مقامات حلمنتيشي

بلاش وجع دماغ .. إحنا عندنا 100 ألف بلاغ !!

حدثنا الغلبان بن تعبان .. قال : اتصلت بالباشا (مشالي)/ المسئول صاحب المقام العالي/ ودار الحوار التالي : إلحقنا يا بيه/ مالك يا مواطن فيه إيه ؟/ إحنا سكان حي المعادي/ وشعارنا (بحبك يا بلادي)/ وقد انفجرت بلاعة المجاري/ وغرّقت الشوارع والحواري/ إلحقنا يا أستاذ مشالي/ طيب وأنا مالي ؟!/ مالك إزاي دي غرقّت المساكن ؟/ وإيه يعني يا مواطن ؟!/ يعني يا تلحقونا يا ما تلحقوناش/ مش هانلحق وان شالله تروحوا بلاش/ يا أفندم المشكلة مش بس في البلاعة اللي انفجرت/ المشكلة في الحشرات اللي طلعت/ حشرات من جميع الماركات/ بالمئات ويمكن بالألوفات/ منها صراصير فتوات/ لا تٌخيفها المبيدات/ وخنافس فوضوية/ وعِرس إرهابية/ وعقارب مستخبية/ وثعابين وفئران/ وأبراص وديدان/ فشخط المسئول في حضرتي/ وقال : كفايه قلبت معدتي/ فقلت : وفيه اعتصامات وإضرابات/ من ائتلافات الحشرات/ وفي كل خرابة 100 بوستر/ ريحتها وحشه قوي يا مستر/ فقال مشالي المسئول/ ببرود غير معقول/ بلاش وجع دماغ/ عندنا غيرك 100 ألف بلاغ/ اعرفوا خلاصكم مع بعض/ واللي مش عاجبه يعض في الأرض/ فقلت : طيب ورحمة أمي شربات/ لأفضحكم في الفضائيات/ واكشف بلاويكم/ والعالم يتفرج عليكم/ فخاف من تهديدي/ وأراد أن يتفادي وعيدي/ فقال : طيب اهدأ يا غلبان/ واديني العنوان/ وبعد لحظات/ وصلت عربات/ محملة بالسلاح والقوات/ وطاردوا طابوراً/ فيه 90 صرصورا/ يتزعمهم صرصور/ يهدد بالويل والثبور/ فطبطبوا عليه/ وقالوا له : طلباتك إيه ؟/ فقال نريد بلاعات جديدة للصراصير/ مزودة بالتكييف والميه والنور/ فقالوا : حاضر من عنينا/ وحقك علينا/ معلش ياسي صرصور/ وامشِ علي جنب يا (أمّور)/ وما تعطلش المرور/ ووجدوا خنفسة/ عاملة زعيمة وريّسة/ ومعها مجموعة خنافس/ وهددت بإشعال الغاز وتدمير المحابس/ فقالوا : عيب يا خنفسة/ أنت بنت أصل وكويسة/ طلباتك مجابة/ أنت وجميع الخنافس الغلابة/ وشغلوا لها/ الخنفس ابنها/ في وظيفة علشان يتمريس/ بمرتب كويس/ وقد وقف العقرب/ يستعرض ويتشقلب/ ويتفنن في اللدغ والقرص/ ثم ظهر برص/ وخطف دودة/ من عائلتها السعيدة/ وطالب أهلها بفدية نقدية/ أو فيلا في شاطئ عايدة هدية/ وهدد أن يجعل عيشتهم مطينة بطين/ فدفعوا له الفدية صاغرين/ وتم تنفيذ جميع الطلبات/ لإرضاء وإقناع الحشرات/ بالعودة إلي البلاعات/ ولكن للأسف كلما قفلنا بلاعة/ انفتحت أخري بعد أقل من ساعة/ حتي أصبحنا مرعوبين/ وبالحشرات محاصرين/ فهذا صرصار بلطجي/ وذلك عقرب عربجي/ وتلك عِرسة مفترية/ تقطع السكك الحديدية/ وهذا فأر احترف الإرهاب/ وتخصص في الإضراب/ وذاك برص كثير الطلبات/ وصوته عالٍ في المظاهرات/ وللأسف لجأنا لجميع الجهات/ لتطهير هذه البلاعات/ فقالوا كان بودنا يا حضرات/ ولكن توجد معاهدات واتفاقيات/ مع جمعية الرفق بالحشرات/ وسلامات سلامات/ يا حبايب سلامات/ وإياك تدوس علي برص أو صرصار/ لتلاقي البلطجية ضربوك بالنار !!