نقطة نظام

إنزل بتسريبات السعودية يا بني

أهو دلوقتي حبايبنا عمالين يتكلموا في الفضائيات عن ضرورة المصالحة بين الشعب وبين الإخوان وقايمين بالواجب علي أكمل وجه ومش بيفوتوا أي فرصة تظهر لهم إلا ويتكلموا
لعل وعسي تجيب نتيجة بعدما خابت كل تسريباتنا اللي فاتت وزي ما رحنا زي ما جينا، ياللا يا واد منك له ما تضيعوش الوقت أكتر من كده، إنتم مش شايفين السيسي بدأ زيارته للسعودية من يومين بعد ما كنا متعشمين تسوء العلاقة بينه وبين الملك سلمان، وأهي العلاقات فل الفل والسيسي رايح السعودية يوضب لتشكيل قوة عربية موحدة والتمهيد للمؤتمر الاقتصادي اللي مش باقي علي انعقاده غير كام يوم، والمسائل يا اخويا ماشية تمام ومش عارفين ليه الأمور كل مادة بتخرج من إيدينا وكأن القدر بيعاندنا، آه يا ناري، يعني التسريبات اللي احنا محضرينها لكل مناسبة عشان نوقع السيسي مش جايبة نتيجة خالص؟.. طب ليه؟.. دا احنا مكلفينها الشيء الفلاني وعاملين لها تقنيات علي أعلي مستوي وجايبين عيال عرفوا يجيبوا نبرة الصوت وطريقة الكلام بالضبط، بس مش عارف ليه كل التسريبات اللي بنذيعها للسيسي بتطلع علي فاشوش ومحدش بيصدقها حتي لو كان أهبل وكل محاولاتنا لضرب الأسافين بين مصر ودول الخليج فشلت، والناس سواء في مصر أو في دول الخليج أتاريها هارشة المسائل كلها.. دا احنا ما خليناش مناسبة إلا وأذعنا لها التسريبات بتاعتها، وقلنا إن السيسي بيتكلم علي حكام السعودية والكويت والإمارات كلام مش كويس، إن حد يصدق، أبدا.. إيه ؟.. بتقول إيه؟.. إلا قطر؟.. ما احنا عارفين طبعا إلا قطر، دي قطر هي اللي شايلة الليلة كلها ومش بس من النهارده، ده من يوم ما سحبوا الشرعية عن رئيسنا الشرعي اللي كان متربي عالسمع والطاعة بحق وحقيق، ده حتي في السنة اليتيمة اللي حكم مصر فيها كان المرشد هو الحاكم الحقيقي ورئيسنا كان ونعم خيال المآتة لا أكثر ولا أقل، بس قطر أهي الله ينور مش ساكتة وعاملة شغل تمام، بتمول جميع العمليات الانتقامية بتاعتنا، ومش مقصرة أبدا الله يكرمها، لا في سينا ولا في القاهرة ولا فيه محافظة واحدة فيكي يا مصر إلا وفيها من عملياتنا الانتقامية الشيء الكتير، وآديكم شايفين كل يوم بيسقط من الجيش والشرطة والناس قد كده، ده غير عمليات التخريب والتدمير والحرق والهدم اللي ربنا بيقدرنا عليها، وعشان ندي لكل ذي حق حقه يبقي مش لازم ننسي حماس أبدا ولا ننسي وقفتها جمبنا، الله يسترها ما سابتناش يوم سواء في تدبير عملياتنا اللي الناس بتسميها إرهاب أو في تنفيذها، أماااال، مش برضه حبايبنا وأهلنا وعشيرتنا ومعانا في السراء والضراء.. يبقي جزاءها بعد خدماتها الجليلة دي كلها إن القضاء المصري يحكم عليها بأنها منظمة إرهابية؟.. إيه الظلم ده؟.. بس سيبك إنت، أهو دلوقتي حبايبنا عمالين يتكلموا في الفضائيات عن ضرورة المصالحة بين الشعب وبين الإخوان وقايمين بالواجب علي أكمل وجه ومش بيفوتوا أي فرصة تظهر لهم إلا ويتكلموا عن المصالحة الله يسترهم، وأهو برضه الزن عالودان أمر من السحر، ومسير الناس ترضي والدولة توافق علي المصالحة ونرجع للحياة السياسية في مصر تاني يا جميل، وجايز برضه البلية تدور معانا ونقعد علي كرسي الحكم من جديد، بتقول إيه يااااد؟.. أهو ده اللي مش ممكن أبدا؟.. طب ليه، دا لسه فيه ناس هبلة كتير فاهمين إن احنا بتوع ربنا وعايزين نحكم بالشرع، طب سك بقي عالموضوع دلوقتي خالص لأن فيه شوية صحفيين سامعين كلامنا كله وحينقلوه للناس..