حديث المدينة

مفيد فوزى : اتحدث اليكم من تورينو المدينة الصناعية الاولى فى ايطاليا وتخصصها صناعة السيارات وفى التركيبة السكانية يحتل العمال المرتبة الاولى نحن فى صيف ايطاليا ومع ذلك فالمطر يشاركنا المتعة او بمعنى ادق يفرق بيننا فى بعض الاحوال المطر ليل نهار هذا التنديع الذى يسقط فوق رؤسنا جزء من ثقافة ايطاليا فى المناخ ان رجال الاعمال والاقتصاديون فى هذه المدينة اعطوها بالمناسبة الوجه الثقافى هنا مصريون يعيشون وبعضهم تزوج من ايطاليات لا ادرى عن حب ام عن اقامة ورغبة فى البقاء لقد قابلت بعضهم وسمعت الحكايات حكايات مصريين عاشوا هنا فى تورينو الحكايات والوجوه المصرية فى تورينو من ايطاليا فى حديث المدينة
مفيد فوزى : ايمن شكلك مش غريب عليا شفتك فين قبل كده انت مثلت بتاع يعنى ايه ؟
ا/ ايمن : كنت فى مصر قبل كدة لحد سنه 2005 بعد اعلانات لشركات محمول بدون ذكر اسماء واشتغلت مع اكبر شركات اعلانات فى مصر وكان وزنى سعتها 155 كيلو يعنى حاجة كدة
مفيد فوزى : وبقيت كام دلوقتى ؟
ا/ ايمن : بقيت دلوقتى 110
مفيد فوزى : بتشتغل ايه يعنى ؟
ا/ ايمن : اشتغل شركة حراسات خاصة
مفيد فوزى : يعنى
ا/ ايمن : يعنى بنعمل الحراسات الخاصة لكبار المشاهير ولكبار الزوار العرب اللى بيجوا هنا ايطاليا وقضاه ومحامين
مفيد فوزى : قضاة قضاة ومحامين ليه القاضى
والمحامى يأخذ حراسة خاصة ؟
ا/ ايمن : يعنى لان القاضى هنا حضرتك عارف احنا فى ايطاليا بيبقى مشاكل كثير خايف من حاجة عايز يعمل لنفسه مظهر فى وسط الناس حاجة عادية يعنى
مفيد فوزى : والمافيا بالذات كمان يعنى ؟
ا/ ايمن : يعنى
مفيد فوزى : مين حاميته من النجوم وفين ؟
ا/ ايمن : هنا في ايطاليا فيه باس كروسى -
بس كنت تبع شركه
مفيد فوزى : باس كروسى ده يعنى زى مين فى مصر ؟
ا/ ايمن : باس كروسى ده يعنى ممكن نقول عمرو دياب المصرى
مفيد فوزى : عمرو دياب المصرى اه
ا/ ايمن : بس
مفيد فوزى : كان ميدو هنا مش كدة بتاع الكورة
ا/ ايمن : ميدو هنا اه طبعا
مفيد فوزى : وقعد اد ايه ؟
ا/ ايمن : والله انا مش فاكر لان انا مش لعيب كرة مش مهتم بمجال الرياضة قوى
فى الكورة بالذات بس فى خلال سنه كان قاعد هنا
مفيد فوزى : عاوزك تقولى انت كحارس خاص حارس خاص دى تعبير دقيق ولا ؟
ا/ ايمن : بالضط مضبوط يا افندم
مفيد فوزى : انت بيبقى معاك ايه فى جيبك يعنى شايله ان حد هاجمك افرض انك انت بتحرسنى ولو ان انا يعنى ما استحقش الحراسه
ا/ ايمن : لأ ازاى
مفيد فوزى : انما يعنى حد هاجمنى لسبب ما معاك ايه مسدس معاك ايه ؟
ا/ ايمن : هو انا معايا ربنا نمرة واحد وبعد كدة معايا ايديا يعنى ايدى
مفيد فوزى : ما انت بسم الله مشاء الله يعنى قولى الحلاقة دى ايه يا ايمن هى دى جزء من الشغل ؟
ا/ ايمن : ممكن نقول جزء من الشغل و
مفيد فوزى : كل الحراسات الخاصة لازم يبقى كدة ؟
ا/ ايمن : مش شرط
مفيد فوزى : مش شرط انت عملت كدة ليه ؟
ا/ ايمن : انا عملت كده عشان الحر
مفيد فوزى : عشان الحر
ا/ ايمن : اه
مفيد فوزى : تورينو حر؟
ا/ ايمن : حر قوى
مفيد فوزى : اه انت بالمناسبة عايش هنا ليك كام سنة ؟
ا/ ايمن : بقالى 5 سنين فى ايطاليا ومتزوج ايطالية
مفيد فوزى : متزوج ايطاليه عن حب ولا عن اقامة فاهم سؤالى ؟
ا/ ايمن : اه طبعا فعلا حضرتك
مفيد فوزى : فيه ناس بتتزوج عن اقامة
ا/ ايمن : اه فى كثير ناس بتعمل كدة
مفيد فوزى : اه
ا/ ايمن : بتبقى مضطرة تحت ضغط ظروف معينة دى انا كنت قاعد هنا فى ايطاليا من قبل ما اتعرف عليها كمان ونزلت مصر اجازة واتعرفت عليها فى مصر فى الاجازة واتجوزنا فى مصر وجينا هنا
مفيد فوزى : وهو فى الحراسات الخاصة ممكن العريس اللى زيك يشتغل بره ساعات طويلة وسايب عروسته ؟
ا/ ايمن : لو ما عملتش كده مش هاعرف اعيش
يعنى مش هاعرف اكون رب اسرة مش هاعرف اكون نفسى مش هاعرف اعمل حاجة للمستقبل بتاعى
مفيد فوزى : يبقى سؤال بتقابل شباب من اللى بييجوا هجرة غير شرعية ؟
ا/ ايمن : قابلت منهم كثير
مفيد فوزى : هنا
ا/ ايمن : موجودين اه فى كل حتة فى اوروبا فى كل حتة فى العالم
مفيد فوزى : جايين كدة بدون اى شئ ولا اوراق ولا اى حاجة ؟
ا/ ايمن : للاسف انا عاوز اوجه بس نصيحة
للشباب اللى بيجوا وبينضحك عليهم وبيدفعوا
مفيد فوزى : دم قلبهم
ا/ ايمن : ياريت دم قلبهم بيبيعوا الاراضى
