اختراق

عمرو الليثي: مثلما عاش غامضا أبى على مايبدو أن يموت إلا بصورة أكثر غموضا إنه الدكتور أشرف مروان الذي هوى من شقته في الدور الخامس بمبنى " كارلتون هاوس" بالعاصمة البريطانية لندن هل قتل أم أنتحر ؟ سؤال نبحث عن إجابة شافية له من العاصمة البريطانية لندن ملف من قتل أشرف مروان
فاصل
عمرو الليثي: لم يكن منطقيا ان تتم عملية تأمين المبنى الذي يسكنه دكتور أشرف مروان بطريقة التأمين العادية لمبنى سكني في حي من أحياء لندن فالمبنى لم يكن يقع في منطقة معزولة أو منطقة عشوائية مكتظة بالسكان بل إن الرجل كان يسكن حي وكان الجار الأقرب لأهم الشخصيات الإنجليزية وعلى رأسها الملكة إليزابيث ووزير الخارجية البريطاني والعديد من أعضاء مجلس العموم فهل يعقل أن يكون تأمين مبنى في هذه المنطقة الهامة مقصورا على رجل أمن عادي يقف في بوابة أي مبنى في لندن !!
فاصل
عمرو الليثي: المبنى مؤمن جدا وصعب دخوله حاولت أخش هناك المبنى والحارس منعني وقدرت أخشه بشكل - صحيح شكل غير شرعي - لكن دخلته عشان كده أنا مندهش ليه مبنى زي دا غير مؤمن
أ / جمال مروان – رجل أعمال ونجل الراحل أشرف مروان :أنت عارف أنا عندي اهه 40 سنة لكن قضيت سن المراهقة في المبنى دا دعاني انا واصدقائي والمفروض صحابي ما يجوش والمفروض انا مخرجشياما صحابي جم وياما انا خرجت
عمرو الليثي: وانت انا طالب منك تصريح ان انا اخش البيت من جواه بشكل رسمي شرعي واخش الشقة اصورها عشان نقدر ندي للناس طبيعة ما دار في مسرح الجريمة
فاصل
عمرو الليثي: من امام الدكتور اشرف مروان تحديدا في الدور الخامس في مبنى " كارلتون هاوس " هنخش مع بعض الشقة هنشوف ايه اللي حصل هنشوف البلكونة هنتعرف على الكثيرمن التفاصيل حوالين هذه العملية على فكرة عايز اقولكوا حاجة " سكوتلانديارد " شككوا في نقطة مهمة قوي قالوا احتمال انه يكون احد الزوار اللي جاله يوميها وهو ماشي ماقفلش الباب وراه كويس ونتيجة لكده ان اي حد ممكن ييجي يزق الباب يتفتح الباب في ايده ويخش الشقة وبعدين يعمل الاتي دي شقة الدكتور مروان اهه زي ما انتوا شايفين دخل الشقة زي ما انتوا شايفين الشقة عبارة عن شقتين مفتوحين على بعض جزء بيقعد فيه الدكتور مروان والجزء التاني بيقعد فيه بعض اهل البيت والخادمة اللي موجودة في المنزل هنشوف بقى البيت تعالوا اتفضلوا هنا السلاملك بتاع الدكتور اشرف مروان اللي صوره وصور الرئيس الراحل جمال عبد الناصر بتزين المكان من الداخل وصور احفاده وصور ابنائه والكثير من المتعلقات الشخصية الخاصة بيه زي ما انتوا شايفينها من هنا نقدر ندخل على الاوضة اللي كان دائما الدكتور اشرف مروان بيقعد فيها هنا كان مكان جلوس الدكتور اشرف مروان المكان اللي بيلاقي فيه نفسه كان بيقعد هنا ودي بتاعته ودا الكرسي اللي بيقعد عليهكان بيحط عصايته والبلطو بتاعه في هذا المكان وكان دايما دي الاوضة اللي بيلاقي فيها نفسه على فكرة هنشوف هناك على الحيطة صورة للرئيس جمال عبد الناصر اظن الصور كلكوا عارفينها هي اصل الصورة اللي ظهرت على صحيفة التايمز الماضي وكانت من اهم واشهر الصور للرئيس جمال عبد الناصر البوليس لما جه هنا اكتشف الاتيلقوا عصاية الدكتور مروان موجودة هنا هو في هذا المكان عشان نوري للناس الوضع ايه العصاية كانت هنا في هذا المكان وهي دي البلكونة طبعا البلكونة كانت مقفولة لكن فيه مكان تاني ممكن نخش منه للبلكونة هاوريهولكوا تعالوا اتفضلوا معايا احنا داخلين على مكان من الاماكن الخاصة ويعني انا بشكر اصحاب البيت انهم سمحوا لي ان احنا ندخل هذا المكان هنا غرفة اللي يهمني في الغرفة البلكونة زي ما انتوا شايفين كده البلكونة تتفتح من هذا الباب الباب دا بيتفتح ويقف لغاية هنا لانه هوالباب مش ممكن يتفتح اكتر من كده دا معناه ان دكتور مروان لما دخل دخل كده – اذا افترضنا ان هو دخل- خشوا معايا كده وشوفوا تحت البلكونة طبعا كانت فيه كمية زرع من الموجودة حاليا زي ما انتوا شايفين كده سور البلكونة مرتفع المكان مغطى بالزرع من كل الاماكن هنمشي مع بعض هنجد هنا فيه جهاز تكييف وهنا فيه شجرالبلكونة هنا والبلكونة من تحت كمان ليها درابزين يعني ايه يعني هل يستطيع رجل بيمشي على عصاية ان هو ينط من البلكونة ؟ طب نشوف كده انا عايز انط من البلكونة هاعمل ايه هاضطر ان انا اعمل كده واعمل كده عشان اقدر انط هل الدكتور اشرف مروان يستطيع ان هو يعمل الوضع اللي انا عامله !! ما اعتقدش ثم المكان اللي وجدوا فيه جثمان دكتور مروان زي ما انتوا شايفين تحت في مكان الورود يبعد مالايقل عن 10 متر من المبنى نفسه دا معناها ان فيه حد دخل سابوا العصاية بره وراحوا ماسكينه شايلينه راميينه لان هو لو رمى نفسه هينزل فين ؟ لو رمى نفسه هينزل كده مباشرة تحت مش هينزل كده مش هينزل بعيد عن المبنى هينزل تحت المبنى مباشرة ثم فيه نقطة مهمة كده اذا حب يتحرك زي ما انتوا شايفين هنا فيه اكتر من عائق غيرالزرع فيه هنا مصطبة محطوطة على الارض ارتفاعها تقريبا 20 سم والطول لايقل عن 2 متر بتمنع اي حد انه يتحرك يعني عايزة سوبر مان عشان يطير من هنا مش رجل عنده مشكلة في ركبته تمنعه حتى من انه يتحرك حتى التكييف يمنع اي حد من انه يقفز من هنا وهنا فيه تكييف تاني بالاضافة لنقطة مهمة قوي ان هنا في الدور الخامس مفيش حد حواليك انه يقدر يشوفك زي ما انتوا شايفين لقوا ان السلك اللي نازل من سطح العمارة مقطوع فيبدوا انه تم استخدامه في هذه الجريمة البشعة عشان ااكد لكوا كلامي تعالوا نشوف الحمام عشان الدكتور مروان في الايام الاخيرة بتاعته كان لايستطيع ان هو يتحرك كان لا يستطيع ان هو يقدر يرفع رجليه يبقى ازاي واحد ما يقدرش يرفع رجليه يقدر ينط من البلكونة !! تعالوا نشوف عمل ايه في الحمام بتاعه عشان ظروفه الصحية
