طريق النور

طبق اليوم..

طبق اليوم المصري دايما حصري ومعلوم.. معجون كوابيس وهموم.. وأحلام في منام تحلم بنجوم.. ودموع مع جوع وبشر مفروم.. قلبه موجوع وعيونه غيوم.. وفي ساقية يدور والديل مبروم.. وفي جيبه ربع جنيه مخروم.. ودايما محروم من هدمه نضيفة وغموس مهضوم.. والاسم أهي عيشة.. وتعريشة وحصيرة مفروشة ع الأرض.. بيصلي الفرض لكن قلبه مشغول برغيف العيش والزيت المدعوم.. رغيفين لاتنين والتالت مليان مسامير بتكسر في العضم.. والبدن المهموم.
طبق اليوم تلقاه بس ع الشاشة الغشاشة معجون بخشاف.. وزبيب وسنيبر ولحمة بتلو مشفية ملفوفة مع ورق العنب الشفاف.. يقدمها الشيف الحريف المتشاف.. اللي بيرطن بأسامي الأكلات والوصفات الخواجاتي للهانم والباشا المتغطي بألف لحاف.. المعمولة بمقادير.. ومعاها فطير محشي بالمشروم والرومي والسمان المنتوف م الريش واللكتاف وعليه الصوص المرصوص بعناية وروقان بال للناس الأكيلة.. اللي نايمين للعصر وقايمين يحلبو في لبن مصر اللي نشف علي عوده.. ولسه بيشده في ضرعه ويقلعه زرعه.. ويبيعوا في عرضه وفي أرضه ولا حد دري بيهم ولا شاف..
أما طبق اليوم عند الغلبان.. تلقي الأبدان دايرة حوالين عربية فول مع فحل بصل وبدنجان.. ورغيف تعبان وآخر الليل يروح مهدود الحيل محدود الدخل وقرفان.. ياكل ملوخية أوردحي علي مرقة رجل الفرخة الجربان.. يحمد ربنا إنما هفتان.. علي حتة لحمة من عند الدهان.. أو رطل كباب مع ضاني وطرب.. وشوية سلاطة وخلطة رز.. يقوم شبعان.. وينام للصبح.. يقوم يلقي الحلم إتحقق لابن السلطان.. وابنه يا ولداه مستني في طابور التعيين يمكن يفرجها عليه الديان.. ونهاره الضلمة يبان.. والحزن ببان مفتوحة.. وقلوب مجروحة.. والموت عمال ينسف في طريقه أطفال وشباب جدعان.. والأم الصايمة عن القول.. بتقول صبرني يارب علي فراق ابني وحقه الضايع في الميدان.. وتدعي في كل أدان علي كل جبان.. خطف الفرحة من عينيها وسابها للأحزان.
طبق اليوم المصري حصري بجد.. مستني القرض بالطول والعرض.. يفك الضيقة.. وبلدنا حريقة.. والسيف بقي فرض ورئيس وزرا.. سايب الجزرة في بق السبع.. وبيتكلم عن صدر الأم اللي بقي حاله يُغم.. وإنه لازم يتنضف وياخد ميت فوم علشان النونو يكبر في أمان مش شايل هم.. وناس تتعين تتشال الصبح .. عايشين في القُبح ونازلين ضرب ونبح.. ست شهور عدوا علينا وحالنا من غم لغم عمال بيُضم.. وحدودنا مفتوحة لولاد العم.. وهمنا زاد وطفح وبقي فوق الكيل.. والبهوات صُم بُكم وبهية المنسية.. عماله بتغزل برجل حمارها الميت.. وكلاب الدنيا المسعورة بتنهش فيه وتلم.. امتي ياربي ينزاح الهم وتيجي الحرية راكبة حصان.. يجري بينا زي الرهوان نلحق قطر الدنيا اللي سابقنا بكام مليون سنة وعارف قيمة البني آدم.. وعارف قيمة الدم.