بتاعتهم فى مصر عشان ييجوا هنا عن طريق مركب او عشان يموت صدقونى صدقو نى هنا فى ا يطاليا انا هتكلم عن الجزئية بتاعت ايطاليا لان انا عايش هنا فى ايطاليا معرفش بقيت الدول الاوروبيه فيه ايه بس صدقونى والله مصر احسن لكم بالثمانين الف او 120 الف اللى بتدفعهم عشان تيجى هنا اعمل بيهم مشروع فى مصر هتكسب وهتقول له طيب انت جيت ايطاليا ليه وعشان تعمل ايه انا جيت هنا عشان صورت اغنية مع جيهان راتب - وبعد كدة اتعرفت على مجموعة ناس الناس دى جابتنى عن طريق عقد عمل انا جيت شرعى ما جتش غير شرعى
مفيد فوزى : سامى عامر شاب مصرى قابلته فى مطعم وسمعت حكايته لا اقدر ان اقول ان سامى جاء بطريق غير شرعى ما اقدرش اقول كده وان كان فيه حتة غيرشرعية حصلت فى السكه وهو من الامانه هيحكيها لنا سامى انت اول ما سافرت سافرت من القاهرة الى براغ يوغوسلافيا
سامى عامر : يوغوسلافيا
مفيد فوزى : تمام
سامى عامر : تمام
مفيد فوزى : عملت ايه بعد ما وصلت براغ ؟
سامى عامر : وصلنا يوغوسلافيا واخذنا القطار الدولى
مفيد فوزى : اخذت قطار ومعك التأشيرة ؟
سامى عامر : ومعانا تأشيرة يوغوسلافيا
مفيد فوزى : كويس ودخلت عادى ؟
سامى عامر : دخلنا يوغوسلافيا عادى
مفيد فوزى : كويس
سامى عامر : ونزلنا على الحدود اليوغوسلافية
مفيد فوزى : لما تزلت على حدود يوغوسلافيا
الامن قابلكم كنتوا عاوزين تروحوا فين ؟
سامى عامر : كنا عاوزين نخش ايطاليا
مفيد فوزى : هل دخلت ايطاليا بسهولة ؟
سامى عامر : لأ بصعوبه
مفيد فوزى : ازاى؟
سامى عامر : دخلنا ونزلنا على الحدود اليوغوسلافيه بلد اسمها سوزانا وبعدين دخلنا فندق قعدنا فى الفندق جالنا واحد شرح لينا الطريق عشان
نخش ايطاليا
مفيد فوزى : الله انت دخلت على الحدود ودخلت اوتيل
سامى عامر : دخلنا اوتيل
مفيد فوزى : دخلت بسهولة من الحدود ؟
سامى عامر : اه احنا لسه فى حدود يوغوسلافيا
مفيد فوزى : دخلتوا الاوتيل ده على حدود يوغوسلافيا ؟
سامى عامر : ايوة فعلا حدود يوغوسلافيا
مفيد فوزى : مين اللى جالكوا وشرح لكوا؟
سامى عامر : واحد قرينا
مفيد فوزى : قريبكم ؟
سامى عامر : اه
مفيد فوزى : شرح لكم ايه ؟
سامى عامر : شرح لنا ان احنا نعدى السلك الشائك
مفيد فوزى : السلك الشائك يعنى هتنط فوق السلك سامى عامر : بعد الفندق فيه سلك كده
مفيد فوزى : هطنط فوقه ؟
سامى عامر : هنمشى من تحته
مفيد فوزى : يانهار اسود يعنى هتخش من تحته ؟
سامى عامر : يا نخش يا ننط من فوق
مفيد فوزى : انت دخلت ازاى من تحته ؟
سامى عامر : مرة دخلنا من تحته ومرة من فوق
مفيد فوزى : السلك ما اصابكش ؟
سامى عامر : شوية جروحات
مفيد فوزى : جروح يعنى كمان اتصبت ؟
سامى عامر : اه بسيطة يعنى
مفيد فوزى : وبعدين
سامى عامر : وبعدين عدينا اول مرة
مفيد فوزى : اه
سامى عامر : وصديقى قال لى بعد ما تعدى السلك ده
مفيد فوزى : صديقك ده عنده تجربه سابقة ؟
سامى عامر : اكيد عشان هو حاكى لنا الطريق بالضبط يعنى
مفيد فوزى : وبعدين
سامى عامر : وبعدين قال لنا هتعدى السلك ده
هتمشى على طول تمسك يمينك هتلاقى فيه شريط قطار هتمشى فى وسط الغابة هتلاقى شريط قطار
مفيد فوزى : مشيت فى وسط الغابة ؟
سامى عامر : مشينا فى وسط الغابة
مفيد فوزى : فيها مرتفعات ومنخفضات مضطر انك لازم تطلع المرتفعات دى وتنزلها تانى ؟
مفيد فوزى : انت اخذت الجنسية ؟
سامى عامر : اخذت الجنسية اه
مفيد فوزى : الجنسية الايطالية ؟
سامى عامر : الجنسية الايطالية
مفيد فوزى : انت ناصح يا اخى كام سنه اشتغلت
سامى عامر : اشتغلت من 88 اشتغلت بالورق
الاوراق وادفع الكنترموت والحاجات دى
مفيد فوزى : وقدمت على الجنسية ؟
سامى عامر : وقدمت على الجنسية بعد 10 سنين
مفيد فوزى : لما نزلت مصر بقى تزوجت ؟
سامى عامر : تزوجت سنه 91
مفيد فوزى : مصريه ؟
سامى عامر : مصريه
مفيد فوزى : قولى لى بقى انت لما جالك وطلب منك يتزوجك انت كنت بتحبيه ؟
زوجه : انا ما كنتش اعرفة اصلا
جه اتقدم لوالدى ووالدى كان عارف اهلهم يعنى اهلهم ناس كويسين وطيبين فى البلد
مفيد فوزى : واتجوزتوا ؟
زوجه :واتجوزنا
مفيد فوزى : وخلفتوا ؟
زوجه : وخلفنا
مفيد فوزى : قولى نصيحتك للشباب اللى بيهاجر
وعاوز يخش ايطاليا مرة عن طريق ليبيا ومرة عن طريق تونس قول لهم النصيحة بتاعتك
سامى عامر : النصيحة ان يمشى بالطريق الصح