الدكتور مروان في ايامه الاخيرة كان لا يستطيع في هذا الحمام انه يرفع رجليه عشان خاطر يخش يستحمى في هذا البانيو لانه هو مش ممكن يقدر يمسك نفسه هو راجل مريض بمرض يمنعه ان هو يقدر يقف ثابت فعملوا له حاجة خاصة جدا عملوا له دش خاص بالقاعدة يقدر يطلع عليها عشان يقدر يخش الحمام لان هو لايستطيع انه يرفع رجليه 50 سم اذا كان لايستطيع ان يرفع رجليه 50 سم فهل يستطيع ان هو يرفع رجليه المسافة اللي انا وريتهالكوا جوه في البلكونة اللي هي قد تقارب المتر تقريبا !!بالتأكيد مستحيل
فاصل
امجد سلفتي : يمكن اواحتمال عالي انه يكون هناك جريمة قتل منها ان الانتحار اتى من فوق balcony" " منصة مرتفعة بعض الشئ ومعروف ان الدكتور اشرف مروان كان بيعاني وماكان عنده الطاقة انه يطلع ويصعد ويتسلق ويرمي نفسه فبالتالي هذا دليل بسيط لانه اي انسان ليس متخصص في التحقيق الجنائي ان يقول انه ربما ان هناك من ساعدهالمساعدة في الانتحار في بريطانيا هي ايضا جريمة قتل
فاصل
عمرو الليثي: هو جسمانيا يستطيع ان يلقي بنفسه من شرفة منزله
د/سميح عامر- مستشار بالسفارة المصرية بلندن: ماهو اي حد ماشي على عكازين يرمي نفسه
عمرو الليثي: لا هو السؤال هنا ليه شق هو اللي رمى نفسه ولا طلب من حد انه يساعده انه يرمي نفسه ولا حد رماه طبعا دي وجهة نظر جنائية اخرى يعني اذا كان هو عاوز ينتحر يقدر ينتحر لوحده ولا لازم حد يساعده مروان اللي ماشي على عصاية اللي انت شفته قبلها باسبوع
د/سميح عامر: لا مع استبعادي تماما هذه الفكرة طبعا ممكن ينتحر بنفسه
فاصل
د/ وفيق مصطفى : كانت حالته الصحية تعبانة جدا جدا جداانا كنت لا اتصور انه يقدر يطلع سلم
عمرو الليثي: ماكنتش تتصور ان ممكن يطلع سلم
د/ وفيق مصطفى: يعني طلع 4 درجات سلم كان ضعيف جدا كان فقد وزن كثير جدا كان نحيف للغاية وكان وجهه شاحب للغاية وكان يبدو عليه انه راجل مريض جدا
عمرو الليثي: هل كان بيتكئ على عصاية ولا بيمشي بشكل طبيعي
د/ وفيق مصطفى : لا ماكانش بيمشي بشكل طبيعي كان بيتكئ على عصاية كان شكله زيادة في السن 20 سنة فوق سنة
عمرو الليثي: طب هل واحد بالحالة الصحية دي كطبيب يقدر انه يرمي نفسه من البلكونة
د/ وفيق مصطفى : لا
فاصل
عمرو الليثي: طبعا حد يسألني يقولي طيب الدكتور مروان لما كان موجود هنا في هذه الغرفة الشغالة كانت موجودة فين ؟ من فضلكوا تعالوا معايا الشغالة ماكانتش هنا ولا في الصالونات ولا في مدخل الشقة معلش المسافة طويلة لكن انا عايز اوريكوا بالتفصيل وبدقة فين كانت الشغالة احنا داخلين دلوقت في ملحق آخر للشقة ومكان تاني زي م انتوا عارفين دول شقتين مفتوحين على بعض الشغالة كانت في مكان بعييييييد جدا عن مكان الدكتور مروان كانت في هذه الغرفة الصغيرة الشغالة كانت هنا كانت بتكوي مستحيل تقدر تسمع او تشوف اي حاجة لانها كانت بعيدة كل البعد عن المكان اللي كان الدكتور مروان فيه
أ / جمال مروان: شقتنا في لندن هما شقتين لازقين في بعض فهي كانت على اكثر حتة بعيدة في الشمال بتكوي والدكتور كان في الشقة التانية الناحية اليمين الشقة اللي هي كانت فيها لها مدخل الناحية اللي فيها الدكتور ليها مدخلين هي كانت في اوضة بتكوي والهليكوبتر شغالين وما حدش يقدر يسمع اي حاجة في نفس الوقت هي شقة ما تقدرش تسمع خالص
اللي انا عرفته منها ان آخر حاجة قبليها بنص ساعة نزلي الشنط السواق جه نزل الشنط قبليها بتلت ساعة هي رايحة تكوي هو بيشرب شاي وهينزل وهيبلغها طبعا قبل ما ينزل والشنط نزلت وكله تمام وبعد كده هي عرفت من الامن اللي تحت اللي اتكلم قال الدكتور اشرف لقيناه في الجنينة عشان وقع من البلكونة
فاصل
عمرو الليثي: احنا كمان في مدخل – يمكن الشقة دي ليها مداخل كتيرة – دا المدخل التالت للشقة بافتحه وانور النور زي ما انتوا شايفين كده بيوصل على مكان خلفي للعمارة ممكن جدا انه يكون الجاني استخدمه يدخل الى داخل هذه الشقة
فاصل
عمرو الليثي: هنا المكان اللي لقوا فيه جثمان الدكتور اشرف مروان لقوه على بعد مسافة لاتقل تقريبا عن 8 متر من المكان نفسه من المبنى نفسه ازاي ؟
اذا افترضنا ان الدكتور اشرف مروان رمى نفسه من البلكونة اللي فوق في الدور الخامس دي يبقى المفروض ان هو لما يرمي نفسه ينزل فين ؟ انا هاقولكوا المفروض ينزل فين عدوا معايا كده آدي المكان اللي فيه الورد ( يعد بالخطوات ) 1 ، 2 ، 3 ، 4 ، 5 ، 6 ، 7 ، مش هاعرف اكمل ، لكن فيه 7 زيهم قدامي يعني على الاقل 10 متر يعني الدكتور مروان اذا كان رمى نفسه من البلكونة اللي في الدور الخامس كان نزل هناك وقدامكوا البلكونة اهه ( مشيرا للبلكونة بالدور الخامس )اذا واحد رمى نفسه من هذه البلكونة هينزل فين ؟ هينزل هنا ( مشيرا إلى الأرض أسفل البلكونات مباشرة ) طب واللي فوقيها ؟ هينزل برضه هنا ( مشيرا إلى الأرض أسفل البلكونات مباشرة )طب اللي فوقيها خالص اللي في الدور الخامسينزل برضه هنا ( مشيرا إلى الأرض أسفل البلكونات مباشرة )دا معناها ان كل الدلائل العقلية بتؤكد ان الدكتور مروان ما انتحرش اللي بيأكد اكتر دا ان العاملة اللي بتعمل في الدور الرابع وهي بتسقي الزرعموطية منكبة بتسقي الزرع سمعت صرخة رفعت راسها رات حاجة بتهوي على الارض زي ما قالت في التحقيقات هو اللي هينتحر هيصرخ ليه !!
