنة يا عم رمسيس.
قال الشيخ: طبعا.. بيصوم 21 شهر في السنة!
قال روكا: قلت له لو النائب العام بعت لك ماتتأخرش عليه، ح يصورك ألف صورة 6x9 وانت لابس الفانلة والقبقاب، ويحط في ملف كل حرامي صورة .. وساعة التحقيق يقول للحرامي بص للصورة وملِّي عينك منها ، طبعا الحرامي ح يسخسخ لما يشوفها .. بس لما يفوق من الخضة سيادة المستشار مش ح يسيبه . ح يقول له أنت والحرامية صحابك زرعتم في أرض مصر مليون موميا زي اللي في الصورة ، وكل موميا رعرعت وطرحت .. لحد ما ظهر في البلد 06 مليون موميا .
قال الشيخ : 57 مليون يا معلم !
قال روكا للملك : قلت لمسعد بيه فرفش ونعنش وخش بسدرك ع المستقبل . اليومين الجايين بتوعك . ح تقب علي وش الدنيا وتاكل أنت وولادك بدل الطقة اتنين وتلاتة وح يفضل معاك فلوس تشتري حرنكش وتشرب كازوزة ويمكن العملية تضرب معاك وتدوق الفينو والصابونة أم ريحة تخش بيتك زي الأكابر . بس اوعدني تستحمي وإن شاء الله مش ح تموت .. أنا أعرف واحد من بتوع الدخل المحدود استحمي وماماتش .
قال الشيخ: معجزة يامعلم !