مفيد فوزى : ازاى ؟
سامى عامر : يعنى يا اما تأشيرة
مفيد فوزى : لأ تأشيرة ده صح طبعا انما انت رأيك اللى من غير تأشيرة ده
سامى عامر : ما يعرضش نفسة للخطر بالنسبة للبحور والحاجات دى يعنى
مفيد فوزى : هل انت كان ممكن يحصل لك خطر فى تجربتك ؟
سامى عامر : خطر زى البحور لأ يعنى اكثر حاجة يمسكونا ويرجعونا تانى يوغوسلافيا ممكن نرجع مصر
مفيد فوزى : يعنى انت كان ممكن فى اى لحظة انك تترحل ؟
سامى عامر : انى اترحل وارجع مصر ممكن البوليس الايطالى ييجى ياخذنى ويرجعنى مصر اكثرة حاجة كده يعنى
مفيد فوزى : وتتمسك ؟
سامى عامر : واتمسك
مفيد فوزى : الولاد فى مصر اللى بيحصل بالضبط انهم بتجلهم تعاقدات على شغل فى ايطاليا والاوراق جاية كاملة فالشخص بيقطع تذكرة ما اعرفش اذا كان بيقطع تذكرة على حساب المتعاقد ده والا ايه هل الاوراق دى رسمية ؟
الاستاذ دسوقى : سيادتك انا هستسمحك انى اقول لحضرتك ان فعلا ده قانون رسمى بيصدر فى ايطاليا كل عام
مفيد فوزى :ايه القانون ده؟
الاستاذ دسوقى : القانون بيقول مثلا بيطلع نسبة محددة لكل دولة يقول ان مصر مثلا ليها 8000 يجيبوا 8000 تعاقد بعقد
مفيد فوزى : نعم
الاستاذ دسوقى : كل اصحاب العمل بيستغلوا هذه الفرصة وبيحاولوا كل واحد
مفيد فوزى : اصحاب العمل فين ؟
الاستاذ دسوقى : فى ايطاليا
مفيد فوزى : فى ايطاليا
الاستاذ دسوقى : اه
مفيد فوزى : اصحاب العمل طلاينه ؟
الاستاذ دسوقى : طلاينة او مصريين او اى صاحب عمل
مفيد فوزى : بيعمل ايه ؟
الاستاذ دسوقى : طبعا بيشوف الشروط اللى موجوده ايه وبيحاول بقدر المستطاع ينفذها طبعا بينفذها برضوا بيشوف الصلاحيات بتاعته فى المحل شكلها ايه
مفيد فوزى : بياخد اجر اد ايه ؟
الاستاذ دسوقى : العامل
مفيد فوزى : اللى هنا اللى عامل العقد
الاستاذ دسوقى : العامل طبعا ساعات بيعمل معاه اتفاقية قبل ما يجيبة يقوله مثلا انا هاخذ منك 3000 او 4000 او 5000 او 6000 يورو وحجيبك هنا
مفيد فوزى : توصل الى هذا الرقم ؟
الاستاذ دسوقى : توصل الى 10
مفيد فوزى : 10 الالاف يورو؟
الاستاذ دسوقى : 5000 - 6000 يورو
مفيد فوزى : ويبعث له التعاقد؟
الاستاذ دسوقى : يبعث له التعاقد لازم يطلع هنا من الامن هنا عادى مصدق عليه
مفيد فوزى : الشخص فى مصر بياخد العقد بيعمل ايه ؟
الاستاذ دسوقى : بيروح القنصلية وياخد ميعاد فى القنصلية ولزحمة التعاقدات فى القنصلية بياخد الميعاد ده على مراحل 6 شهور 7 شهور فى القاهرة ما كانوش بيدوا مواعيد قال لك مش هندى كمان مواعيد عشان تأخذ التأشيرة يعنى كان حاجة صعبة جدا
مفيد فوزى :وبياخد التأشيرة فى الاخر؟
الاستاذ دسوقى : الاخر بياخذ التأشيرة
مفيد فوزى : وبيجى هنا ؟
الاستاذ دسوقى : بيجى يفاجأ طبعا بما لا يسمعه الانسان او ما لا يراه يعنى ده
مفيد فوزى : مافيش شغل ؟
الاستاذ دسوقى : اطلاقا ما بيلاقيش شغل ما بيلاقش سكن
مفيد فوزى : ويتلطم ؟
الاستاذ دسوقى : فا احنا سيادتك يعنى
مفيد فوزى : لو سمحت لحظة لو سمحت تنصح الناس فى مصر الشباب اللى بيجى له تعاقد تنصحه بإيه ؟
الاستاذ دسوقى : يعنى انا انصحه فعلا ان المفروض المفروض يعنى يسأل كويس قبل ما يعمل هذا التعاقد
مفيد فوزى : يسأل مين ؟
الاستاذ دسوقى : يسأل عن صاحب العمل اللى هيعمل له العمل ؟
مفيد فوزى : هيعرف ازاى ؟
الاستاذ دسوقى : عن طريق واحد ثانى او مثلا يستفسر عن طريق القنصلية فى ميلانو او السفارة بتاعتنا فى روما
مفيد فوزى : المصريين فى تورينو احيانا الواحد يفخر بيهم يعنى يحس بالفعل ان فيه مصرى تحت سماء اوروبا قدر ان ينجح ويحط خطوط ويمكن السيستم يعنى مش عارف ان كان الكلام ده
صحصح والا لأ انما هطرحة استاذ دسوقى عفيفى نمط من هذا النوع هل لو كان دسوقى عفيفى فى مصر
هل كان وصل الى ما وصل الية الان فى البلد فى ايطاليا
الاستاذ دسوقى : بصراحة انا مش عايز انتقد الوضع فى اى حاجة انا مش عايش عشان اقول اذا كان ممكن او مش ممكن انا اقدر ا قول بس ان المجتمع الايطالي ادانى الفرصة انى ابدا من عامل بسيط يعمل فى جميع الاعمال اللى بيعمل فيها اى مهاجر لحد ما وصلت انهاردة كا رئيس مجموعة نيابية فى المدينه بتعتى ورشحت فى مدينة تورينو وتعتبر اكبر مقاطعة صناعية فى ايطاليا وحاليا ان بردوا مسئول نقابى عن فى النقابات الكيماوية
مفيد فوزى : اتجوزت امتى اتجوزت ايطالية ?