كل الدلائل تؤكد ان الدكتور اشرف مروان تم القاؤه من شرفة منزله في الدور الخامس في " كارلتون هاوس " ولذلك فان الجثمان لم ينزل في وضع رأسي وانما نزل بعيدا تماما عن المكان الذي كان يجب ان ينزل فيه اذا كان قد انتحر
فاصل
عمرو الليثي: هل تتذكر بالتحديد المكان الذي سقطت فيه الجثة؟ اريد ان ارى في اي مكان
تروي كفيلو(صحفي امريكي وشاهد عيان) : على مسافة قدمين
عمرو الليثي: هل تحدثني عن وضع الجثة في الحديقة بعد سقوط دكتور مروان مباشرة هل كانت تحت المبنى رأسيا من الدور الرابع اعني ام على بعد بعض الامتار
تروي كفيلو: اذا افترضنا ان هذا هو المبنى فانه وقع على بعد 4 امتار منه واعتقد انه كان ممدا في هذا الاتجاه راسه باتجاه المبنى وارجله للجهة الاخرى على بعد 4 امتار
عمرو الليثي: وهل بدا انه تم دفعه ام انه سقط ؟
تروي كفيلو: حقا لست متأكدا
عمرو الليثي: منطقيا
تروي كفيلو: ربما يكون دفعه احد او قفز هو للامام بقوة
عمرو الليثي: ولكن الا ترى ان المسافة بعيدة عن المبنى اقصد ان احدا دفعه لانه لم يسقط تحت المبنى مباشرة في نفس المكان ولكن لو دفعه احد سيكون على مسافة بعيدة مثلما حدث
تروي كفيلو: نعم لقد نزل بعيدا
عمرو الليثي: لو افترضنا ان احدا دفعه
تروي كفيلو: ربما
عمرو الليثي: تقريبا ماهي النسبة
تروي كفيلو: 50 %
فاصل
أ / جمال مروان: 100 % انه حد زقهانت المسافة مابين البلكونة ومكان ما لقوا والدي الله يرحمه 10 او 11 متر حاجة زي كده مسافة بعيدة جدا وانا والدي كان عنده 61 سنة وكان عنده مرض في الرجل وكان ماشي بعصاية ولقوا العصاية في بتاعته فدا يدل يعني لو البلكونة هنا وحد ماشي بيمشي بعصاية وعنده مرض في رجليه انه ما يقدرش يمشي من غير عصاية وما يقدرش حتى يخش البانيو اللي على ارتفاع دا اظن ارتفاع الترابيزة كده 40 سم علشان يعتبر عالي فكان دايما يستعمل الدش ازاي يقدر يروح البلكونة والمسافة اللي بين البلكونة والحيطة حتة قد كده ويطلع حاجة ارتفاع متر ونص ويطير 10 متر لقدام وهو ما يقدرش يخطي ال40 سم !!
فاصل
لواء / سامح سيف اليزل ( الخبير الأمني و الإستراتيجي ) : هناك مسافة طويلة بين مكان الجثة ومكان البلكونة يقع تحت البلكونة مش هيرمي نفسه قدام 8 او 10 متر عشان يقع بعيد عنها والحالة الصحية كمان بتاعة دكتور اشرف ماكانتش تسمح له بهذا اذن هو عملية القاء الجثمان او القاء الشخص قبل مايبقى جثمان من البلكونة
فاصل
عادل حمودة ( الكاتب الصحفي ) : ايضا اضافت منى عبد الناصر قالت ان اشرف مروان لم يكن يستطيع انه يقدر يمشي عنده ازمة حقيقية في رجليه فما بالك انه يصعد الشرفة وينتحر !!
اضيف الى ذلك انها قد قالت انه عندما وجدوا اشرف مروان على الارض كان لابس البالطو بتاعه وكان نايم على ضهره وغالبا اللي بينتحر بيقع على وشه يعني حسب بعض التفسيرات
فاصل
امجد سلفتي ( المحامي و المستشار القانوني بلندن ): نشر في الاعلام واعتقد انها الجهة الحقيقية التي تحقق في الموضوع اكثر من الشرطة البريطانية هناك شاهد تقدم للسلطات الامنية البريطانية وصرح انه شاهد شخصين على ذات المنصة قبل ان يرمى بالجثة فهناك شخصين مما يعني ان العملية في الانتحار ام كانت بمساعدة او كانت محاولة قتل او كانت عملية قتل مش محاولة قتل
فاصل
عمرو الليثي: هل تتذكر ما اذا كان جسد مروان عندما وقع هل سقط امام المبنى مباشرة ام انه وقع على بعد بضعة امتار من المبنى هل تتذكر ذلك
جوزيف ريباسي – شاهد عيان على الحادث : اعتقد ان مروان لم يكن قريبا من الشرفة
عمرو الليثي: ارجو ان تركز جيدا في سؤالي
جوزيف ريباسي :أنني أحاول
عمرو الليثي : هل تتذكر هل كانت الجثة ملقاة امام المبنى مباشرة في وضع رأسي ام انه سقط بعيدا بعض الامتار عن المبنى
جوزيف ريباسي : اعتقد انها لم تسقط في وضع صحيح ولكنها كانت بعيدة عندما رأيته ، رأيته لمدة ثانيتين فقط وهذا وقت غير كافي لتحديد اية معلومات ولكنه لم يكن قريبا من المبنى حيث توجد الشرفة
عمرو الليثي: تعتقد لما
جوزيف ريباسي : اعتقد لا اعرف الاجابة ربما قد يكون احد ما ساعده على مثلا السقوط
عمرو الليثي: ساعده على السقوط!!