الاستاذ دسوقى : اتجوزت ايطالية لمدة 25 سنه
مفيد فوزى : معلش انا اسف انا هسأل نفس السؤال اتجوزتها عن حب والا عن اقامة?
الاستاذ دسوقى : يصراحة هى اللى كانت بتحبنى وانا حبتها انا كمان لو كان اقامة كان الموضوع سنه او اثنين
مفيد فوزى : لكن الزوجة الايطالية اللى انت عايش معاها استوعبت تقاليدك واسلوبك فى حياتك والا انت اللى خضعت للنظم الايطالية والطقوس الايطالية
الاستاذ دسوقى : لما يكون فيه جواز لازم يكون فية تنازل من الشخصين من الطرفين لازم تنازل من الطرفين يعنى مثلاا نا فىا لبيت عندى انا بحافظ على دينى ما باشربش خمرة وبصلى وكل حاجة لكن لو جت صديقة لمراتى او اصدقاء عندى فى البيت وحبوا يكلوا وواحد يقولها عاوز اشرب مثلا بيرة ما بحاولش اقول لأ يعنى بحاول دائما اوفق بين المجتمع اللى انا عايش فيه لان انا اللى اخترته مش هو اللى اختارنى انا اللى جئت انا اللى جئت مش انا خبير عالمى قالو لى تعالى عشان محتاجين لك انا اللى جئت مادام انا جئت لازم انا اتكيف مع المجتمع بدون تنازل كامل عن شخصيتى وعن طباعى فى نفس الوقت ما اخذش الاحتلال ان انا اخش بشروطى والا ما ينفعش
مفيد فوزى : هل تفكران تعود لمصر نهائيا ?
الاستاذ دسوقى : معندكش سؤال ثانى اخلص ده من دوت
فاصل
مفيد فوزى : هنا يتكلم التاريخ اعيد العبارة مرة اخرى هنا يتكلم التاريخ فالعمارة فى تورينو فى ايطاليا عمارة لها مذاق ولها اصالة ويحافظون عليها بشدة انظروا الى اسطح البيوت لا تزيد عن ارتفاع محدد ومعين لايمكن لا انسان الا اذا سال البلدية ربما كانت عمارات نادرة فيها ربما معامل وربما عيادات وربما مستشفيات وتكون فى مكان عالى لست ادرى لماذا وانا فى تورينو تذكرت الرائد العظيم طلعت حرب يوم ان كان يبنى اقتصاد مصر بهدوء ثم جلس طلعت حرب الى الحياة الثقافية وكان صاحب فكرة استديو مصر فى السينما ايام عماد حمدى لما كان موظف فى استديو مصر هنا فى هذه المدينة حدثت نقلة غريبة فرغم انها مدينه صناعية بالدرجة الاولى ولكن اهل الصناعة فيها ارادوا تطويرها
ارادوا اضافة بعد ولمسة حضارية اكثر على هذه المدينة وعندما جاءت المناداة بالحرية فى سنوات قريبة فى ذلك الجيل بدأ المثقفون يذهبون الى تورينو وبدأت هناك جمعيات ونشاط ثقافى
ولغة واسلوب حضارى وطريقة لبس حتى صارت تورينو ايضا تنافس ميلانو فى الجمال والابهة الحياة فى تورينو وهذه هى المعادلة العصبة مدينة صناعية فى جوفها فكر وثقافة ونشاط كل هذه الاشياء لان الشركه الكبيرة شركة السيارات تنفق على هذا النشاط الثقافى اننى اسير فى احد شوارع تورينو هذه هى العاصمة الصناعية ربما فى ايطاليا لانها المدينه الثالثة سكانيا وربما مساحة دكتور محب سعد عايزاعرف ليه حضرتك حصلت على لقب فارس من ايطاليا ؟
د/ محب سعد : انا حصلت على لقب فارس فى المرة الاولى عن مجمل نشاطى كا استاذ وفى نشر ا لثقافة الايطالية واللغة الايطالية بين المصريين ولعملى فى الجامعات الايطالية ايضا كمحاضر فى بعض فترات متفاوته
مفيد فوزى : المرة الثانية ؟
د/ محب سعد : المرة الثانية اننى اشرفت على ترجمته وعلى مراجعة العديد من الكتب فى ترجمة الادب الايطالى واعمال علمية للمستشرق الايطالى ميكليا مارى
مفيد فوزى : ايه اهم كتاب حضرتك ترجمتة من الايطالية الى العربية هو اكثركتاب تعبنى وتعبنى جدا
مفيد فوزى : ليه تعبك ليه ؟
د/ محب سعد : لانه قائم على عمل جماعى ونحن لا نعرف العمل الجماعى
مفيد فوزى : ايه العمل الجماعى ده؟
د/ محب سعد : كنا نقوم بترجمته عدة افراد مع بعض وانا اشرف على هذا العمل
مفيد فوزى : الترجمات اللى فيها اكثر من مترجم بيبقى فيها زى ما بنقول فى مصر مية واحدة
د/ محب سعد : ما فى الاخر دى مهمة المراجع
ن هو يعيد صياغة
مفيد فوزى : لما بتقول حضرتك انه 2000 صفحة
د/ محب سعد : 2200 صفحة !!
مفيد فوزى : كان عنوان الكتاب ايه ؟
د/ محب سعد : عنوان الكتاب تاريخ مسلمى صقلية
مفيد فوزى : دكتور محب سعد لو اننى اجرى هذا الحوار مع ابو تريكه وانا اجرى الحوار الان مع الدكتور محب سعد الرجل الذى يأخذ عن الادب الايطالي عدتة ليقدمها للنا س اذا قدم وعقل من
يكسب فى النهاية ؟
د/ محب سعد : القدم
مفيد فوزى : طارق رجل اعمال مصرى فى ايطاليا واللى شدنى ان انا اسجل معاه انه مشغل 500 مصرى معلومة دى صح يا طارق ؟
طارق : انا مشغل فى حدود 420 مصرى
مفيد فوزى : مشغلهم فى ايه بقى من فضلك ؟
طارق : مشغلهم عندنا شركة نقل نقل كبيرة
مفيد فوزى : عربيات
طارق : نقل عربيات ثلاجات
مفيد فوزى : ثلاجات
طارق : ثلاجات اه
مفيد فوزى : وال420 دول لقيتهم فين ؟
طارق : خبرة 30 سنه يعنى شوية من روما وشوية من ميلانو وشوية من تورينو من هنا
مفيد فوزى : ايه سمعوا عنك والا ايه ؟
طارق : اه بيجوا يدوروا على شغل وبنديهم شغل نعمل لهم خبرة الاول بس السواقين طبعا بتاعت مصر ما كانتش جاهزة لايطاليا وعملنا لهم خبرة بتاع 3 اشهر وشغلناهم معانا
مفيد فوزى : بياخدوا مرتبات معقولة ؟
طارق : بياخدوا فى حدود 2500 يورو فى الشهر
مفيد فوزى : يعنى عشان خاطر الناس اللى فى مصر تعرف تقريبا اد ايه مصرى ؟
طارق : تقريبا فى حدود 17 الف جنية
مفيد فوزى : ادينى فكرة عن الكراكتورز الكبيرة الضخمة بتعتكوا والحوادث ؟
طارق : الحوادث ما بتجيش كده لان السواقين اصلا لازم يحترموا القانون بتاع البلد
مفيد فوزى : هل السواق المصرى فى ايطاليا بياخد بانجو ؟
طارق : لأ ممنوع
مفيد فوزى : ممنوع يروح فى داهية ؟
طارق : ممنوع تتوقف العربية 3 اشهر ويشتكوا صاحب الشغل كمان بنعمل لهم تحاليل دلوقتى القانون الجديد دلوقتى لازم السواق يتعمل له تحليل دم ونشوف حالتة الجسمانية ازاى ماينفعش نطلع له العربية الا لما تكون 10 على 10 ولو تعبان ما سقش ولو شارب خمرة ما يسقش لو شارب خمرة بيشيلوا منه الرخصة على طول
مفيد فوزى : خيرى حسن مصرى مقيم فى ايطاليا لما سمع ان فيه معرض كتاب جية فورا مش لوحدة هو وعائلتة عائلتة م كونه من السيدة الايطالية الفاضلة زوجتة ومعاه ولدين او بمعنى ادق بنت وولد ومش اكثر من كده خدوا بالكم لان المثل بيقول حتى فى ايطاليا لنكن اقل عددا واسعد حالا خيرى حسن عمدة ايطاليا ولما اقول عمدة المصريين فى ايطاليا يعنى بيحل مشالكهم وعذباتهم وزواجهم وطلاقهم وبعد الشر عنكم وفياتهم كل التفاصيل الحياتيه اللى بيعشها انسان فى ايطاليا مع المصريين عند هذا الرجل الذى يبدو علية الجدية الشديدة كا جدية الالمان ولكنه بتمتع بقلب عطوف انت تزوجت امتى ايطالية ؟
خيرى حسن : سنه 1980
مفيد فوزى : تزوجت عن حب والا عن اقامة ؟
خيرى حسن : هى امانه لازم الواحد ينقلها يعنى هى كانت اقامة وعملية تكلفة يوميه الواحد بيدفعها فا قعدت تقريبا ست شهورعلى موضوع اقامة
مفيد فوزى : من كام سنة ؟
خيرى حسن : احنا الحمد لله بقلنا 35 سنه اهو او 34 سنه زى الفل
مفيد فوزى : اول مرة اقابل مصرى عندة درجة من الامانة هو تزوج اولا عشان يبقى عندة اقامة لكن يبدو ان السيدة الفاضلة الايطالية استطاعت بذكاء ان تقنعة انه من غيرها هيسيح وهينوح واستطاعت ان تصل الى شراينة فتزوجها كام سنه يا خيرى ؟
خيرى حسن : 34
مفيد فوزى : 34 سنه خلفت كام
خيرى حسن : عندى نبيل محامى وهيخلص انشاء الله اخر سنه له وعندى ياسمين لغات وترجمه فورية
مفيد فوزى : يعنى انت المصريين مرهقين فى التعامل برة مصر هو اه لانه يعنينى ما فيش ثقافة وحضرتك عارف كلمة ثقافة يعنى ايه
مفيد فوزى : سلوك
خيرى حسن : يعنى انسان جاى ما عندهوش سلوك متعود على سلوك معينة بتاعت بلدة جوا بلدة لكن فى الخارج تختلف الامور فااكيد اتمنى من الشباب يكونوا مسئولين ان يعنى يثقف نفسة البلد اللى هو رايحها وخاصة مبادئ نقول
ياسمين : دورهم
مفيد فوزى : خلونى اتكلم مع المترجمه الفورية ياسمين ايه نفسك تقولية فى برنامج للناس اللى بتشوفه فى مصر انت مسلمة ؟
ياسمين : اه
مفيد فوزى : بتصلى رمضان بتصلى فى رمضان بتصومى ؟ظ
ياسمين : اه ايوة عشان بابا بتصوم وتصلى وكده
مفيد فوزى : اه يعنى انت اتعلمتى الصوم والصلاه من بابا كويس اشكرك على اى حال اشكرك تعرفى يعنى ايه اشكرك ؟
ياسمين : شكرا
مفيد فوزى : شكرا شكرا . زوجة الاستاذ خيرى حسن هى السيدة الفاضلة الايطالية ماريا وابنها نبيل نبيل بتدرس ايه ؟
نبيل : انا بادرس محامى وانشاء الله سنتين بخلص بدرس وممكن اشتغل ااا
مفيد فوزى : طبعا عايز اقول ان اللغة احيانا لما يبقى العربى اقل يعنى كام سنه انتوا هنا