جوزيف ريباسي : لايمكنني التخمين لكن الخلاصة انه لم يكن في حالة تدفعه للانتحار
عمرو الليثي: الصحفي راجيب سيال هو صحفي في صحيفة ال "Times "وهي اوسع الصحف البريطانية انتشارا كان له راي اخر في قضية مقتل الدكتور اشرف مروان حيث كتب عدة مقالات اكد فيها انه لم ينتحر وان الشرطة البريطانية قد تجاهلت الكثير من المعلومات حول مقتل مروان كما كشف راجيب سيال لاول مرة ان مروان قام بكتابة مذكراته والتي قد تكون الدافع الرئيسي وراء عملية اغتياله
فاصل
عمرو الليثي: ماهو رايك الشخصي في قضية اشرف مروان
راجيف سيل – صحفي بجريدة تايمز البريطانية :انا ليس لدي راي شخصي عما حدث ولكن استطيع ان اقول ان بعض المصادر المقربة جدا من التحقيقات تؤمن بان اشرف مروان قد قتل وانها جريمة قتل وبالتاكيد لدى هؤلاء الناس الذين يرون أنه قتل اسباب دفعتهم لهذه النتيجة
فاصل
لواء / سامح سيف : هو " سكوتلانديارد " اعلنت طبعا شخصية كبيرة وشخصية لها اسمها والمفاجأة كانت شديدة لدرجة ان هما حبوا يخدوا وقت شوية لغاية ما طلعوا البيان اللي هو طلع وكان بيان سريع كان متعجل بالنسبة لجهة كبيرة زي " سكوتلانديارد" انها تقول انه هو حادثة انتحار انه يطلع بيان سريع بهذا الوضع كانوا بيحاولوا يخلوا مسئوليتهم او على الاقل يقفلوا الموضوع من اوله بدون ما يخشوا في مشاكل بتاعة بحث وتحري على ما تم
فاصل
عمرو الليثي: سكوتلانديارد في بداية التحقيقات تبنوا فكرة ان الوالد انتحر، على اي اساس
أ / جمال مروان: اول ما جم البوليس كان مركز على رئيس الوزرا والملكة رقم اتنين ما كانوش عارفين مين دا رقم تلاتة حد جه قال انا شفت فعلى اول شعرة للبوليس يجيله فرصة انه يقفل ملف –هو معندوش اي فكرة مين اللي موجود – اقفل خلاص مع السلامة شكرا لهذا السبب بعد شهر اكتشفوا هو ايه اللي احنا عملناه دا وضغط من العيلة جامد هو اللي قال لنا اي حاجة كان خلفيته ايه ؟ طب هل اي حد تاني شاف حاجة ؟
فاصل
جوزيف ريباسي – شاهد عيان على الحادث: بعدها غادرت مبنى المديرين حيث كان من المفترض ان يعقد اجتماع في هذا اليوم الذي وقعت فيه حادثة اشرف مروان توقعت اتصال من سكوتلانديارد ليتم التحقيق معي ولكنهم اتصلوا بي بعد عدة اسابيع من الوفاة
عمرو الليثي : شهر تقريبا
جوزيف ريباسي : نعم شهر تقريبا يجب ان اراجع مفكرتي للتأكد ولكن في الغالب بعد شهر
عمرو الليثي: تعتقد لما هذا الوقت الطويل ؟
جوزيف ريباسي: ربما كانوا سيغلقون الملف قبل أن يستجواب اي شخص لاعتقادهم انها جريمة انتحار وليست جريمة لقتل الدكتور اشرف مروان
عمرو الليثي: هل شعرت ان سكوتلانديارد قد اخذوا شهادتك باهتمام ام فقط للانتهاء من التحقيق وإغلاق ملف جريمة قتل اشرف مروان
جوزيف ريباسي : لا استطيع ان اعلق على تحقيقات سكوتلانديارد حقا انا لاعرف تلك التفاصيل ولكن من خلال اللقاء مع رجال الشرطة اخذت انطباع انهم حقا جادين جدا وانهم يعتقدون انه انتحار في الاغلب
فاصل
عمرو الليثي: ماهي الادلة المفقودة من سكوتلانديارد في قضية اشرف مروان
راجيف سيل – صحفي بجريدة تايمز البريطانية: مانعرفه حتى الان ان هناك بعض الادلة مفقودة من قبل سكوتلانديارد ولم يعثروا عليها حتى الان مثلا حذاء اشرف مروان والذي كان من الممكن ان يحتوي على ادلة هامة تساعد في هذه القضية مثل نوع الطلاء او الاتربة العالقة به وما الى ذلك والتي تفيد في القضية ومن الممكن ان تؤخذ لتأكيد نفي القاءه من الشرفة اوقفزه بارادته منها ، أنتحارة أعني وهذه علامة استفهام هامة جدا
عمرو الليثي: وبالنسبة للحذاء
راجيف سيل: الحذاء نعم الحذاء قد يحتوي على ادلة يمكن تحليلها وربطها ببعضها لتستخدم كدليل لمعرفة ملابسات وفاته على سبيل المثال لو كان الحذاء يحتوي على آثار طمي الزرع الموجود في الشرفة التي من الواضح أنه مات منها فيمكن استنتاج انه وقف على حوض الزرع ليلقي بنفسه من الشرفة لهذه الاسباب تكون الاحذية دليلا في هذه الحالات الشرطة لم تعثر على الحذاء حتى الان
فاصل
لواء / سامح سيف: هناك تلاعب حدث يعني هل هو مثلا قصد من سكوتلانديارد هل هو احد الناس التي دفعت الى ان تسحب الحذاء بصفته احد الادلة هناك طبعا علامة استفهام كبيرة جدا على موضوع الحذاء ولكن انا تصوري انه بفعل فاعل ماهواش شئ غير مقصودهو مقصودفقدان الحذاء كان شئ مقصود لطمس احد الادلة الكبيرة اللي كانت هيستدل بيها في البحث
فاصل
جمال مروان: دمروا ادلة
عمرو الليثي: زي ايه؟
جمال مروان : زي حاجة مهمة جدا الجزمة بتاعته انا جيت مصر يوم السبت واستلمت حاجات والدي يوم الجمعة هدومه الخاصة الشنط اللي كانت في العربية كان مسافر بيها فأول ماروحت قلتلهم كلمتهم في التليفون انتوا ما اديتونيش الجزمة وانا باستلم الحاجة اكتشفت - بيدوك الحاجة في اكياس مبرشمة - ان الكيس اللي فيه الاجندات بتاعة ابويا هي كانت حياته خمس اجندات صغيرين كده وكل واحد يناير كل سنة يجيب الاجندات السنة اللي بعديها وينقل كل المعلومات ويحتفظ بالقديمة الكيس دا البرشام كان مقطوع في الاجندات بتاعته !!
سألت البوليس ليه لعبتوا في الادلة بصوا لبعض وقالوا مانعرفش احنا سلمناها في المخزن تحت متبرشمة دلوقت هي جاية البرشام مكسور فيه حاجة ناقصة؟ ما نعرفش طيب لو سمحت ايد انك انت لعبت في الادلة فأيده انا معرفش دي الاجندات كلها ولا فيه اجندة ناقصة ولا فيه ورقة طايرة لما روحت قلتله جزمة والدي انت نسيت تديهاني قاللي طب ممكن نستنى ليوم الاتنين اصلها الجمعة بعد الضهر دلوقت فداخلين ع الweek end وهاضطر انزل حد من البوليس من بيته لسكوتلانديارد عشان يبص لك في المخزن قلت له مفيش مشكلة جينا مصر الجنازة كانت يوم الأحد أتصلت بيهم الأتنين قلت له لو سمحت الجزمة قاللي متأكد ان احنا ما ادينهالكش قلت له طبعا متأكد عشان كده كلمتك يوم الجمعة وانت نفسك اعترفت قاللي طب احنا عندنا مشكلة احنا مش لاقيينها قلت له افندم !! قاللي مش لاقيينها بس ان شاء الله هنلاقيها بعديها ب3 ايام قالوا لقينا الجزمة قلت الحمد لله بعديها ب3 ايام احنا ضيعنا الجزمة تاني !! بعديها بيوم احنا دمرنا الجزمة بالغلط !! انت هتقول ايه بقى !؟ دا البوليس بتاع سكوتلانديارد
عمرو الليثي: وايه مبرراته
جمال مروان: احنا آسفين واحنا عارفين ان دي هتبقى مشكلة في التحقيق بس الجزمة ضاعت وبالاصح الجزمة اتدمرت واحنا بنعتذر وما عندوش مبرر عيني عينك! طب الادلة اللي انتوا لعبتوا فيها مانعرفش حصل ايه طب مين اللي عمل كده مانعرفش واحنا آسفين عيني عينك! فقط بعد كده واحنا كعيلة حطينا ضغط عليهم وشهود جداد طلعوا واكتشفوا مين دا اكتشفوا لا احنا لازم نعمل INVESTIGATION بس بعد ضغط
فاصل
عمرو الليثي: استاذ امجد انت كمحامي هنا في بريطانيا كيف تقيم مسألة التحقيقات في قضية مقتل الدكتور اشرف مروان
امجد سلفتي – محامي بلندن: يعني شئ مفاجئ في القضية التي تتعلق في وفاة المرحوم اشرف مروان انه البوليس اغلق ملف التحقيق مبكرا وبالتالي هناك اجراء بنقل الملف الى القاضي التشريعي واعتقد ابتدأ البحث في عملية سبب الوفاة من قبل المحكمة الشرعية واعتقد هذا خطأ لانه عادة الاجراء الصحيح هو اغلاق ملف التحقيق تماما بعد اكتشاف كافة المعلومات والنظر الى كافة الوثائق والتحقيق مع كافة الجهات خارجية أو بداخل بريطانيا ثم نقل الملف الى القاضي التشريعي لكن كما ترى في الوقت الحالي هناك معلومات مازالت بتورد من ضمنها شهود ظهروا مؤخرا من قبل الاعلام من قبل سكوتلانديارد الجهة التي تحقق بان هناك بعض المفقودات تم الحصول عليها من شقة المرحوم وتم فقدها وايضا اعتقد هناك وثائق منها مذكرات يزعم انه المتوفى كان بيكتبها بآخر ايام حياته دي ايضا فقدت
فاصل
عمرو الليثي: هل لديك فكرة عن المذكرات التي كان سيكتبها اشرف مروان والتي كما يقول بعض الاشخاص كانت سببا في قتله حيث كانت متعلقة بالحياة الخاصة بأشرف مروان كما كانت تحتوي على بعض الاسرار
راجيف سيل- صحفي بالتايمز: من ضمن الاشياء الهامة التي تم اكتشافها هو اختفاء المذكرات هذه المذكرات كانت كاملة ومفصلة ولم يتبق من كتابتها سوى الفصل الاخير منها ومن الواضح ان المذكرات اختفت من شقة اشرف مروان في نفس يوم وفاته وهذا طبقا لما اكده اصدقائه وافراد عائلة مروان هذا الوضع يثير الشكوك حول اسباب الوفاة في اليوم نفسه الذي كان من المفترض ان يسافر الى الولايات المتحدة لكتابة الفصل الاخير من المذكرات كل هذه الملابسات تدفعنا الى معرفة نوع ومستوى الجريمة وهذا هو الواقع الفعلي لنوع الجرائم التي تحدث وتتكرر في لندن
عمرو الليثي: وهل تعتقد انه كتب هذه المذكرات
راجيف سيل: على ما اعتقد انه وفقا لما هو معروف انه قام فعلا بكتابة مذكراته ماعدا الفصل الاخير منها علينا ان نستنتج لماذا قد يرغب احد الاشخاص في ان تنتهي حياة مروان لاخفاء ماتحتويه هذه المذكرات
فاصل
عادل حمودة: لا اعتقد ان اشرف مروان كان قد انهى مذكراته ولا اعتقد انه كان سيسافر الى امريكا لانه سبب انه سيسافر الى امريكا ليس بسبب نشر مذكراته في اكتوبر القادم ولكن انا معلوماتي انا سمعت من احد السياسيين المصريين الكبار في الحزب الوطني انه قابل اشرف مروان قبل حوالي 6 شهور في نيويورك وقاله انه كان يسعى للحصول على ترخيص اوتصريح من البنتاجون ومن الخارجية الامريكية ومن المخابرات المركزية بالاطلاع على وثائق 73 خصوصا من الفترة من69 الى 73 وهي الفترة التي اتهم فيها بالتجسس لصالح اسرائيل وهو في الحقيقة في اعتقادي انه كان هيسعى الى ذلك وكان اشرف مروان ماشي وفي جيبه هذا التصريح زي ماكان في جيبه صورته مع الرئيس السادات وهو بيسلمه الوسام الذي حصل عليه في يوم من الايام كان لسه هيكتب مذكراته وما كتبش مذكرات وكون انه يطلع هذا الخبر من صحيفة انجليزية فليس ذلك حجة عليه
فاصل
عمرو الليثي: قلت لي ان والدك كتب مذكراته وكان هيسافر امريكا عشان يكتب الفصل الاخير ماذا جاء في تلك المذكرات
جمال مروان: هي مش مذكرات هو وقائع التاريخ حصل ازاي وامتى وتسلسلات الاحداث اللي حصلت في التاريخ واسبابها وكان بيكتبه بطريقة ان هي الملفات السرية اللي عدى المدة وما بقتش سرية كان بياخد المستند بعد ما يعدي عليه السرية
عمرو الليثي: هل تحدث عن علاقته بالمخابرات المصرية في تلك المذكرات
جمال مروان: والدي ما تحدثش عن حاجة هو كل اللي عمله انه جاب الاحداث والاوراق السرية اللي ما بقتش سرية وحطها ورا بعض وكتب تعليقكان بيكتب تعليقات ان حاجة حصلت في امريكا وحصل مكالمة بين كذا وكذا ومكالمة بين كذا وكذا وبين رئيس الجمهورية دا ورئيس المخابرات دا ومكالمة ما بين الملك دا ودا في 3 اجزاء من العالم على بعددي حصلت 12 دي حصلت 12/15 دي حصلت 12/30 كان هو اللي بيكتب الحتة اللي في النص لما انت تبص ع ال 3 ورقات دول كل الدنيا تنور بالنسبة لك وهو كان بيوضح وبيصلح المعلومات على التاريخ بناء على مستندات رسمية
عمرو الليثي: طب مش وارد يكون من ضمن ما جاء في تلك المذكرات انه يدين المخابرات الاسرائيلية مثلا
جمال مروان: ممكن
عمرو الليثي: ممكن
جمال مروان: او ممكن اوراق معينة ما بقتش سرية لما تطلع وحد يبص يقول آه انا فهمت دلوقت
فاصل