نبيل : لأ انا كنت صغير
مفيد فوزى : حوالى كام سنه 20 سنه حضرتك تزوجتى الاستاذ خيرى عن حب ؟
ماريا : ايوة كثيرة حب كثيريعنى اه
مفيد فوزى : بتحبى مصر ؟
ماريا : ايوة بحب
مفيد فوزى : ايه الوحش اللى في مصر ايه الحاجة الوحش لوسال اللى فى مصر ؟
نبيل : يعنى لو فيه بابا اى مكان حلوة
مفيد فوزى : يعنى اى مكان فيه بابا حلوة
نبيل : اه هيبقى حلو يعنى
مفيد فوزى : شفت الدبلوماسية
ماريا : انت اتكلمتو كده
مفيد فوزى : انت اتكلمتى
ماريا : اه ايوة ان اتكلمتوا كده
مفيد فوزى : اى مكان فيه بابا زوجك يبقى حلو
ماريا : ايوة ايوة
فاصل
مفيد فوزى : مقاهى الرصيف فى ايطاليا ترد الروح يقعد فى حالة هدوء تام ينسى كل ما حولة من مشاكل وهموم فنجال القهوة الشهير الايطالى سفسو - سئ يمكن ان يكون له مذاق جميل فى لحظة الهدوء وربما اعتذر لو كنت املك اللغة الايطالية لاعتذرت لهذا الجمهور الذى يجلس ورائى فربما لا يريد التصوير اريد ان اقول ان هنا فى تورينو متحف مصرى فيه الكثير من التحف المصرية وعديد من الاثار ايضا المصرية ومعنا فى الوفد الذى يأتى الى تورينو فى هذا المجتمع المثقف العالى الرفيع من القاهرة
معنا علماء اثار درسوا الاثار جيدا واتقنوا فن العرض ويعرفون تاريخها خطوه خطوة ان علم الاثار علم واسع لا حدود له انه التاريخ يسير على قديمين ان هذه الاثار فى مدينه تورينو قد صنفت تحت قائمه لونسكو للتراث العالمى وتحوى كل هذه الاثار قصر ريالة وسط المدينة تورينو تورينو للعلم هى تلك المدينة التى يبدو عليها الجدية فى الصباح ولكنها تبدو حالمة فى المساء ولوكانت المدن كالنساء فاننى استطيع ان اقول ان تورينو ا مراة جادة طوال النهار ثم تسترخى فى المساء وتسقط خصلات شعرها وتستعد للمساء والامسيات ثم تصحو فى الفجر فى الخامسة تقود سيارة او ترك وقد تأتى لحظة الظهر القيلوله وتجلس فى مقهى تأخذ هذا الفنجان الجميل من القهوةالايطالية ذات المذاق
فاصل
مفيد فوزى : هذه هى تورينو عاصمة الصناعة والثقافة والفن ايضا والتذوق عند الايطالي لا يمكن اطلاقا الجدل فيه فهو متذوق
فاصل
مفيد فوزى : بكلم حضراتكم على ارتفاع 1500 متر عن سطح البحر فى تورينو وخلفى كنيسة العذراء مريم يارب احمى مصر من اعدائها فى الداخل قبل ا لخارج صح يا جورج ؟
جورج وجيه : صح صح
مفيد فوزى : نفس الصلاة
جورج وجيه : نفس الصلاة نفس الصلاة
مفيد فوزى : 25 سنة استاذ جورج وانت بتشتغل فى مصنع سيارات لازم تبقى عندك خبرة ايه الحكمةان احنا فى مصرنجمع بس السيارات لكن ما عندناش صناعة سيارات هل هى صناعة مستحيلة ؟
جورج وجيه : لأ هى مش صناعة مستحيلة ولكن ينقصنا فى مصر الميكنه الصناعية العالية اللى هى التحكمات الالية فى الماكينة
مفيد فوزى : اه يعنى دى مش عندنا ؟
جورج وجيه : دى مش عندنا
مفيد فوزى : دى موجودة هنا ؟
جورج وجيه : دى موجودة هنا والتكنولوجيا تكنولجيا الريبوتات اللى هى بتنقل الحته من قطعة لقطعة ومن مخرطة لمخرطة عشان تتصنع
مفيد فوزى : من غير الايدين ؟
جورج وجيه : من غير الايدين وبعدين طرق اللحام الاليه الريبوتات هنا عندنا احنا منعنا هنا اللحام عشان صحة الانسان وكمان عشان يوفروافى الايدى العاملة دلوقتى بيستعملوا جميع الربوتات للحام فى العربيات
مفيد فوزى : يعنى كل ما يحدث للعربية
جورج وجيه : اليا اليا اليا
مفيد فوزى : اليا مفيش الايد دى ؟
جورج وجيه : والمشكلة فى نظرى اللى احنا مش هنقدر نوصل لها بعد سنين او شركة تبيع لنا التكنولوجية تصنيع المحرك نفسة
مفيد فوزى : اه
جورج وجيه : دى اللى هى اصعب حاجة فى العربية اى حاجة فى العربية ممكن تتعلم الا صناعة المحرك
مفيد فوزى : سؤال كام عربية فى اليوم بتنتجوهم ؟
جورج وجيه : حوالى احنا وصلنا من حوالى 3 او 4 سنين كانت الشركه بتنتج 3600 عربية فى اليوم لان الشركة بتشتغل 24 ساعة
مفيد فوزى : ثلاث الالاف وستمائة عربية فى اليوم لان الشركه بشتغل 24 ساعة شوفوا الجدية شوفوا الجدية فى اوروبا
جورج وجيه : طبعا الناس ملتزمه جدا بالعمل
مفيد فوزى : العربيات هنا عن ارقام بيعها رخيصة لية عندنا فى مصر نار؟
جورج وجيه : لان العربيات هنا فعلا رخيصة والواحد بيحاول يشترى عربية من اوروبا الحكومة بتقول له عشان انت اشتريت عربيه عشان تستخدمها فى البلد فا بيشيلو 20% اللى هى ضريبة مبيعات وما بيدفعهاش وبيخدوا العربية من غير ضربة مبيعات وبيدوا له كمان تخفيض ثانى المشكلة اللى بتواجهنا فى مصر هى الضرائب الجمرك جمرك العربية اللى ادفع فى الاسكندرية مش فى العربية
مفيد فوزى : الملحق الثقافى الدكتور طة مطر انا عاوز اعرف اد اية عدد الطلبة او بمعنى ادق بقى الدارسين المصريين فى بلد زى تورينو
طة مطر : فى بلد زى تورينوعدد الدارسين هنقسمهم لكذا فئة دارسين دراسات عليا يعنى ماجستير ودكتوراة وفيه بيعملوا ابحاث بعد الدكتوراه وفية دارسين فى الجامعة دارسين فى مراحل التعليم المختلفة
مفيد فوزى : حوالى اد ايه
طة مطر : كلهم بالتلاميذ بكلة لأ كدة ممكن نوصل حضرتك 2000 واحد
مفيد فوزى : مصرى
طة مطر : اه لان عندنا تلاميذ المدارس
مفيد فوزى : طالب مصرى بين طلبة وبين دارسين
طة مطر : اه
مفيد فوزى : بيدرسوا ايه ؟
طة مطر : بيدرسوا هندسة فروع مختلفة فى الهندسة تورينو رغم انها مدينة صناعية فيها مصانع كثيرة بتخدم صناعة السيارات فا ناحية الهندسة الميكانيكية هندسة كيماوية هندسةالمواد العمارة لان هنا فية كلية العمارة فى الفلنتيون من اشهر كليات العمارة فى ايطاليا وبيدرسوا طبعا الطب
مفيد فوزى : هسألك سؤال حياة الشباب حياة الشباب الدارس فى تورينو هل بتواجة مشاكل اجتماعية صدام مع المجتمع ؟
طة مطر :بتعتمد على دارس نفسة لو الدارس ودى نقطة مهمة جدا ودى يمكن لان فيه اجتماع معمول وفيه شغل احنا بنعملة دلوقتى ازاى نعد الدارس قبل ما يأتى لازم نعده اجتماعيا وثقافيا
مفيد فوزى : يعنى يبقى فاهم طبيعة المجتمع ؟
طة مطر : لان انا عندى دارس بيجى من القاهرة ومن الاسكندرية وعندى دارس بيجى من اقصى الصعيد او من ا لواحات ده ما يبقاش اختلط بالمجتمع لان الدارس اللى طلع ولد مجتهد ممتاز جدا من اسوان او من الاشراف فى قنا لان انا اعرف ناس من الاشراف فى قنا ما طلعش برة البلد والجامعة فى نفس البلد وكل حاجة فى نفس ا لبلد يجى هنا يصطدم بالواقع هيحس بغربة دى اللى احنا لازم نعد الدارس ليها
مفيد فوزى : غربة وصدمه
طة مطر : ماهى الغربة عبارة عن صدمة حضارية
مفيد فوزى : ماجد انت 20 سنة جئت لهذه البلد ايطاليا خلينى اكون معاك صريح ايه اللى اتخلصت منه من مصر ؟
طة مطر : اول حاجة اتخلصت منها من مصر الكسل الشباب فى مصر
مفيد فوزى : الكسل
طة مطر : الشباب فى مصر كسلان كسلان حتى لوجت له فرصة عمل يفضل القعود على المقاهى اكثر من العمل فيه مثل يشتغل ساعتين فى اليوم ويتعب هنا الصراحة تخلصنا من الكسل بنشتغل من الساعة 8 الصبح او 9 الصبح للساعة 12 بالليل ثانى حاجة اتخلصنا منها او ارتبطنا بيها هنا الالتزام بالمواعيد هنا المواعيد بتعلمك فعلا التدقيق فى الكلام بتكون على قد الكلمة بتكون زى ما انت دقيق فى مواعيدك بتكون دقيق فى عملك فى مصر تسيب فى العمل يعنى ممكن فيه مثلا تزويغ من العمل يبقى فيه موظف يشتغل ساعتين فى اليوم يعنى
مفيد فوزى : دلوقتى انت عندك اولاد كان نفسك يبقى عندك بنات ؟
مصرية : طبعا اى ام بتتمنى يكون عندها بنت
مفيد فوزى : ليه
مصرية : علشان تمسك بايدها لما تعجز لما بتتقدم فى العمر هى اللى بتراعيها هى اللى بتحن عليه غير الولاد طبعا
مفيد فوزى : ودول هيروحوا فين ؟
مصرية : دولا هموم الدنيا هتخدهم مننا شوية هههههههه
مفيد فوزى : ودول ما بتعرفوش عربى ؟
مصرية : لأ بيتكلموا عربى بس ما بيعرفوش يكتبوه
مفيد فوزى : الله يعنى انا لو اتكلمت مع واحد منهم يعرف يكلمنى ؟
مصرية : اه يعرف بس مش لغة عربية فصحى لغة عامية
مفيد فوزى : وانا هتكلم فصحى ليه اسمك ايه ؟
طفل : ايوة
مفيد فوزى : وانت
طفل : الكسندرا
مفيد فوزى : انت مبسوط هنا من ايطاليا ؟
طفل : اه
مفيد فوزى : اتعلمت ايه فى ايطاليا؟
طفل : اللغة واكتب واقرا حاجات بتاعت مدرسة يعنى
مفيد فوزى :بتاعت مدرسة
طفل : اه
مفيد فوزى : وانت يا نمس
طفل : زيه
مفيد فوزى : زية هه
طفل : اه
مفيد فوزى : مفيش اى حاجة
مفيد فوزى : بتعجبك الايطالية
مصرية : لأ
مفيد فوزى : ليه
مصرية : هى فيها نوع من الانانية شوية
مفيد فوزى : انانية
مصرية : اه
مفيد فوزى : تعبير غريب بب ايه
مصرية : بتجرى على نفسها بس ما
مفيد فوزى : ايه
مصرية : بتجرى على نفسها
مفيد فوزى : تجرى على نفسها
مصرية : اه
مفيد فوزى : اه
مصرية : بمعنى ان هى لو لقت فرصتها حياة بره بيتها احسن فى المعيشة من وجهة نظرها هتروح لها من غير اى حاجة
مفيد فوزى : وتسيب الراجل
مصرية : اه
مفيد فوزى : هل انت حبيتى تتحمى زوجك بان هو تزوج مصرية
مصرية : متهيأ لى هوحما نفسه مش انا اللى حميته ههههه
مفيد فوزى : هو حمى نفسه ؟
مصرية : دة اكيد
مفيد فوزى : افرضى كان تزوج ايطالية
مصرية : انا ميتهأليش
مفيد فوزى : هل كانت حياتة هتبقى اسعد ؟