د/عصام عبد الحميد- رئيس الاتحاد العام للمصريين بأوروبا: اشرف مروان عمره ماقالي على موضوع المذكرات دي ليا انا شخصيا لكن طبعا انا سمعت بيها في كل الجالية المصرية الموجودة عندنا في بريطانيا بيتكلموا في هذا الموضوع البوليس ايضا اتكلم في موضوع الورق دا وبيحطه في الاعتبار
فاصل
امجد سلفتي- محامي بلندن : اشرف مروان صرح بانه سيصدر مذكرات وكان دائما عندما يسأل عن موضوع نشاطه الاستخباراتي كان يقول انا عسكري لصالح بلدي مصر وكان يقول في الوقت المناسب سأنشر التفاصيل
فاصل
د/مصطفى الفقي : وكان شرع في كتابة مذكراته وربما انتهى منها انا اتعشيت معاه هنا عزمتنا سيدة فاضلة تقرب لي نسب الاستاذة نيرمين مختار وعزمت شخصيا كبيرة جدا اذكر منهم الاستاذ الفاضل عمرو موسى امين عام جامعة الدول العربية وبعض الشخصيات البارزة واتعشينا مع اشرف وانا قعدت معاه قعدة طويلة وقلت له دا عبد العزيز حجازي بقامته الكبيرة ومكانته المعروفة رئيس وزراء مصر المحترم جدا حتى هذه اللحظة ومحل تقدير كل الناس قاللي انه من اسباب نجاحنا في حرب 73 اتصالات اشرف مروان مع الدول المختلفة وحصوله على الدعم المالي لنا وموضوع حظر البترول خصوصا في العلاقات مع المملكة العربية السعودية فكان اشرف مستريح جدا لهذا التصريح حتى قاللي انا عايز احط دا في مقدمة الكتاب على لساني انا قلت له ليس لدي ما يمنع
فاصل
صلاح الثيروباتي- صديق اشرف مروان : قلت له تعالى مليني المذكرات بتاعتك وانا اصيغها واكتبها لك فقالي انت ما تعرفش المذكرات دي انا لو قلتها هتثير مشاكل كتير وهتخلي ناس كتير تكرهني وخدناها بضحك يعني فدا كل اللي حصل
عمرو الليثي: هل عندك معلومات انه فعلا بدأ يكتب او كتب مذكرات
صلاح الثيروباتي: لا لا لانه فترة السنتين الاخرانيين كانت لقاءتنا قليلة جدا
فاصل
وفيق مصطفى-الرئيس السابق للجالية المصريةبلندن : قاللي انه هو بيكتب كتاب على اي الاحوال اسمه الحقيقة حاجة زي كده فقلت له بتكتبعه بالعربي ولا بالانجليزي بقى قاللي باكتبه بالانجليزي فقلت له طب كويس انا مبسوط انك بتكتب حاجة
عمرو الليثي: ابلغك انه سيقوم بكتابة مذكراته تحت مسمى كتاب الحقيقة
وفيق مصطفى: ايوة
عمرو الليثي: قالك ايه اللي هيتكتب في الكتاب دا
وفيق مصطفى: قاللي كل حاجة هتبقى مكتوبة فيه قلت له طيب كويس
عمرو الليثي: هل قالك انه بيكتب ولا لسه هيكتب
وفيق مصطفى: لا قاللي بدأ يكتب
عمرو الليثي: بدأ يكتب
وفيق مصطفى: نعم
عمرو الليثي: هذا الكلام على مسئوليتك
وفيق مصطفى: على مسئوليتي الشخصية ؟
عمرو الليثي: اه كما سمعت
وفيق مصطفى: كما سمعت منه يعني أه
عمرو الليثي: لكن ماقلكش تفاصيل الكتاب ايه ايه اللي هييجي ذكره في الكتاب
وفيق مصطفى: لا ولا اتوقع ان اسأله هذا السؤال
عمرو الليثي: ليه
وفيق مصطفى: لانها اشياء تخصه
فاصل
جمال مروان: قرر انه يبتدي في الكتاب دا فقط بعد ما الاتهامات بدأت
عمرو الليثي: هل اطلعت على ماجاء في تلك المذكرات
جمال مروان: على بعض الحاجات اللي فيها
عمرو الليثي: هل تلك المذكرات ما زالت موجودة حتى الان
جمال مروان: لا
عمرو الليثي: امال هي فين
جمال مروان: معنديش اي فكرة كان فيه نسخة واحدة في اوضة المكتب اختفت وريكوردر بتاعه ضمن الحاجات اللي اختفت يوميها المذكرات والريكوردر بتاعه والشرايط اللي كان مسجل عليها بصوته
عمرو الليثي: مفيش نسخة تانية منها
جمال مروان: انا معرفش فيه نسخة تانيةولو فيه في يومنا هذا انا معرفش هي فين بس دا مش معناه ان انا بدأت ادور لكن انا نصحت لصحتي ان ابتدي ادور على المذكرات دي
فاصل
امجد سلفتي- محامي بلندن : فطبعا هذي كانت اشارة غامضة لكثير من الجهات التي منت تريد منه تصريح واضح بانه لن يكتب عن هذا الموضوع وينسى هذا الموضوع بعد ان مضى عليه قرابة 30 سنة او انه سينشر بعض الاشياء التي لم تنشر وبالتالي سيعرض كثير من اصحاب المناصب السياسية سواء في اسرائيل اضف الى ذلك اطلاعه من خلال التنسيق الاستخباراتي بمكتب الرئيس واطلاعه على كثير من الملفات الساخنة كان سسيصرح عن امور ربما كانت ستضايق بعض الساسة العرب وكان ذلك مرفوض
فاصل
لواء / سامح سيف- خبير امني: هل هناك مذكرات فعلا ولا ما كانش فيه مذكرات دا برضه موضوع عليه علامة استفهام حتى لو كانت موجودة المذكرات واختفت انا ما اتصورش ان ما بها من معلومات يصل بالجهة اللي عايزة تنفذ عملية زي دي تخشى من حجم المعلومات اللي هيتقال فيها يعني انا ما اتصورش ان دا يبقى سبب كافي للقتل يعني
فاصل
عمرو الليثي : هل تعتقد ان تلك المذكرات هي الدافع الرئيسي وراء اغتيال الدكتور اشرف مروان
جمال مروان: ممكن تكون احد الدوافع الرئيسية يعني انا شفت حاجات مش فيها وسألته ليه مش هتحط دي فيها قاللي مش هتفيد حد بحاجة هتضر فقط فلهذا السبب مفيش اي سبب إنها تتحط في المذكرات يعني انها تتحط في الكتاب دا كان طريقة فكره ممكن يكون حد خايف ان حاجة زي كده تبقى في الكتاب ف بيأمن نفسه
فاصل
عمرو الليثي: مابين حذاء تم تدميره واوراق ومستندات مختفية ودماء لا يوجد مبرر لها وتوصيف تشريحي للجثمان لا يرد على كافة التساؤلات عن الحادث وملابساته تدور الشكوك حول الطب الشرعي وتعامله مع تلك الجريمة
فاصل
عمرو الليثي: هل اطلعت على تقرير الطبيب الشرعي
جمال مروان: الطبيب الشرعي قال سبب الوفاة بسبب الوقعة قالوا الشريان الداخلي اتقطع فدا سبب الوفاة طب ممكن تسلمونا التقرير بتاع الطبيب الشرعي رفضواممكن تسلمونا تقرير عن اي حاجة في الدم رفضوالغاية النهاردة طب ممكن تدونا اي حاجةان شاء الله ! بس عارف حتى التقرير بتاع الدم اللي عمل حاجة زي كده حد محترف هيختار حاجة ما تبانش بس افرض غلط ممكن تبان باقول افرض99/9 مش هتبان التقرير بتاع الطبيب الشرعي بتاع المشرحة هيقولنا حاجات كتير على الاقل ليه هدوم والدي الله يرحمه لما استلمتها كانت مقطعة من ورا وفيها دم
عمرو الليثي: كانت مقطعة من ورا
جمال مروان: بالظبط ومليانة دم انا لما سألت قالوا آه لما الاسعاف جت فقطعوا الهدوم بالمقص علشان يحاولوا يعملوا حاجة قلتلهم طب كويس الحمد لله طب ليه في دم ورا؟!
عمرو الليثي: قالوا ايه
جمال مروان : قالوا هنبقى نبص ونرجعلك كمان شهرين ونص وانا لسه مستني حد يرجعلي
فاصل
د/سميح عامر –مستشار طبي بلندن : انا جراح قلب طبعا اي حادثة ارتطام او حادثة عربية ممكن ينفجر الشريان الأورطي
عمرو الليثي: يعني الواحد ممكن يقع ينفجر الشريان بعد ما يقع
د/سميح عامر: بعد مايقع نتيجة الصدمة الصدمة نفسها دا ممكن شريان بينفجر ومعروف
عمرو الليثي : كام في المية ممكن يحصل
د/سميح عامر : لما يقع شريان ينفجر يعني
عمرو الليثي: اه
د/سميح عامر : 12%
عمرو الليثي: 12%
د/سميح عامر : اه
عمرو الليثي : طب 88% ايه اللي ممكن يحصل
د/سميح عامر : لا ممكن يموت من اصابة في المخ
عمرو الليثي: يعني ممكن يكون مات الاول وبعدين وقع ولا وقع بعدين مات
د/سميح عامر : هو طبعا التشريح بتاع الجثمان هو اللي يقدر يحدد الموضوع دا اكثر ولكن التقرير الاولاني قال ان فيه كسور في الضلوع وتهتك في الكبد وتهتك دي كلها ماشية مع الصدمة بتاعة السقوط من ارتفاع دي اول حاجة الشريان زي ما قلت لحضرتك دا نتيجة الصدمة ممكن ينفجر ومعروف ان شريان الاورطى فيه حتت معينة بتبقى ضعيفة وهي مناطق الانحناءات بتاعة شريان الاورطى لان انت عارف شريان الاورطى فيه 3 صاعد و مستعرض ونازل اللي عند التحام كل واحد فيهم دي حتت ضعيفة ممكن ينفجر فيها شريان الاورطى دي معروفة في اي حادثة ، حادثة سيارة ممكن انها تحصل ولكن هل كسور الضلوع وتهتك الاعضاء وانفجار شريان الاورطى دا حصل قبل ولا بعد ؟؟؟
فاصل
عمرو الليثي: منذ اشهر قليلة توترت العلاقات بين بريطانيا وروسيا بعد مقتل رجل المخابرات الروسي" شيفشينجو " فهل تثأر بريطانيا لكرامتها بعد مقتل الدكتور اشرف مروان ام ان القاتل يحظى بالحصانة في داخل اراضي بريطانيا طبقا للوعد الشهير
فاصل
عادل حمودة : معلوماتي ان منى عبد الناصر قد قامت باستئجار اكبر مكتبين للمحاماة في انجلترا وفي الولايات المتحدة الامريكية وان رجال المكتبين سعوا للبحث عن ادلة جديدة تؤكد ان اشرف مروان لم ينتحر وانما هناك شبهات جنائية وراء موتة منها على سبيل المثال انه انكسر باب الحريق اللي هو الخلفي للشقة واعتبر ذلك احد الادلة التي تشير الى ان هناك فاعل ومن ثم ليس انتحار ربما تفعل ذلك منى عبد الناصر كما تقول لانها صعيدية وما تنساش تارها وربما تفعل ذلك لان لها مصلحة كبيرة من ذلك وهي ان بوالص التأمين التي تقدر بأكثر من نص مليار جنيه مصري لن تصرف في حالة اذا كان اشرف مروان قد انتحر
فاصل
جمال مروان: حكاية بوليصة التأمين كالاتي انا قريتها في كذا جرنان البوليصة الوحيدة اللي انا اعرف عنها هي بوليصة تأمين ب50 الف جنيه مصري يعني 400 جنيه استرليني اتعملت في المكتب ده اللي احنا بنصور فيه حوالي سنة 2001 عارف البياعين اللي بيعدوا ويحاول يبيعلك بوليصة تأمين فجه فحاول يبيع لوالدي بوليصة تأمين قاله دي بالتقسيط يا دكتور اشرف هتدفع 100 او 120 جنيه مصري في السنة ولو سمحت اشتريها علشان انا تطلعلي عمولتي فالدكتور الله يرحمه قال اشتروا منه البوليصة اللي ب50 الف جنيه سنة 2001 او 2002
عمرو الليثي: لكن مفيش بوالص التأمين
جمال مروان: خالصصفر والحمد لله الدكتور اشرف سايبنا مش محتاجين حاجة
فاصل
امجد سلفتي –محامي : اعتقد وكما صرحت يعني زوجته بأنه سيثأر لدم اشرف مروان فهي اعتقد ان دا كان تصريح له بعد سياسي يعني تريد ان تثأر لمن اغتال شخص اشرف مروان كسمعة لاني اعتقد ان عائلة اشرف مروان لاتريد ان يلتصق بها تهمة الخيانة في جمهورية مصر العربية
عمرو الليثي: وهي اعظم واكبر من تهمة الانتحار
امجد سلفتي : بكل تأكيد
فاصل
عمرو الليثي: شخصية تتسم بدرجة عالية من الذكاء والدقة والحرص الشديد والتعامل بصلابة مع كافة المواقف واكثرها اثارة للجدل ورغبة في الحياة والحرص عليها هل يمكن ان تتخلص مثل تلك الشخصية من حياتها بمحض ارادتها ودون مقدمات
فاصل
عمرو الليثي: هل لك ان تعطيني فكرة عن شخصية الدكتورمروان وهل هو من نوع الناس الذين من الممكن ان يضعوا هذه النهاية لحياتهم كما ذكرت بعض الصحف
جوزيف ريباسي- شاهد عيان : لا اظن ذلك انا لا اصدق ذلك هذا لا يصدق انا لم ار مروان منذ فبراير الماضي ولكن كل مرة كنا نتقابل كان يتحدث عن الخطط المستقبلية وعن المشروعات القادمة
عمرو الليثي: هل اجتمعتم في اليوم نفسه
جوزيف ريباسي :الخطة كانت لدي ان نتقابل في هذا اليوم حيث كان لديه اجتماع الساعة 11 صباحا وكان من المفترض ان الحق بهذا الاجتماع في خلال الساعة الواحدة وكنا هناك انا وزملائي في ذلك الوقت لكنه لم يكن هناك وانتظرنا نصف ساعة ولكن دكتور مروان لم يكن موجود