مصرية : ميبقاش امان من ناحيته لما بيتزوج مصرية بيحس بالامان لكن لما يتزوج اجنبية صعب قوى ان هو يحس بالامان معاها
مفيد فوزى : على نفسك من نظرات عيون الشباب الطلاينه والحياه اللى بيعهشوها الشبان والبنات الطلاينة وحياة التدخين واشياء اخرى بيعشوها الطلاينة
مصرية : طبعا هنا دى حاجات عادية خالص بنمر بيها كل يوم بنشوفها كل يوم
مفيد فوزى : بتحمى نفسك ازاى ؟
مصرية : يحمى نفسة بالتربية اللى اخذها من اهله
مفيد فوزى : بأيه
مصرية : التربية اللى اخذها من اهلة
مفيد فوزى : التربية اللى اخذها من اهلة اه
مصرية : الاصل اللى هو اتولد فيه ان الواحد ما بينساش اصله يعنى
مفيد فوزى : وانت اتولدتى فين ؟
مصرية : اتولدت هنا
مفيد فوزى : الشباب الطليانى رأيك فية ايه ؟
مصرية : انا مااقدرش اقول هما غلطانين او بيعملوا حاجة غلط عشان مفيش حد قال لهم ايه الصح وايه الغلط فال الواحد ما يقدرش يقول لهم اللى انتوا بتعملوة ده غلط
مفيد فوزى : بيعملوا اخطاء فيه اخطاء
مصرية : طبعا فى ونظرنا احنا خطأ
مفيد فوزى : زى ايه
مصرية : زى ما حضرتك قلت الاول شرب السجائر العلاقات اللى قبل ا لزواج كدة
مفيد فوزى : انت مصرية مقيمة هنا فى هذه البلد فى تورينو بقول لها ايه رأيك فى المرأة الايطالية قالت لى انانية هل ده صحيح
مصرية : لأ
مفيد فوزى : انت ليكى اصحاب بنات ايطاليين
مصرية : اه
مفيد فوزى : زي مين اسمها ايه
مصرية : انديانا - مارى لانا - جنتا
مفيد فوزى : كل دول اصحابك ؟
مصرية : هههه عادى يعنى مش شايفة ان دول
مفيد فوزى : انانيات
مصرية : لأ طبعا
مفيد فوزى : اه طب هى قالت انانيات ليه
مصرية :مش عارفة اسألها هى لأ ما اقدرش افهم ليه ؟
مفيد فوزى : يمكن خايفة على زوجها
مصرية : دى مشكلة زوجها مش مشكلة صاحبتها
مفيد فوزى : بن جورنو
طارق : بن جورنو
مفيد فوزى : ياطارق بتشتغل ايه عايز اعرف ؟
طارق : انا رئيس الجالية المصرية هنا فى تورينو وعندى مدرسة ثقافية هنا
مفيد فوزى : ثقافية يعنى ايه ؟
طارق : تعليم لغة عربية ورقص شرقى وفولكلور
مفيد فوزى : لغة عربية ورقص شرقى وهو الايطالية ممكن ترقص رقص شرقى
طارق : عادى اكثر من 4000 طالبة بيتعلموا رقص شرقى هنا فى تورينو
مفيد فوزى : اصل الرقص الشرقى عايز اجسام معينه والا انا غلطان
طارق : ما هم اجسامهم حلوة برضو
مفيد فوزى : وبيتعلموا رقص شرقى ليه ؟
طارق : بيتعلموا لانهم بيحبوا الحضارة المصرية
مفيد فوزى : فىاى شئ فى الحضارة
طارق : اى شئ حتى الاكل حتىالشرب اى مشروب شرقى او اى مشروب مصرى
مفيد فوزى : انت بتعلمهم طريقة الاكل الشرقى
طارق : اه طبعا
مفيد فوزى : ده بيزنس محترم يا طارق
طارق : جدا جدا وبعدين كله انبساط كمان
مفيد فوزى : كلة ايه ؟
طارق : كلة انبساط كمان
مفيد فوزى : كلة انبساط
طارق : اه طبعا
مفيد فوزى : انت تدعو الى الانبساط؟
طارق : طبعا
مفيد فوزى : ثقافة الانبساط ربنا يبسطك يا طارق
طارق : ربنا يخليك يا افندم
مفيد فوزى : مين ما شفش التنورة مش ممكن عبارة عن شكل اوعرض خرافى يثير التصفيق يثير الاعجاب ويثير الاحترام لقدرة مصرية طول عمرى اشوف الراجل اللى بيعمل الطنورة فى العروض لكن عمرى ما شفتة بشكل شخصى هو ده ده الراجل ده قدم نفسك
حسين محمد
مفيد فوزى : حسين انت التنورة بتاخذ اد ايه وقت ؟
حسين محمد : على حسب ممكن نعمل نصف ساعة على الاقل
مفيد فوزى : اتعلمتها ازاى التنورة دى ؟
حسين محمد : ده كان هوايه كنت حببها فى الاول وفى الاخر حبتها وعشان كدة ابدعت فيها
مفيد فوزى : دة انت بتعمل بيها اشكال غير طبيعية
حسين محمد : هى الحلاوة فيها ان انت بتصنع وتشكل الاشكال بتعتها كلها يعنى
مفيد فوزى : انت فرحان ان الناس صفقت لك فى المعرض انا حضرت وكنت بصفق باعجاب يعنى كنت سعيد
حسين محمد : كنت سعيد جدا لان كل ما النا س تصفق بتحس انك بتطلع كل اللى عندك فبتعبرعن نفسك
مفيد فوزى : ايه السر فى التنورة اية اللعبة دى
حسين محمد : هو كل السران الواحد هى بتبقى قدرة اللبس حتى لو لف بيه بيروح فى عالم ثانى
مفيد فوزى : ما بتدخش يا اخى ؟ظ
حسين محمد : لأ ما تدخش هو على حسب النوعية
مفيد فوزى : لف كدة
حسين محمد : لو لفيت على حسب ممكن
فاصل
مفيد فوزى :السفر الى اوروبا ليس تجربة عادية
مطرزة بالاحلام الهجرة لدولة كاايطاليا ليست نزهه خلوية مش مباراه المسألة يا تكسب يا تنجح ابدا السفر للخارج تجربة تحتاج الى اللغة والى المهارة والى الصبر والى الاحتال والى هدف محدد امام عينك وليست مطلقا ضربة حظ فا لنجاح تحت سماء اوروبا له مفاتيح اهمها التخطيط قبل السفر لتعرف على اى ارض تضع قدميك