عمرو الليثي: هل تعتقد انه قتل
جوزيف ريباسي: في رايي انه لم يكن يود الانتحار
فاصل
باهر الحلوجي- رجل اعمال بلندن : تقابلت مع دكتور اشرف مروان اكثر من مرة يعني لقيت ان عنده نبرة حزن لم اجد لها مبرر الا انها حالته الصحية ربما تدهور الحالة الصحية بتاعته نتج عنه اكتئاب او نتج عنه شئ ماقدرش اقول انا مش دكتور نفساني
فاصل
د/مصطفى الفقي: حكاية مكتئب دي انا ما حسيتش بيها خالص انا شفته من 3 اسابيع يعني ما لحقش بعدها ب3 اسابيع ينتحر ما لحقش يتعب في ال3 اسابيع دي
فاصل
د/حمدي الصاوي- الأمين العام السابق لصندوق الجالية المصرية بلندن : انا لا اقول ان دكتور اشرف مروان قتل
عمرو الليثي: امال حصل له ايه
د/حمدي الصاوي : رايي الشخصي انه كان بيعالج من فترة طويلة دي نمرة واحد
نمرة اتنين كمية الادوية اللي بيحتاجها اي نوع من العلاجات انا باعتقد انها بعد سن معين ممكن تأثر على الشخص وبعدين الانسان بعد سن معين ممكن يختل التوازن بتاعه وبعدين جرت العادة انت لو في بيتك وجالك مكالمة بتمشي وانت بتتكلم تخرج للبلكونة وبعدين نقطة برضه بعد سن معين ومع كميات الادوية اللي الشخص بياخدها ممكن يحصل عدم احساس كامل بدرجات الحرارة
عمرو الليثي: يعني انت عاوز تقولي ما انتحرش وما اتقتلش وقع
د/حمدي الصاوي : اه دا راي شخصي
فاصل
د/سميح عامر-مستشار طبي بلندن : احتمالات انه هو يكون واقف زي ما بيقولوا وداخ وقع دا احتمال ضعيف قوي ليه ؟ لان لما واحد بيدوخ ما بينطش
عمرو الليثي: بيسقط
د/سميح عامر: اه اول حاجة بتسيب فيه هو رجليه فما تقدرش تشيله فيقع احتمال الانتحار زي ما باقول لحضرتك اي حد يعرف الدكتور أشرف يستبعد هذ الاحتمال تماما
فاصل
د/عصام عبد الصمد – رئيس الاتحاد العام للمصريين باوروبا: فيه حاجة تانية مثلا لما راح امريكا عشان يعمل العملية الكبيرة يمكن ماحدش يعرف دي العملية الكبيرة بتاعة القلب جاب المدام بتاعته مدام منى وجاب اولاده ولدين وقالهم على املاكه بالظبط فين ووالى اخره لانه كان خايف قالك انا جايز اموت في العملية الكلام دا من كذا سنة يعني من سنين يعني بس مش فاكر امتى بالظبط وفي نفس الوقت كان عنده اسهم كتير صرف الاسهم بتاعته دي وعملهم كاش عشان خاطر يبقوا سهلين للعيلة انهم يحصلوا على المال بتاعه بعد مماته فهنا هل هو لو عاوز ينتحر في اليوم دا يوم الاربع اللي مات فيه دا يتهيألي انه ممكن يعمل نفس القصة يعني لكن هو ماعملش حاجة زي كده
فاصل
عمرو الليثي: كان بيقولكوا ايه قبل ما يخش يعمل العملية الجراحية كان فيه وصية بيسيبها لكوا
جمال مروان: الحاجة الوحيدة اللي كان بيعملها بصراحة قبل ما يخش يعمل اي عملية يكون بايع كل حاجة مايبقاش بيملك سهم واحد في اي شركة عشان انت عارف ممكن في غمضة عين سهم يطلع سهم ينزل
عمرو الليثي: لكن ما ماكانش بيقولك وصية معينة
جمال مروان : لا لا الحاجة الوحيدة اللي عملها انه قبل العملية بتاعة 2002 انا واحمد مضانا على ورق قبل ما يخش العملية دي بيوم
عمرو الليثي: ورق خاص بايه
جمال مروان: مضانا على حسابات بتاعتههو دايما يخاف على امي جدا وبصراحة لما افكر فيه هو كان بيحمي امي مننا انا واحمد قالك يطلعوا الاتنين دول مجانين ولا حاجة يعملوا حاجة في منى فمفيش اي حاجة في الدنيا تقدر تحصل طول ما والدتي عايشة وانا ماليش اي قرار لوحدي واحمد مالوش اي قرار لوحده وعشان اي قرار يتاخد لازم امضتي انا واحمد وموافقة امي فدلوقت وانا بفكر في الموضوع يعني هو تركيزه كان على والدتي اهم حاجة فدا الورق اللي مضيناه سنة 2002 ان احنا كنا بلغنا سن الرشد
فاصل
عادل حمودة : كل الملابسات بتؤكد ان اشرف مروان ليس من ذلك النوع من الشخصيات اللي ممكن تنتحر بالعكس لما اصحابه يقولوله هنفضل صحاب لغاية الموت فكان يقولهم موتوا انتوا انا مش هاموت
فاصل
د/عبد العزيز حجازي-رئيس مجلس وزراء مصر : انا شخصيا اقدر اؤكد انه مش اشرف مروان اللي ينتحر
فاصل
عبد المجيد فريد- وزير الدولة لرئاسة شئون الجمهورية السابق: لابد اللي قام بهذه العملية هيئةهيئة Professionals يعني واوروبا فيها هذا الشكل من المجموعات مجموعة بتتأجر صحيح غالية قوي بس بتتم العملية على خير وجه واللي بيأكد كمان عملية اغتيال ماهياش عملية انتحار الجثمان دفع لانه مش تحت الشرفة مباشرة
فاصل
د/محمود جامع-مستشار السابق للرئيس السادات: انا بقول ان هو لم ينتحر ولازم يبحث عن الجهة لانه قتل شوفوا بقى اللي ليه علاقة
فاصل
عمرو الليثي: تساؤلات كثيرة معلومات خطيرة شهادات كثيرة لشهود العيان اطرحها عليكم في الحلقة القادمة في الملف الهام من قتل اشرف مروان ؟ فتابعونا